ହାଇଦ୍ରାବାଦ: ଅନୁସନ୍ଧାନକାରୀ, ସ୍ୱାସ୍ଥ୍ୟ ବିଶେଷଜ୍ଞ ଏବଂ ପୁଷ୍ଟିକର ବିଶେଷଜ୍ଞମାନେ ଗ୍ରୀନ୍ ଟି'ର ସ୍ୱାସ୍ଥ୍ୟ ଉପକାରିତାକୁ ପ୍ରୋତ୍ସାହିତ କରନ୍ତି । ନିୟମିତ ଭାବେ ଗ୍ରୀନ୍ ଟି' ପିଇବା ଦ୍ୱାରା ଓଜନ ହ୍ରାସ କରିବାରେ ସାହାଯ୍ୟ କରିବା ସହିତ ମଧୁମେହ, ହୃଦରୋଗ ଏବଂ କର୍କଟ ଭଳି ଅନେକ ରୋଗର ଆଶଙ୍କା ମଧ୍ୟ କମିଯାଏ ବୋଲି ପ୍ରମାଣ ରହିଛି । ଆଣ୍ଟିଅକ୍ସିଡାଣ୍ଟରେ ଥିବା ଗ୍ରୀନ୍ ଟି' ମସ୍ତିଷ୍କର କାର୍ଯ୍ୟରେ ଉନ୍ନତି ଆଣିବାରେ ସାହାଯ୍ୟ କରେ । ବର୍ତ୍ତମାନ, ଗ୍ରୀନ୍ ଟି'ର ଆଉ ଏକ ସ୍ବାସ୍ଥ୍ୟ ଉପକାରୀ ଗୁଣ ଚିହ୍ନଟ ହୋଇଛି ।
ନୂତନ ଅଧ୍ୟୟନ ଅନୁଯାୟୀ, ଗ୍ରୀନ୍ ଟି' ଆଲଜାଇମର (Alzheimer) ରୋଗୀଙ୍କ ଉପରେ ସକରାତ୍ମକ ପ୍ରଭାବ ପକାଇପାରେ( Drinking Green Tea Daily May Benefit People With Alzheimer's Disease) । ଆମେରିକାର ଟୁଫ୍ଟସ୍(Tufts) ୟୁନିଭରସିଟିର ଅନୁସନ୍ଧାନକାରୀଙ୍କ ଦ୍ବାରା କରାଯାଇଥିବା ଏକ ଅଧ୍ୟୟନରୁ ଜଣାପଡିଛି ଯେ, ପ୍ରତିଦିନ ଗ୍ରୀନ୍ ଟି' ଏବଂ କେବେ କେବେ ରେଡ୍ ୱାଇନ୍ ପିଇବା ଦ୍ବାରା ମସ୍ତିଷ୍କରେ ପ୍ଲେକ୍ ହ୍ରାସ କରିବାରେ ସାହାଯ୍ୟ କରିଥାଏ ।
ତେବେ ପ୍ଲେକ୍(plaque) ହେଉଛି ଶରୀରର ଏକ ଅଙ୍ଗ କିମ୍ବା ଏକ ଅଂଶର ଟିସୁରେ ଏକ ଛୋଟ ଅସ୍ୱାଭାବିକ ପ୍ୟାଚ୍ । ସେହିପରି ଅଲଜାଇମର ହେଉଛି ଏକ ମସ୍ତିଷ୍କ ରୋଗ, ଯେଉଁ କାରଣରୁ ମସ୍ତିଷ୍କ ସ୍ନାୟୁ ସଂକୋଚନ ହୋଇଯାଏ ଏବଂ ମସ୍ତିଷ୍କ କୋଷଗୁଡ଼ିକ ନଷ୍ଟ ହୋଇଯାଏ ।
ଆଲଜାଇମର ରୋଗରେ ଗ୍ରୀନ୍ ଟି' କିପରି ସାହାଯ୍ୟ କରେ ?
