ସୁନ୍ଦରଗଡ: ସୁନ୍ଦରଗଡ ଜିଲ୍ଲା କିଞ୍ଜିରକେଲା ଧାନ ଚାଷୀଙ୍କ ସମସ୍ୟା ଦିନକୁ ଦିନ ବଢିବାରେ ଲାଗିଛି । କେତେବେଳେ ମିଲର୍ସ ଓ ଦଲାଲଙ୍କ ଦ୍ବାରା ଶୋଷିତ ହେଉଛନ୍ତି ତ ପୁଣି କେତେବେଳେ ସରକାରୀ ବ୍ୟବସ୍ଥା ଯୋଗୁଁ ନିଜ ଧାନ ବିକ୍ରି ନହେବା ଆଶଙ୍କାରେ ଆତଙ୍କିତ ହେଉଛନ୍ତି । ବାରମ୍ବାର ଅଭିଯୋଗ ସତ୍ତ୍ବେ ବି କେହି କର୍ଣ୍ଣପାତ କରୁନଥିବାବେଳେ ଶେଷରେ ଆଇନକୁ ନିଜ ହାତକୁ ନେବାପାଇଁ ବାଧ୍ୟ ହୋଇଛନ୍ତି ଚାଷୀ। ସରକାରଙ୍କ ନିୟମ ମୁତାବକ ଏମାନେ ନିଜର ଧାନ ବିକ୍ରି ପାଇଁ ପଞ୍ଜିକରଣ କରିଛନ୍ତି । ଟୋକନ ମଧ୍ୟ ମିଳିଛି । ମାତ୍ର ଧାନ କିଣିବା ନେଇ ସରକାରଙ୍କ ସ୍ତରରୁ ଟାର୍ଗେଟ ନ ଆସିବାରୁ ଧାନ ବିକ୍ରି ହୋଇ ପାରୁନି । ଯାହାର ସମାଧାନ ପାଇଁ ଜିଲ୍ଲାପାଳଙ୍କୁ ଗୁହାରି କରିଥିଲେ ଚାଷୀ । ହେଲେ ଫଳ ଶୂନ । ଶେଷରେ ବାଧ୍ୟ ହୋଇ ଲ୍ୟାମ୍ପସ କର୍ମଚାରୀ, ଧାନ କିଣିବାକୁ ଆସିଥିବା ମିଲର୍ସଙ୍କ ଟ୍ରକ ସହ ଟ୍ରକ ଚାଳକଙ୍କୁ ମଧ୍ୟ ଅଟକ ରଖି କାର୍ଯ୍ୟାଳୟ ତାଲା ପକାଇଦେଇଥିଲେ । ଆଉ ଲ୍ୟାମ୍ପସର ନିତିଦିନିଆ କାମକୁ ଅଚଳ କରିଦେଇଥିଲା । ଯାହାକୁ ନେଇ ଚର୍ଚ୍ଚା ଜୋର ଧରିଛି ।
ଧାନ ବିକ୍ରିହେବା ନେଇ ନିଶ୍ଚିତ କରାଯାଉ ନାହିଁ , କିନ୍ତୁ କିଞ୍ଜିରକେଲା ଘଟଣା ଉପରେ ପ୍ରଶାସନ ଆଡୁ କିଞ୍ଜିରକେଲା ଥାନାରେ କେତେକ ଆନ୍ଦୋଳନକାରୀଙ୍କ ନାମରେ ମାମଲା ରୁଜୁ ହୋଇଥିବା କଥା ଜଣାପଡିଛି । ଯାହା ଅତି ଦୁର୍ଭାଗ୍ୟ ଜନକ ।
ସୁନ୍ଦରଗଡରୁ ହରିହର ଦାସମହାପାତ୍ର , ଇଟିଭି ଭାରତ
