ରାଉରକେଲା: ନୂଆବର୍ଷରେ ବଡ଼ ଅଘଟଣ । ଚାଲିଥିଲା ନୂଆବର୍ଷ ପାଇଁ ଭୋଜି । କଥା କଟାକଟିକୁ ନେଇ ଫୁଟିଲା ଗୁଳି । ଗୁଳିମାଡ଼ରେ ଚାଲିଗଲା ଯୁବକଙ୍କ ଜୀବନ । ଭାଇ ଭାଇ ମଧ୍ୟରେ ଗୁଳି ଚାଳନା । ସମ୍ପର୍କୀୟ ବଡ ଭାଇର ଗୁଳି ମାଡରେ ସାନ ଭାଇର ମୃତ ହୋଇଛି । ମୃତ ଯୁବକ ଜଣକ ୨୬ ବର୍ଷୀୟ କ୍ଷୀରଧର ସିଂ ବୋଲି ଜଣାପଡ଼ିଛି । ତେବେ କେଉଁ କାରଣରୁ ବଡ ଭାଇ ଜଣକ ଏଭଳି ଗୁଳି ଚାଳନା କରିଛି ତାହା ଏବେ ସୁଦ୍ଧା ଅସ୍ପଷ୍ଟ ରହିଛି । ସେପଟେ ଏହି ଘଟଣାରେ ଜଣକୁ ଅଟକ ରଖି ତଦନ୍ତ ଆରମ୍ଭ କରିଛି ପୋଲିସ । ଏଭଳି ଏକ ଘଟଣା ଦେଖିବାକୁ ମିଳିଛି ରାଉରକେଲା ସହର ଉପକଣ୍ଠରେ ।
ତେବେ ଗତକାଲି ରାତି ସମୟରେ ରାଉରକେଲା ଉପକଣ୍ଠ ବିଶ୍ରା ଥାନା ଅନ୍ତର୍ଗତ ତେତେରକେଲା ଗାଁର କ୍ଷୀରଧର ସିଂ ଓ ତାର କିଛି ସାଙ୍ଗ ମିଶି ନୂଆବର୍ଷ ସେଲିବ୍ରେସନ କରିବା ସହ ଭୋଜି କରୁଥିଲେ । ଏହି ସମୟରେ କ୍ଷୀରଧର ଓ ସମ୍ପର୍କୀୟ ଭାଇଙ୍କ ମଧ୍ୟରେ କୌଣସି କାରଣରୁ ବଚସା ହୋଇଥିଲା । ଏଥିରେ ଉତକ୍ଷୀପ୍ତ ହୋଇ ସମ୍ପର୍କୀୟ ଭାଇ ଜଣଙ୍କ କ୍ଷୀରଧରଙ୍କ ଉପରକୁ ଏକ ବେଆଇନ ବନ୍ଧୁକରୁ ଗୁଳି ଚଳାଇଥିଲା । ଏହି ଫାୟରିଂରେ ମୋଟ ଚାରି ରାଉଣ୍ଡ ଗୁଳି ଚାଳନା କରିଥିଲେ । କ୍ଷୀରଧରଙ୍କ ଦେହରେ ଗୁଳି ବାଜିବା ପରେ ସେଗୁରୁତର ଭାବରେ ଆହତ ହୋଇଥିଲେ । ତୁରନ୍ତ ସାଙ୍ଗମାନେ ତାଙ୍କୁ ରାଉରକେଲା ଇସ୍ପାତ ଜେନେରାଲ ହସ୍ପିଟାଲକୁ ନେଇଥିଲେ । କିନ୍ତୁ ସେଠାରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ହୋଇଥିଲା ।
ଏହା ମଧ୍ୟ ପଢ଼ନ୍ତୁ......ନୂଆବର୍ଷ ପାର୍ଟିରେ ଓକିଲଙ୍କୁ ଗୁଳି କରି ହତ୍ୟା
ସେପଟେ ଏନେଇ ପୋଲିସ ସୂଚନା ପାଇବା ପରେ ଘଟଣାସ୍ଥଳରେ ପହଞ୍ଚି ଅଭିଯୁକ୍ତ ସମ୍ପର୍କୀୟ ବଡଭାଇକୁ ଅଟକ ରଖି ପଚରା ଉଚୁରା କରୁଛନ୍ତି । ଏହାସହ ବେଆଇନ ବନ୍ଧୁକ ମଧ୍ୟ ଜବତ କରିଛି । ଏହି ହତ୍ୟାକାଣ୍ଡରେ ସାମିଲ ଥିବା ଅନ୍ୟ ଜଣେ ଯୁବକ ଫେରାର ଥିବା ବେଳେ ଫେରାର ଯୁବକକୁ ଖୋଜିବାକୁ ଛାନଭିନ ଚଳାଇଛି ବିଶ୍ରା ପୋଲିସ । ପୋଲିସ କହିବା ଅନୁସାରେ, ନୂଆବର୍ଷ ରାତିରେ ଭୋଜି କରୁଥିବା ସମୟରେ ପ୍ରଥମେ କୌଣସି କାରଣରୁ ସେମାନଙ୍କ ମଧ୍ୟରେ ଝଗଡ଼ା ହୋଇଥିଲା । ମୃତ ଯୁବକଙ୍କ ଉପରକୁ ତିନି ରାଉଣ୍ଡ ଫାଙ୍କା ଗୁଳିଚଳନ କରାଯାଇଛି ଏବଂ ଚତୁର୍ଥ ଗୁଳିଟି ଯୁବକଙ୍କ ଦେହରେ ବାଜିବା ଫଳରେ ଯୁବକଙ୍କ ମୃତ୍ୟୁ ହୋଇଛି ।
ଇଟିଭି ଭାରତ, ସୁନ୍ଦରଗଡ଼