ଅନୁସନ୍ଧାନକାରୀମାନେ ଜାଣିବାକୁ ପାଇଛନ୍ତି ଯେ, ରେଡ୍ ୱାଇନ୍ ଏବଂ ଗ୍ରୀନ୍ ଟିରେ ମିଳୁଥିବା କ୍ୟାଟେଚିନ୍ ଏବଂ ରେସଭେରାଟ୍ରୋଲ୍ ନ୍ୟୁରୋ କୋଷଗୁଡ଼ିକରେ ପ୍ଲେକ୍ ଗଠନକୁ ହ୍ରାସ କରିଛି । ଅନ୍ୟ ତିନୋଟି ଯୌଗିକ କର୍କୁମିନ୍ (ହଳଦୀରୁ ମିଳିଥାଏ), ମେଟଫର୍ମିନ୍ (ଏକ ଡାଇବେଟିସ୍ ଔଷଧ) ଏବଂ ସାଇଟିକୋଲିନ୍ ମଧ୍ୟ ପ୍ଲେକ୍ ଗଠନକୁ ପ୍ରତିରୋଧ କରିଥିଲା । କ୍ୟାଟେଚିନ୍ର ଶକ୍ତିଶାଳୀ ଆଣ୍ଟିଅକ୍ସିଡାଣ୍ଟ ପ୍ରଭାବ ରହିଛି ଏବଂ ଏହାର ସମ୍ଭାବ୍ୟ କର୍କଟ ଚିକିତ୍ସା ଭାବରେ ଅଧ୍ୟୟନ କରାଯାଇଥିବାବେଳେ ଏହାର ଆଣ୍ଟି-ଏଜିଂ(ବାର୍ଦ୍ଧକ୍ୟ ରୋକିବା) ଗୁଣ ପାଇଁ ରିସଭେରାଟ୍ରୋଲ୍ ଅନୁସନ୍ଧାନ କରାଯାଉଛି ।
ଗ୍ରୀନ୍ ଟି'ର ଉପକାର:-
ଯଦି ଆପଣ ଜଣେ ମଧୁମେହ ରୋଗୀ, ତେବେ ଗ୍ରୀନ୍ ଟି' ଆପଣଙ୍କ ପାଇଁ ଏକ ସୁସ୍ଥ ପାନୀୟ । କାରଣ ଏଥିରେ କୌଣସି ପ୍ରକାରର ଶର୍କରା ନଥାଏ ଏବଂ କ୍ୟାଲୋରୀ ମଧ୍ୟ କମ୍ ଥାଏ । ଅଧ୍ୟୟନରୁ ଜଣାପଡିଛି ଯେ, ଗ୍ରୀନ୍ ଟି ନିୟମିତ ପିଇବା ଉପବାସ ସମୟରେ ରକ୍ତରେ ଗ୍ଲୁକୋଜ୍ ଏବଂ ଉପବାସରେ ଇନସୁଲିନ୍ ସ୍ତରକୁ ଯଥେଷ୍ଟ କମ କରିବାରେ ସାହାଯ୍ୟ କରିଥାଏ ।
ଅନୁସନ୍ଧାନକାରୀମାନେ ବିଶ୍ବାସ କରନ୍ତି ଯେ, ଗ୍ରୀନ୍ ଟି ପତ୍ରରେ ମିଳୁଥିବା କ୍ୟାଟେଚିନ୍ ଆଲଜାଇମର ରୋଗରେ ପୀଡିତ ଲୋକଙ୍କ ପାଇଁ ଲାଭଦାୟକ ହୋଇପାରେ । ଗ୍ରୀନ୍ ଟିକୁ ନିୟମିତ ସେବନ କରିବା ଦ୍ୱାରା ହୃଦରୋଗ ଏବଂ ଷ୍ଟ୍ରୋକ୍ ହେବାର ଆଶଙ୍କା କମିଯାଏ । ଏଥିରେ ଏକ ସୁସ୍ଥ ପରିମାଣର କଫିନ୍ ଥାଏ, ଯାହା ମସ୍ତିଷ୍କର କାର୍ଯ୍ୟକୁ ବୃଦ୍ଧି କରିବାରେ ସାହାଯ୍ୟ କରିଥାଏ ।
ଗ୍ରୀନ୍ ଟି'ର ପାର୍ଶ୍ୱ ପ୍ରତିକ୍ରିୟା:-
ଗବେଷଣା ଗ୍ରୀନ୍ ଟି ପିଇବାର କୌଣସି ଗମ୍ଭୀର ପାର୍ଶ୍ୱ ପ୍ରତିକ୍ରିୟା ପାଇନାହିଁ । ତଥାପି, କେତେକ ଅଧ୍ୟୟନରୁ ଜଣାପଡିଛି ଯେ, କ୍ୟାଟେଚିନ୍ ପଶୁମାନଙ୍କ ଯକୃତରେ ଏନଜାଇମ୍ ବୃଦ୍ଧି କରିପାରନ୍ତି । ଗ୍ରୀନ୍ ଟିରେ ମିଳୁଥିବା ଅକ୍ସାଲେଟ୍ କିଡନୀ ଷ୍ଟୋନ୍ ସହିତ ସଞ୍ଜୁକ୍ତ । ତେଣୁ ଏହାର ଲାଭରୁ ଅଧିକ ଲାଭ ପାଇବା ଏବଂ ପାର୍ଶ୍ୱ ପ୍ରତିକ୍ରିୟାରୁ ଦୂରେଇ ରହିବା ପାଇଁ ବିଶେଷଜ୍ଞମାନେ ଗ୍ରୀନ୍ ଟିକୁ ଦିନରେ ପାଞ୍ଚ କପ୍ କିମ୍ବା ତା’ଠାରୁ କମ୍ ସେବନ ପାଇଁ ପରାମର୍ଶ ଦେଇଛନ୍ତି ।
ପ୍ରତ୍ୟାଖ୍ୟାନ: ଏହି ଆର୍ଟିକିଲରେ ଉଲ୍ଲେଖ କରାଯାଇଥିବା ପରାମର୍ଶ ଏବଂ ସୂଚନା କେବଳ ସାଧାରଣ ସୂଚନା ଉଦ୍ଦେଶ୍ୟ ପାଇଁ । ବିଶେଷ ଶାରୀରିକ ସମସ୍ୟା ଥିଲେ ନିଶ୍ଚିତ ରୂପେ ଡାକ୍ତରଙ୍କ ପରାମର୍ଶ ଗ୍ରହଣୀୟ ।
