ସୁନ୍ଦରଗଡ: ପୁତ୍ର ହତ୍ୟା ଅଭିଯୋଗରେ ସାବତ ମା’ ଓ ବାପାଙ୍କୁ ଗିରଫ କଲା ପୋଲିସ । ରାଉରକେଲା ପୋଲିସ ଜିଲ୍ଲା କୋଇଡା ଥାନା କାଲଟା ଫାଣ୍ଡି ଅନ୍ତର୍ଗତ ଗୀର୍ଜାଟୋଲାରେ ଘଟିଛି ଏହି ଜଘନ୍ୟ କାଣ୍ଡ । ଗତ 19 ତାରିଖ ସନ୍ଧ୍ୟାରେ ଏହି ଜଘନ୍ୟ କାଣ୍ଡ କରିଥିବା ଜଣାପଡିଛି । ପୋଲିସ ଉଭୟ ସାବତ ମା ଓ ବାପାକୁ ଗିରଫ କରିବା ସହ ଆସନ୍ତାକାଲି କୋର୍ଟ ଚାଲାଣ କରିବ ବୋଲି ସୂଚନା ମିଳିଛି।
ଘଟଣା ଅନୁସାରେ ମଦ୍ୟପ ପୁଅ ସାମରାନ ଡାଙ୍ଗର ବ୍ୟବହାରରେ ଅତିଷ୍ଠ ହୋଇ ପତି-ପତ୍ନୀ ଏହି ହତ୍ୟାକାଣ୍ଡ ଘଟାଇଛନ୍ତି । ଗତ 19 ତାରିଖ ରାତିରେ ସାମରାନ ଅତ୍ୟଧିକ ମଦ ପିଇ ତା’ ବାପା ସନ୍ତୋଷ ଡାଙ୍ଗକୁ ଟାଙ୍ଗିଆରେ ଆକ୍ରମଣ କରିବାକୁ ଯାଉଥିବାବେଳେ ସନ୍ତୋଷ ସେହି ଟାଙ୍ଗିଆକୁ ଛଡାଇ ନେଇ ପୁଅର ବେକରେ ଚୋଟ ମାରିବାରୁ ଘଟଣାସ୍ଥଳରେ ହିଁ ତାଙ୍କର ମୃତ୍ୟୁ ହୋଇଥିଲା ।
ପ୍ରମାଣ ନଷ୍ଟ କରିବା ପାଇଁ ପତ୍ନୀ ସୁଶାନ୍ତି ମୁଣ୍ଡା ସହ ସନ୍ତୋଷ ଡାଙ୍ଗ ମିଳିତ ଭାବେ ଏକ କାଠ ସାହାଯ୍ୟରେ ତାର ମର ଶରୀରକୁ ବୋହିନେଇ ନିକଟସ୍ଥ ମାତଝର ଜଙ୍ଗଲର ଏକ ନାଳରେ ଫିଙ୍ଗି ଦେଇ ଫେରାର ହୋଇଯାଇଥିଲେ ।
ଏ ନେଇ ପୋଲିସକୁ ଗତକାଲି ସୂଚନା ମିଳିବା ପରେ ଶବକୁ ଉଦ୍ଧାର କରି ବ୍ୟବଛେଦ କରିଥିଲା । ଆଜି ସନ୍ଧ୍ୟାରେ ଅଭିଯୁକ୍ତ ଦମ୍ପତ୍ତିଙ୍କୁ ଥାନାରେ ଗିରଫ କରି ପଚରାଉଚରା କରୁଥିବାବେଳେ ଆସନ୍ତାକାଲି ଉଭୟଙ୍କୁ କୋର୍ଟ ଚାଲାଣ କରାଯିବା ନେଇ ସୂଚନା ଦେଇଛି ।
ସୁନ୍ଦରଗଡରୁ ହରିହର ଦାସ ମହାପାତ୍ର , ଇଟିଭି ଭାରତ
