ହାଇଦ୍ରାବାଦ: ଉଚ୍ଚ ରକ୍ତଚାପ ଏବଂ ମଧୁମେହ ରୋଗ ସର୍ବଭାରତୀୟ ସ୍ତରରେ ଦ୍ରୁତ ଗତିରେ ବୃଦ୍ଧି ପାଉଥିବା ରୋଗ ମଧ୍ୟରୁ ଗୋଟିଏ । କହିବାକୁ ଗଲେ ଘରେ ଘରେ ଏହି ରୋଗୀ ଦେଖିବାକୁ ମିଳିବେ। କମ ବୟସର ବ୍ୟକ୍ତି ମଧ୍ୟ ଏହି ରୋଗର ଶିକାରେ ହେଉଛନ୍ତି। ଏନେଇ ବିଶେଷଜ୍ଞଙ୍କ କହିବା ଅନୁସାରେ, ଏହି ଦୁଇଟି ରୋଗ ଶରୀରକୁ ଅନେକ ଉପାୟରେ ପ୍ରଭାବିତ କରିଥାଏ । ଯଦି ସଠିକ ସମୟରେ ସେଗୁଡ଼ିକର ଯତ୍ନ ନନିଆଯାଏ, ତେବେ ମୃତ୍ୟୁ ଆଶଙ୍କା ବୃଦ୍ଧି ପାଇଥାଏ । ଜୀବନଶୈଳୀରେ ପରିବର୍ତ୍ତନ ଏବଂ ଖାଦ୍ୟପେୟର ବିଶୃଙ୍ଖଳା ଏହାର ମୁଖ୍ୟ କାରଣ ଭାବରେ ବିବେଚନା କରାଯାଇଛି ।
ଗବେଷକମାନେ କୁହନ୍ତି, ଅଧିକ ଲୁଣ ବା ସୋଡିୟମର ସେବନ ଦ୍ୱାରା ରକ୍ତଚାପ ବୃଦ୍ଧି ପାଇଥାଏ ଏବଂ ଅଧିକ ଚିନି ସେବନ ମଧୁମେହ ଆଶଙ୍କା ସୃଷ୍ଟି କରେ । କିନ୍ତୁ ଆପଣ ଜାଣନ୍ତି କି ଅଧିକ ଚିନି ସେବନ ଉକ୍ତ ରକ୍ତଚାପର କାରଣ ସାଜିପାରେ? ଅନୁସନ୍ଧାନକାରୀମାନେ କହିଛନ୍ତି ଯେ ଚିନି କେବଳ ରକ୍ତରେ ଶର୍କରା ବୃଦ୍ଧି କରେ ନାହିଁ ବରଂ ରକ୍ତଚାପ ମଧ୍ୟ ବୃଦ୍ଧି ହେବାର ଆଶଙ୍କା ରହିଛି।
ସ୍ବାସ୍ଥ୍ୟ ପାଇଁ ହାନିକାରକ ଚିନି ଏବଂ ଲୁଣ: ନ୍ୟାସନାଲ ଲାଇବ୍ରେରୀ ଅଫ୍ ମେଡିସିନରେ ପ୍ରକାଶିତ ଏକ ରିପୋର୍ଟ ଅନୁଯାୟୀ, ଉଭୟ ଲୁଣ ଏବଂ ଚିନି ରକ୍ତଚାପ (ବିପି) ବୃଦ୍ଧି ସହିତ ଜଡିତ। ବିଭିନ୍ନ ଅଧ୍ୟୟନରେ କ୍ରମାଗତ ଭାବରେ ଦର୍ଶାଯାଇଛି ଯେ, ରକ୍ତଚାପ ବୃଦ୍ଧିରେ ଲୁଣ ଏକ ପ୍ରମୁଖ କାରଣ ଅଟେ। ଏହି ବିପଦକୁ ଧ୍ୟାନରେ ରଖି ଫିନଲ୍ୟାଣ୍ଡ ଏବଂ ବ୍ରିଟେନ ଭଳି ଦେଶ ଲୁଣର ମାତ୍ରା ହ୍ରାସ କରାଯାଇଥିଲା। କିନ୍ତୁ ଲୁଣ ହ୍ରାସ କରିବା ପର୍ଯ୍ୟାପ୍ତ ନୁହେଁ ବରଂ ଚିନି ମଧ୍ୟ ଏହାର କାରଣ ସାଜିପାରେ ବୋଲି ଅଧ୍ୟୟନରେ କୁହାଯାଇଛି।
ଅନୁସନ୍ଧାନକାରୀମାନେ ରିପୋର୍ଟ କରିଛନ୍ତି ଯେ, ଚିନି ଅଧିକ ମାତ୍ରାରେ ସେବନ କରିବା ଦ୍ବାରା ମେଦବହୁଳତା ଦେଖାଦେଇଥାଏ, ଯାହା ରକ୍ତଚାପ ବୃଦ୍ଧି କରିବାର ମୁଖ୍ୟ କାରଣ ଅଟେ। ସାମ୍ପ୍ରତିକ ଅଧ୍ୟୟନରୁ ଏହା ମଧ୍ୟ ଜଣାପଡିଛି ଯେ ଅଧିକ ମାତ୍ରାରେ ଚିନି, ବିଶେଷତଃ ମୃଦୁ ପାନୀୟର ବ୍ୟବହାର, ରକ୍ତଚାପ ଉପରେ ମଧ୍ୟ ସିଧାସଳଖ ପ୍ରଭାବ ପକାଇପାରେ।
