ରାଉରକେଲା : ସମ୍ପର୍କରେ ଲାଗିଲା ରକ୍ତର ଛିଟା । ଭାଇ ଭୁଲିଗଲା ଭାଇ ଭାଇର ସମ୍ପର୍କ । ଘରୋଇ କଳିକୁ ନେଇ ଭାଇ ଘଟାଇଲା ଜଘନ୍ୟ କାଣ୍ଡ । ପାରିବାରିକ କଳହ ନେଲା ହତ୍ୟା ଉଦ୍ୟମର ରୂପ । ସାମାନ୍ୟ କଳହକୁ ନେଇ ବଡ଼ ଭାଇ ଉପରକୁ ଗୁଳି ଚଳାଇବାକୁ ପଛାଇଲା ନାହିଁ ସାନ ଭାଇ । ସେପଟେ ସାନ ଭାଇର ଗୁଳି ମାଡ଼ରେ ବଡ଼ ଭାଇ ଜଣଙ୍କ ଗୁରୁତର ଭାବରେ ଆହତ ହେବା ସହ ବର୍ତ୍ତମାନ ତାଙ୍କର ଚିକିତ୍ସା ଚାଲିଛି । ତେବେ ଏଭଳି ଏକ ନିନ୍ଦନୀୟ ଘଟଣା ଦେଖିବାକୁ ମିଳିଛି ସୁନ୍ଦରଗଡ଼ ଜିଲ୍ଲା କିଞ୍ଜିରକେଲା ଥାନା ଅଞ୍ଚଳରେ ।
ସୂଚନା ଅନୁସାରେ, ସୁନ୍ଦରଗଡ଼ ଜିଲ୍ଲା କିଞ୍ଜିରକେଲା ଥାନା ଅନ୍ତର୍ଗତ ପାତକିଯୋର ଗାଁର ଦାଣ୍ଡପାଣି ସାହିରେ ବସବାସ କରୁଥିବା ସାନ ଭାଇ ସୁନିଲ ସା ଓ ବଡ଼ଭାଇ ବାସୁଦେବ ସାଙ୍କ ମଧ୍ୟରେ ଘରୋଇ କଳହକୁ ନେଇ ବାରମ୍ବାର ଝଗଡ଼ା ଲାଗୁଥିଲା । ବହୁ ପୂର୍ବରୁ ଦୁଇ ଭାଇଙ୍କ ମଧ୍ୟରେ ଝଗଡା ଏବଂ କଳହ ଲାଗି ରହିଥିଲା । ତେବେ ଗତକାଲି ରାତିରେ ପୂର୍ବ ଭଳି ଦୁଇ ଭାଇଙ୍କ ମଧ୍ୟରେ ଯୋରଦାର ଝଗଡ଼ା ଲାଗିଥିଲା । ତେବେ ଦୁହିଁଙ୍କ ମଧ୍ୟରେ ଯୁକ୍ତିତର୍କ ଏତେ ବଢି ଗଲା ଯେ, ଏଥିରେ ଉତ୍କ୍ଷିପ୍ତ ହୋଇ ସାନ ଭାଇ ସୁନିଲ ଘରେ ଥିବା ଏକ ପକ୍ଷୀ ମରା ବନ୍ଧୁକ ଆଣି ଭଡ଼ ଭାଇ ବାସୁଦେବଙ୍କୁ ଉପରକୁ ଗୁଳି ଚଳାଇଥିଲା । ଫଳରେ ବାସୁଦେବ ଗୁରୁତର ଆହତ ହୋଇଥିଲେ । ପ୍ରଥମେ ତାଙ୍କୁ କିଞ୍ଜିରକେଲା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା । ହେଲା ସେଠାରେ ତାଙ୍କ ସ୍ବସ୍ଥ୍ୟବସ୍ଥା ଜଟିଳ ଥିବାରୁ ପରେ ତାଙ୍କୁ ସୁନ୍ଦରଗଡ଼ ମୁଖ୍ୟ ଚିକିତ୍ସାଳୟକୁ ବିଶେଷ ଚିକିତ୍ସା ପାଇଁ ସ୍ଥାନାନ୍ତର କରାଯାଇଥିଲା । ଏବେ ତାଙ୍କ ସ୍ବସ୍ଥ୍ୟ ଅବସ୍ଥା ସ୍ଥିର ରହିଥିବାର ଡାକ୍ତରଖାନା ସୂତ୍ରରୁ ଜଣାପଡ଼ିଛି ।
ଏହା ମଧ୍ୟ ପଢ଼ନ୍ତୁ.....ବଡ଼ ଭାଇ ଚୋଟରେ ସାନ ଭାଇର ମୃତ୍ୟୁ, ଅଭିଯୁକ୍ତର ଆତ୍ମ ସମର୍ପଣ
ସେପଟେ ଏଭଳି ଜଘନ୍ୟ କାଣ୍ଡ ଘଟାଇ ସାନ ଭାଇ ଜଣକ ଘଟଣା ସ୍ଥଳରୁ ଫେରାର ହେବାକୁ ଉଦ୍ୟମ କରୁଥିବା ବେଳେ ଗାଁ ଲୋକେ ସୁନୀଲକୁ କାବୁ କରି ନିସ୍ତୁକ ମାଡ ମାରିବା ସହ ତାକୁ ଡାକ୍ତରଖାନାରେ ଭର୍ତ୍ତି କରିଥିବା ଖବର ମିଳିଛି । ଏନେଇ ସ୍ଥାନୀୟ ଲୋକ କିଞ୍ଜିରକେଲା ଥାନାକୁ ଖବର ହେଇଥିଲା । କିଞ୍ଜିରକେଲା ଥାନା ପୋଲିସ ଘଟଣା ସ୍ଥଳରେ ପହଞ୍ଚି ଏକ ମାମଲା ରୁଜୁ କରିବା ସହ ଏନେଇ ଅଧିକ ତଦନ୍ତ ଚଲାଇଛି । ତେବେ କଳହର ମୂଳ କାରଣ ଏବଂ ହତ୍ୟା ଉଦ୍ୟମର ମୂଳ କାରଣ ଜାଣିବାକୁ ଚେଷ୍ଟା କରୁଛି ବୋଲି ପୋଲିସ ସୂଚନା ଦେଇଛି । ବର୍ତ୍ତମାନ ସାନ ଭାଇ ସୁନିଲକୁ ପୋଲିସ ଅଟକ ରଖିଛି ।
ଇଟିଭି ଭାରତ, ସୁନ୍ଦରଗଡ଼
