ରାଉରକେଲା: ଅନ୍ଧବିଶ୍ୱାସର ମାୟା ଜାଲରୁ ବାହାରୁ ପାରୁନି ମଣିଷ । ସମାଜ ଯେତେ ବିକାଶ ହେଲେ ମଧ୍ୟ ଅନ୍ଧବିଶ୍ୱାସ ଯୋଗୁଁ ହତ୍ୟା କରିବାକୁ ପଛାଉ ନାହିଁ ବିଂଶ ଶତାବ୍ଦୀର ମଣିଷ। ପୁଣି ଥରେ ଏହାର କରୁଣ ପରିଣତି ଦେଖିବାକୁ ମିଳିଛି ସୁନ୍ଦରଗଡ ଜିଲ୍ଲା ବଲାଙ୍ଗ ଥାନା ଅଧିନସ୍ଥ କମାରପୋଷ ଗ୍ରାମରେ। ଗୁଣି ଗାରେଡି ସନ୍ଦେହରେ ଜଣେ ମହିଳାଙ୍କୁ ନିର୍ମମ ଭାବେ ହତ୍ୟା କରାଯାଇଥିବା ଅଭିଯୋଗ ହୋଇଛି।
ଗତ ଶୁକ୍ରବାର ରାତିରେ ଘଟିଛି ଏହି ହତ୍ୟାକାଣ୍ଡ । ମୃତ ମହିଳା ହେଲେ କମାରପୋଷ ଗ୍ରାମର ଚାନ୍ଦ ମୁଣ୍ଡା। ତେବେ ହତ୍ୟାକାରୀ ପୁରୀ ମୁଣ୍ଡାକୁ ଗିରଫ କରିଛି ପୋଲିସ । ସୂଚନା ଅନୁଯାୟୀ, ପୁରୀ ମୁଣ୍ଡାଙ୍କ ପୁଅକୁ ଅନେକ ଦିନରୁ ଜ୍ୱର ହେଉଥିଲା। ତେବେ ଜ୍ୱର ନ ଛାଡିବାରୁ ଚାନ୍ଦ ମୁଣ୍ଡା ଗୁଣି ଗାରେଡି କରୁଥିବା ନେଇ ସେ ସନ୍ଦେହ କରୁଥିଲେ । ଶେଷରେ ସେ ଚାନ୍ଦ ମୁଣ୍ଡାକୁ ଭୁଜାଲିରେ ହାଣି ଅତି ନିର୍ମମ ଭାବେ ହତ୍ୟା କରିଥିଲେ। ଏନେଇ କେ.ବଲଙ୍ଗା ଥାନାରେ ଏତଲା ପରେ ପୋଲିସ ଅଭିଯୁକ୍ତକୁ ଗିରଫ କରି ପଚରାଉଚରା ଚଳାଇଛି।
ରାଉରକେଲାରୁ ରାଜେନ୍ଦ୍ର ନାଥ ମିଶ୍ର, ଇଟିଭି ଭାରତ
