ହାଇଦ୍ରାବାଦ: କୋରୋନା, ଓମିକ୍ରନ୍, ଇନଫ୍ଲୁଏଞ୍ଜା ସଂକ୍ରମଣ ମଧ୍ୟରେ ଆଉ ଏକ ଘାତକ ଭୂତାଣୁ ଚିନ୍ତା ବଢାଇଲାଣି । ଇଂଲଣ୍ଡରେ ଟିକ୍ ଭାଇରସ୍ ନାମକ ଏକ ଭୂତାଣୁ ସଂକ୍ରମିତ କରୁଥିବା ଜଣାପଡିଛି । ବ୍ରିଟେନର ସ୍ୱାସ୍ଥ୍ୟ ସୁରକ୍ଷା ଏଜେନ୍ସିର ଏକ ସରକାରୀ ବିବୃତ୍ତି ଅନୁଯାୟୀ, 2019 ପରଠାରୁ ଇଂଲଣ୍ଡରେ ସମ୍ଭାବ୍ୟ କିମ୍ବା ନିଶ୍ଚିତ ଟିକ୍-ବୋର୍ଣ୍ଣ ଏନସେଫାଲାଇଟିସ୍ ଭାଇରସ୍(TBEV) ରିପୋର୍ଟ ହୋଇଛି । ଏହି ଭୂତାଣୁ ପୂର୍ବରୁ ହାମ୍ପସାୟର୍ ଏବଂ ଡୋରସେଟ୍ ଏବଂ ନର୍ଫାଲ୍କ ଏବଂ ସଫୋଲ୍କ ସୀମାନ୍ତ ଅଞ୍ଚଳରେ ମଧ୍ୟ ଚିହ୍ନଟ ହୋଇଥିଲା । ଏହା ଅନ୍ୟ ସ୍ଥାନକୁ ସଂକ୍ରମିତ ହେବାର ସମ୍ଭାବନା ରହିଛି, ତେଣୁ ସତର୍କ ରହିବାକୁ ପରାମର୍ଶ ଦେଇଛନ୍ତି ବ୍ରିଟେନ ସ୍ବାସ୍ଥ୍ୟ ବିଭାଗ ।
TBEV ଏକ ଭୂତାଣୁ ଜନିତ ରୋଗ । ଏହା ଫ୍ଲାଭିଭିରିଡା ପରିବାରର ସବ୍-ଭାରିଆଣ୍ଟ । ବିଶ୍ବ ସ୍ବାସ୍ଥ୍ୟ ସଂଗଠନ ଅନୁଯାୟୀ, ପୂର୍ବ, ମଧ୍ୟ, ଉତ୍ତର ଏବଂ ପାଶ୍ଚାତ୍ୟ ଦେଶମାନଙ୍କରେ ପ୍ରତିବର୍ଷ ପ୍ରାୟ 10,000ରୁ 12,000 ଟିକ୍-ବୋର୍ଣ୍ଣ ଏନସେଫାଲାଇଟିସ୍ ଆକ୍ରାନ୍ତ ଚିହ୍ନଟ ହୋଇଥାନ୍ତି । ୟୁରୋପୀୟ ଦେଶ ତଥା ଉତ୍ତର ଚୀନ୍, ମୋଙ୍ଗୋଲିଆ ଏବଂ ଋଷ ଫେଡେରେଶନରେ ଟିକ୍ରେ ଅଧିକ ଲୋକେ ସଂକ୍ରମିତ ହେଉଛନ୍ତି ।
ଏହା ମଧ୍ୟ ପଢନ୍ତୁ:- Influenza Vs Omicron: ସବୁଠୁ ମାରାତ୍ମକ କିଏ ? ଇନଫ୍ଲୁଏଞ୍ଜା ନା ଓମିକ୍ରନ୍, ଜାଣନ୍ତୁ
ଲକ୍ଷଣ
ଏହି ଜୀବାଣୁ ବାହକ ହେଉଛି ଟିକ୍ସ । ପଶୁମାନଙ୍କ ଶରୀରରେ ରହୁଥିବା ଏକ ପୋକ ହେଉଛି ଟିକ୍ । ଏହି ରୋଗ ହେଲେ ସାମାନ୍ୟ ଫ୍ଲୁ ସହ ମେନିଞ୍ଜାଇଟିସ୍ କିମ୍ବା ଏନସେଫାଲାଇଟିସ୍ ଭଳି ସମସ୍ୟା ହୋଇପାରେ । ଏହା ସାଙ୍ଗକୁ ଉଚ୍ଚ ଜ୍ୱର ମୁଣ୍ଡବିନ୍ଧା, ଗଳା ଯନ୍ତ୍ରଣା ଏବଂ ବାନ୍ତି । ଯଦି ପ୍ରବଳ ମୁଣ୍ଡବିନ୍ଧା ଏବଂ ନେକ୍ ପେନ୍(ଗଳା ଯନ୍ତ୍ରଣା) ହେଉଛି, ତେବେ ତୁରନ୍ତ ଡାକ୍ତରଖାନା ଯାଆନ୍ତୁ । ଉଜ୍ଜ୍ୱଳ ଆଲୋକ ଦେଖିବା ସମୟରେ ଯନ୍ତ୍ରଣା ମଧ୍ୟ ଏହି ରୋଗର ଏକ ମୁଖ୍ୟ ଲକ୍ଷଣ । ସ୍ନାୟୁ ସମ୍ବନ୍ଧୀୟ ସମସ୍ୟା ଯେପରିକି ଏପିଲିପଟିକ୍ ଆକ୍ରାନ୍ତ, ଆକସ୍ମିକ ଦ୍ୱନ୍ଦ୍ୱ କିମ୍ବା ଆଚରଣରେ ପରିବର୍ତ୍ତନ, ଦୁର୍ବଳତା, ଦୃଷ୍ଟି ଶକ୍ତି ସମସ୍ୟା ଏବଂ କଣ୍ଠସ୍ବରରେ ପରିବର୍ତ୍ତନ ଟିକ୍ ଭାଇରସ୍ ଲକ୍ଷଣ ହୋଇପାରେ ।
ଚିକିତ୍ସା
ଟିକ୍ ଭାଇରସ୍ରୁ ରକ୍ଷା ପାଇବାକୁ ହେଲେ ପାଦଠୁ ମୁଣ୍ଡ ପର୍ଯ୍ୟନ୍ତ ଘୋଡାଇ ରଖିବାକୁ ପଡିବ । ଲମ୍ବା ପ୍ୟାଣ୍ଟ ଏବଂ ବନ୍ଦ ଜୋତା ପରି ଉପଯୁକ୍ତ ପୋଷାକ ପିନ୍ଧି ଟିକ୍ ଏନସେଫାଲାଇଟିସ୍କୁ ଏଡାଯାଇପାରିବ । କୌଣସି ପ୍ରକ୍ରିୟାକୃତ ଦୁଗ୍ଧଜାତ ଦ୍ରବ୍ୟ ଖାଆନ୍ତୁ ନାହିଁ । ଏହି ସଂକ୍ରମଣକୁ ଏଡାଇବା ପାଇଁ ଟିକା ପ୍ରସ୍ତୁତ ହୋଇଛି । ଟିକା ନେବାର ବନ୍ଦୋବସ୍ତ କରନ୍ତୁ ।
