ରାଉରକେଲା: ସ୍ମାର୍ଟ ସିଟି ଘୋଷଣା ହୋଇଥିବା ରାଉରକେଲା ସହରର ମଡେଲ ରେଳ ଷ୍ଟେସନରୁ ପ୍ରିପେଡ ଆଟୋ କିମ୍ବା ଟ୍ୟାକ୍ସି ସେବା ସୁବିଧା ହଟାଇ ଦିଆଯାଇଛି । ଏଥିପାଇଁ ନୂଆ ଲୋକ ଆସିଲେ ଠକାମିର ଶିକାର ହେଉଥିବା ବେଳେ ଅସୁରକ୍ଷିତ ମଧ୍ୟ ରହୁଛନ୍ତି ।
ରାଉରକେଲା ରେଳ ଷ୍ଟେସନରେ ପ୍ରବେଶ ତଥା ବାହାରିବା ପାଇଁ ଦୁଇଟି ରାସ୍ତା ତିଆରି କରା ଯାଇଛି । କିନ୍ତୁ ଗୋଟିଏ ରାସ୍ତା ଦେଇ ଗାଡି ଯିବାଆସିବା କରିବା ଯୋଗୁଁ ସବୁ ସମୟରେ ଜାମ ଲାଗି ରହିବା ସହ ଦୁର୍ଘଟଣାର ସମ୍ବାବନା ରହୁଛି । ଅନ୍ୟପଟେ ଷ୍ଟେସନର ଦ୍ଵିତୀୟ ପ୍ରବେଶ ଦ୍ୱାରରେ କୌଣସି ସୁରକ୍ଷା ବ୍ୟବସ୍ଥା ନାହିଁ । ଏଥିପାଇଁ ଦ୍ଵିତୀୟ ପ୍ରବେଶ ଦ୍ୱାର ଦେଇ ଯିବା ଆସିବା କରୁଥିବା ଲୋକଙ୍କ ସଂଖ୍ୟା ବହୁତ କମ ।
ଦ୍ଵିତୀୟ ପ୍ରବେଶ ଦ୍ୱାରର ରାସ୍ତା ମଧ୍ୟ ଭଲ ନଥିବା ବେଳେ ରେଳ ବିଭାଗ ତଥା ରାଜ୍ୟ ସରକାର ମଧ୍ୟରେ ବିବାଦ ଯୋଗୁଁ ରେଳ କଲୋନୀ ଅଞ୍ଚଳରେ ରାସ୍ତା 4 ଲେନ ହୋଇ ପାରି ନାହିଁ । ରେଳରାସ୍ତା ପିଡବ୍ଲୁଡି କରଥିବାରୁ ରାଜ୍ୟସରକାର ଏଥିପାଇଁ ଧ୍ୟାନ ଦେବା କଥା ବୋଲି ପୁର୍ବତନ ନଗରପାଳ ନିହାର ରାୟ କହିଛନ୍ତି । ଅନ୍ୟପକ୍ଷରେ ଟ୍ରାଫିକ ବ୍ୟବସ୍ଥା ଠିକ କରିବା ପାଇଁ ପ୍ରୟାସ ଜାରି ରହିଥିବା ବେଳେ ଦ୍ଵିତୀୟ ପ୍ରବେଶ ଦ୍ୱାରର ସୁରକ୍ଷା ପାଇଁ 24 ଟି ସିସିଟିଭି ଲଗାଇବା ପ୍ରସ୍ତାବ ଦିଆଯାଇଥିବା ରେଳ ଏସପି ଏକେ ସ୍ୱାଇଁ କହିଛନ୍ତି ।
ରାଉରକେଲାରୁ ରାଜେନ୍ଦ୍ରନାଥ ମିଶ୍ର, ଇଟିଭି ଭାରତ
