ରାଉରକେଲା: ରାଉରକେଲା ସହରରେ ଖୋଲିଛି ଆମ୍ବ ପସରା । ଆମ୍ବ ପ୍ରେମୀଙ୍କ ପାଇଁ ଓଡିଶା ସରକାର ଓ ଓରମାସର ମିଳିତ ଆନୁକୂଲ୍ୟରେ ଆମ୍ବ ମେଳାର ଆୟୋଜନ ହୋଇଛି । ଭଳିକି ଭଳି ଆମ୍ବ ଯେପରିକି ଆମ୍ରପାଲି, ବାଇଗଣପଲ୍ଲୀ, ଲଙ୍ଗଡା, ଦଶେରା, ଚୌସା, ହିମସାଗର, ଏବଂ ତୋତାପୁରୀ ଭଳି ବିଭିନ୍ନ ପ୍ରକାର ଆମ୍ବ ଏଠାରେ ବିକ୍ରି ହେଉଛି । ଏହି ଆମ୍ବ ମେଳା ଗତ ୬ ତାରିଖରୁ ଆରମ୍ଭ ହୋଇଥିବା ବେଳେ ଆସନ୍ତା ୧୫ତାରିଖ ଯାଏଁ ଖୋଲା ରହିବ । ତେବେ ଜିଲ୍ଲାର ଗ୍ରାହକଙ୍କ ଦୃଷ୍ଟି ଆକର୍ଷଣ କରିଛି ଏହି ଆମ୍ବ ମେଳା । ତେବେ ଏହି ମେଳାର ମୁଖ୍ୟ ଲକ୍ଷ୍ୟ ହେଉଛି ଗାଁ ଗଣ୍ଡାରେ ଥିବା ବଗିଚାରେ ଫଳିଥିବା ଆମ୍ବକୁ ଉପଯୁକ୍ତ ବଜାର ଯୋଗାଇବା ।
ସୁନ୍ଦରଗଡ଼ ଜିଲ୍ଲାର ଗ୍ରାମବାସୀମାନେ ଆମ୍ବ ମେଳାରେ ସକ୍ରିୟ ଭାବେ ଅଂଶଗ୍ରହଣ କରି ନିଜର ସ୍ଥାନୀୟ ଚାଷ ହୋଇଥିବା ଆମ୍ବକୁ ଗର୍ବର ସହ ପ୍ରଦର୍ଶନ କରିଛନ୍ତି । ସ୍ୱୟଂସହାୟକ ଗୋଷ୍ଠୀର ସଦସ୍ୟଙ୍କ ସହ କ୍ଷୁଦ୍ର ଚାଷୀମାନେ ସେମାନଙ୍କ ଜୈବିକ ଉତ୍ପାଦର ପ୍ରଦର୍ଶନ ପାଇଁ ଷ୍ଟଲ ସ୍ଥାପନ କରିଛନ୍ତି । ଏହି ମେଳା ସେମାନଙ୍କୁ କେବଳ ଆମ୍ବ ବିକ୍ରି କରିବା ପାଇଁ ଏକ ବଜାର ଯୋଗାଇ ଦେଉନାହିଁ ବରଂ ବିଶେଷଜ୍ଞ ଏବଂ ସାଥୀ କୃଷକମାନଙ୍କ ସହିତ ଆଲୋଚନା ମାଧ୍ୟମରେ ଆଧୁନିକ କୃଷି ଜ୍ଞାନକୌଶଳର ପ୍ରଦର୍ଶନ ମଧ୍ୟ କରିଛି । ମୟୂରଭଞ୍ଜ, ବଲାଙ୍ଗୀର ଏବଂ ରାୟଗଡ଼ା ଭଳି ପଡ଼ୋଶୀ ଜିଲ୍ଲାର କୃଷକମାନଙ୍କୁ ଏହି ଆମ୍ବ ମେଳା ଆକର୍ଷିତ କରିଛି । ସେମାନଙ୍କର ଅନନ୍ୟ ଆମ୍ବ କିସମକୁ ଦର୍ଶକଙ୍କ ସହ ବାଣ୍ଟିବା ପାଇଁ ସେମାନେ ଦୂରଦୂରାନ୍ତରେ ଯାତ୍ରା କରିଛନ୍ତି । ବିଭିନ୍ନ ଅଞ୍ଚଳର କୃଷକମାନଙ୍କ ମଧ୍ୟରେ ଜ୍ଞାନ ଓ ବିଶେଷଜ୍ଞତାର ଏହି ଆଦାନ ପ୍ରଦାନ ଦ୍ୱାରା ଗୋଷ୍ଠୀଗତ ଭାବନା ବୃଦ୍ଧି ପାଇଥାଏ ଏବଂ ଓଡ଼ିଶାର କୃଷି କ୍ଷେତ୍ରର ଅଭିବୃଦ୍ଧିକୁ ପ୍ରୋତ୍ସାହନ ମିଳିଥାଏ ।
ଏହା ମଧ୍ୟ ପଢନ୍ତୁ- ବଜାରରେ ସ୍ଥାନୀୟ ଆମ୍ବର ରାଜ, ଗାଁ ଆମ୍ବ ପସରାର ନୂଆ ପରିକଳ୍ପନା
ତେବେ ଓଡ଼ିଶା ସରକାର ଓ ଓରମାସ ମଧ୍ୟରେ ହୋଇଥିବା ଏହି ସହଯୋଗ ଗ୍ରାମାଞ୍ଚଳ ବିକାଶ ଓ ସ୍ଥାୟୀ କୃଷି ଉପରେ ଗୁରୁତ୍ୱାରୋପ କରୁଛି । ସ୍ଥାନୀୟ ଚାଷୀଙ୍କୁ ସହଯୋଗ କରିବା ସହ ସେମାନଙ୍କ ଉତ୍ପାଦିତ ଦ୍ରବ୍ୟକୁ ପ୍ରୋତ୍ସାହନ ଦେଇ ଆମ୍ବ ମେଳା ତୃଣମୂଳ ସ୍ତରରେ ଆର୍ଥିକ ଅଭିବୃଦ୍ଧିକୁ ପ୍ରୋତ୍ସାହିତ କରିଥାଏ । ଏହା ଜୈବିକ କୃଷି ପ୍ରଣାଳୀର ମହତ୍ୱ ଏବଂ ପାରମ୍ପରିକ କୃଷି ଜ୍ଞାନର ସଂରକ୍ଷଣ ବିଷୟରେ ସଚେତନତାକୁ ପ୍ରୋତ୍ସାହିତ କରିଥାଏ ।
ଇଟିଭି ଭାରତ, ରାଉରକେଲା
