ସୁନ୍ଦରଗଡ଼: ବୀରମିତ୍ରପୁର ଥାନା ଅନ୍ତର୍ଗତ ତଲସେରା ଡାଏରଡାଣ୍ଡ୍ ବସ୍ତିରେ ଗତକାଲି ବିଳମ୍ବିତ ରାତିରେ ସ୍ତ୍ରୀର ଟାଙ୍ଗିଆ ଚୋଟରେ ସ୍ଵାମୀ ଗୁରୁତର ହୋଇଥିବା ଘଟଣା ସାମ୍ନାକୁ ଆସିଛି । ସ୍ୱାମୀର ପରକୀୟା ପ୍ରିତୀକୁ କେନ୍ଦ୍ର କରି ଏହି ଘଟଣା ଘଟିଥିବା ସୂଚନା ମିଳିଛି । ନିଜ ସ୍ତ୍ରୀ ଓ ପିଲାଙ୍କ ସମ୍ମୁଖରେ ଅନ୍ୟ ଏକ ନାରୀ ସହ ସହବାସ କରିବାକୁ କେନ୍ଦ୍ର କରି ବିବାହିତ ସ୍ତ୍ରୀ ଅନିତା ସାହୁ ଉତକ୍ଷିପ୍ତ ହୋଇ ଏକ ଟାଙ୍ଗିଆରେ ଚୋଟ ପକାଇଥିଲା । ପରେ ତାଙ୍କ ସ୍ୱାମୀ (ଶ୍ୟାମ ସୁନ୍ଦର ସାହୁ)କୁ ଗରୁତର ହୋଇଥିବା ଜଣାପଡିଛି ।
ଶ୍ୟାମ ସୁନ୍ଦରକୁ ଗୁରୁତର ଅବସ୍ଥାରେ ପରିବାର ଲୋକେ ପ୍ରଥମେ ବୀରମିତ୍ରପୁର ସରକାରୀ ଚିକିତ୍ସାଳୟରେ ଭର୍ତ୍ତି କରିଥିଲେ । ହେଲେ ତାଙ୍କ ଅବସ୍ଥା ଗୁରୁତର ହେବାରୁ ତାଙ୍କୁ ଆରଜିଏଚକୁ ସ୍ଥାନାନ୍ତରିତ କରାଯାଇଥିଲା । ତେବେ ସେଠାରେ ମଧ୍ୟ ତାଙ୍କ ଅବସ୍ଥାରେ ସୁଧାର ନଆସିବାରୁ ତାଙ୍କୁ ଆଜି ବୁର୍ଲା ମେଡିକାଲକୁ ସ୍ଥାନାନ୍ତରିତ କରାଯାଇଛି l ଶ୍ୟାମ ସୁନ୍ଦର ବୁର୍ଲାରେ ମୃତ୍ୟୁ ସହ ସଂଗ୍ରାମ କରୁଥିବା ବେଳେ ତାଙ୍କ ବିବାହିତ ସ୍ତ୍ରୀ ଅନିତା ସାହୁ ଏବେ ବୀରମିତ୍ରପୁର ଥାନାରେ ଅଟକ ରହିଛନ୍ତି । ଗତକାଲି ରାତିରେ ଏହି ଘଟଣା ଘଟିଥିଲା ବେଳେ ପୋଲିସକୁ ଆଜି ସୂଚନା ମିଳିଥିଲା । ବୀରମିତ୍ରପୁର ପୋଲିସ ଓ ସାଇଣ୍ଟିଫିକ୍ ଦଳ ଘଟଣାସ୍ଥଳକୁ ଯାଇ ବ୍ୟବହୃତ ଟାଙ୍ଗିଆକୁ ଜବତ କରିବା ସହ ସମସ୍ତ ଦିଗରୁ ଅନୁସନ୍ଧାନ ଜାରି ରଖିଛି ।
ସୁନ୍ଦରଗଡରୁ ହରିହର ଦାସ ମହାପାତ୍ର, ଇଟିଭି ଭାରତ
