ସୁନ୍ଦରଗଡ଼: ମୁଖ୍ୟମନ୍ତ୍ରୀଙ୍କ ଆଉ ଏକ ଐତିହାସିକ ପଦକ୍ଷେପ । ସୁନ୍ଦରଗଡ଼ରେ ତିନୋଟି ପ୍ରକଳ୍ପ ପାଇଁ 1279 କୋଟି ଟଙ୍କା ମଞ୍ଜୁର କଲେ ନବୀନ । ଏହି ପ୍ରକଳ୍ପରେ 2ଟି ମେଗା ପାନୀୟ ଜଳ ଯୋଗାଣ ପ୍ରକଳ୍ପ ଓ ଗୋଟିଏ ରାସ୍ତା ସ୍ଥାନିତ ରହିଛି । ସୁନ୍ଦରଗଡ ଜିଲ୍ଲାର ପ୍ରତ୍ୟେକ ପରିବାରଙ୍କୁ ବିଶୁଦ୍ଧ ପାନୀୟ ଜଳ ଯୋଗାଇବା ନେଇ ମୁଖ୍ୟମନ୍ତ୍ରୀ ଦୁଇଟି ପାନୀୟ ଜଳ ପ୍ରକଳ୍ପ ପାଇଁ ଟଙ୍କା ମଞ୍ଜୁର କରିଥିବା କଥା ଗତକାଲି(ଶନିବାର) ଏକ ସାମ୍ବାଦିକ ସମ୍ମିଳନୀରେ ଖଣି, ଇସ୍ପାତ ଓ ପୂର୍ତ୍ତ ବିଭାଗ ମନ୍ତ୍ରୀ ସୂଚନା ଦେଇଛନ୍ତି ।
ଏହାସହ ସୁନ୍ଦରଗଡ ଜିଲ୍ଲାରୁ ରାୟଗଡ ( ଛିତିଶଗଡ)କୁ ସଂଯୋଗ କରୁଥିବା ଟପରିଆ (ସୁନ୍ଦରଗଡ) – ରାୟଗଡ(ଛତିଶଗଡ) (22 କିଲୋମିଟର ) ଦୁଇ ଲେନ ରାସ୍ତା ପାଇଁ 103 କୋଟି ଟଙ୍କା ମଞ୍ଜୁର ହୋଇଥିବା କହିଛନ୍ତି । ତେବେ ଏହି ରାସ୍ତା 24 ମାସ ଭିତରେ ପୂର୍ଣ୍ଣାଙ୍ଗ ରୂପ ନେବ ବୋଲି ମନ୍ତ୍ରୀ କହିଛନ୍ତି ।
ସେହିପରି 2ଟି ପାନୀୟ ଜଳ ପ୍ରକଳ୍ପ ପାଇଁ ଯଥାକ୍ରମେ 389 କୋଟି ଓ 787 କୋଟି ଟଙ୍କା ବ୍ୟୟ ଅଟକଳ ଲକ୍ଷ୍ୟ ରଖାଯାଇଛି । 389 କୋଟି ଟଙ୍କାର ଏହି ପ୍ରକଳ୍ପ OMBADC ଦ୍ୱାରା କରାଯିବ ଓ ଏହା ଦ୍ୱାରା ସୁନ୍ଦରଗଡ ଜିଲ୍ଲାର ବିଶ୍ରା, ଲାଠିକଟା, ଲହୁଣିପଡା ଓ ବଣାଇଁ ବ୍ଲକର 49ଟି ଗ୍ରାମପଞ୍ଚାୟତର 295 ଟି ଗ୍ରାମର 2 ଲକ୍ଷ 59 ହଜାର 617 ଜଣ ଲୋକ ଉପକୃତ ହେବେ। ସେହିପରି 787 କୋଟି ଟଙ୍କାର ପାନୀୟ ଜଳ ପ୍ରକଳ୍ପଟି OMBADC ଓ DMF ଯୋଜନାରେ ହେବ ।
ଏହି ଯୋଜନାରେ ବଲିଶଙ୍କରା,ଲେଫ୍ରିପଡା,ଟାଙ୍ଗରପାଲି , ସୁନ୍ଦରଗଡ ( ସଦର ),ବଡଗାଁ ଓ ସବଡେଗା ବ୍ଲକର 84 ଟି ଗ୍ରାମପଞ୍ଚାୟତର 421ଟି ଗ୍ରାମର 3 ଲକ୍ଷ 78 ହଜାର 790 ଜଣ ଲୋକ ଉପକୃତ ହେବେ ବୋଲି ଉଭୟ ମନ୍ତ୍ରୀ ଓ ରାଉରକେଲା ବିଧାୟକ କହିଛନ୍ତି ।
ରାସ୍ତା ଯୋଜନାରେ ସୁନ୍ଦରଗଡ ଜିଲ୍ଲାର ଡୁଡୁକା-ଗୋପାଳପୁର-ଟପରିଆ ରାସ୍ତାର 06/206 K.M ଠାରୁ 28/564 K.M ପର୍ଯ୍ୟନ୍ତ ରାସ୍ତାକୁ 2 ଥାକିଆ ରାସ୍ତାରେ ପରିଣତ କରିବାକୁ ନିଷ୍ପତ୍ତି ନିଆଯାଇଛି । ଏବଂ ଏହି ରାସ୍ତକୁ ପୂର୍ଣ୍ଣାଙ୍ଗ ରୂପ ଦେବାପାଇଁ 24 ମାସର ସମୟ ଧାର୍ଯ୍ୟ କରାଯାଇଛି । ଏହି ରାସ୍ତା ହେଲେ ଉକ୍ତ ଅଞ୍ଚଳରେ ଉପୁଜୁଥିବା ଟ୍ରାଫିକ ସମସ୍ୟା ଦୂର ହୋଇଯିବ ବୋଲି ମନ୍ତ୍ରୀ କହିଛନ୍ତି । ତେବେ ଏହି ଘୋଷଣା ପରେ ଇସ୍ପାତ ଓ ପୂର୍ତ୍ତ ମନ୍ତ୍ରୀ ଏବଂ ରାଉରକେଲା ବିଧାୟକ ସାରଦା ପ୍ରସାଦ ନାୟକ ଜିଲ୍ଲାର ସମସ୍ତ ବ୍ଲକ ଅଧ୍ୟକ୍ଷଙ୍କ ସହ ମିଶି ମୁଖ୍ୟମନ୍ତ୍ରୀଙ୍କୁ କୃତଜ୍ଞତା ଜଣାଇଛନ୍ତି ।
ସୁନ୍ଦରଗଡ଼ରୁ ହରିହର ଦାସ ମହାପାତ୍ର, ଇଟିଭି ଭାରତ
