ଖାଲି କ୍ରିକେଟ ନୁହେଁ, ଏକାଧିକ ଖେଳରେ ଭାରତର ପ୍ରତିନିଧିତ୍ବ କରିଛନ୍ତି ଏହି ଖେଳାଳି - Who Played Two Sports for India

Cricketers who have played other sports: ଏମିତି କିଛି ଭାରତୀୟ ଖେଳାଳି, ଯେଉଁମାନେ କେବଳ କ୍ରିକେଟ ନୁହେଁ, ଏକାଧିକ କ୍ରୀଡ଼ାରେ ଭାରତର ପ୍ରତିନିଧିତ୍ୱ କରିଛନ୍ତି । ଏହି ତାଲିକାରେ କପିଲ ଦେବଙ୍କଠାରୁ ଆରମ୍ଭ କରି ୟୁଜବେନ୍ଦ୍ର ଚହଲ ମଧ୍ୟ ସାମିଲ ଅଛନ୍ତି । ଅଧିକ ପଢ଼ନ୍ତୁ

ହାଇଦ୍ରାବାଦ : କ୍ରିକେଟ୍ ଜଗତରେ ଅନେକ ଖେଳାଳି ଅଛନ୍ତି, ଯେଉଁମାନେ ବ୍ୟାଟ୍ ଏବଂ ବଲ୍‌ରେ ଚମତ୍କାର ପ୍ରଦର୍ଶନ ସହିତ ବିଶ୍ବରେ ନିଜର ସ୍ବତନ୍ତ୍ର ପରିଚୟ ସୃଷ୍ଟି କରିଛନ୍ତି । କିନ୍ତୁ କ୍ରିକେଟ୍ ଦୁନିଆରେ ଅନେକ ଖେଳାଳି ଏପରି ମଧ୍ୟ ଅଛନ୍ତି, ଯେଉଁମାନେ କ୍ରିକେଟ୍ ବ୍ୟତୀତ ଅନ୍ୟ କ୍ରୀଡ଼ାରେ ମଧ୍ୟ ନିଜର ପରିଚୟ ସୃଷ୍ଟି କରିଛନ୍ତି । ଆଜି ଆମେ ଆପଣଙ୍କୁ ଭାରତର ଏଭଳି କ୍ରିକେଟରଙ୍କ ବିଷୟରେ କହିବାକୁ ଯାଉଛୁ, ଯେଉଁମାନେ କ୍ରିକେଟ୍ ବ୍ୟତୀତ ଅନ୍ୟ କ୍ରୀଡ଼ାରେ ମଧ୍ୟ ଭାରତକୁ ପ୍ରତିନିଧିତ୍ବ କରିଛନ୍ତି ।

ଚୁନି ଗୋସ୍ବାମୀ (IANS Photo)

ଚୁନି ଗୋସ୍ବାମୀ :-

ଭାରତୀୟ ଖେଳାଳି ଚୁନି ଗୋସ୍ବାମୀ ଦୁଇଟି କ୍ରୀଡା, ଫୁଟବଲ ଏବଂ କ୍ରିକେଟରେ ଦେଶର ପ୍ରତିନିଧିତ୍ବ କରିଛନ୍ତି । ସେ ଭାରତ ପାଇଁ ଫୁଟବଲ ମଧ୍ୟ ଖେଳିଛନ୍ତି । ଗୋସ୍ବାମୀ 1962 ଏସୀୟ ଗେମ୍ସରେ ସ୍ବର୍ଣ୍ଣ ପଦକ ଏବଂ 1964 ଏସିଆ କପ୍‌ରେ ରୌପ୍ୟ ପଦକ ଜିତିଛନ୍ତି । ଏହା ସହିତ ସେ 1960 ଅଲିମ୍ପିକ୍ସରେ ଟିମ୍‌ ଇଣ୍ଡିଆର ପ୍ରତିନିଧିତ୍ୱ ମଧ୍ୟ କରିଛନ୍ତି । ସେ 50ଟି ଅନ୍ତର୍ଜାତୀୟ ଫୁଟବଲ ମ୍ୟାଚ୍ ମଧ୍ୟ ଖେଳିଛନ୍ତି । ଫୁଟବଲରୁ ଅବସର ନେବା ପରେ ସେ କ୍ରିକେଟରେ ନିଜର ପ୍ରଭାବ ବିସ୍ତାର କରିଥିଲେ ଏବଂ ପଶ୍ଚିମବଙ୍ଗ ପାଇଁ 46ଟି ପ୍ରଥମ ଶ୍ରେଣୀ ମ୍ୟାଚ୍ ଖେଳିଥିଲେ । ଯେଉଁଠାରେ ସେ ହାରାହାରି 28.42ରେ 1592 ରନ୍ ସ୍କୋର କରିଥିଲେ । ତାଙ୍କ ନାମରେ ମଧ୍ୟ 1 ଶତକ ଏବଂ 7 ଅର୍ଦ୍ଧଶତକ ରହିଛି ।

କୋଟା ରାମାସ୍ବାମୀ :-

ଭାରତୀୟ ଖେଳାଳି କୋଟା ରାମସ୍ୱାମୀ ଉଭୟ ଟେନିସ୍‌ ଏବଂ କ୍ରିକେଟ୍‌ରେ ଭାରତର ପ୍ରତିନିଧିତ୍ୱ କରିଛନ୍ତି । ସେ 1920ରେ ସମ୍ମାନଜନକ ଟେନିସ୍ ଟୁର୍ଣ୍ଣାମେଣ୍ଟ ଡେଭିସ୍ କପରେ ଅଂଶଗ୍ରହଣ କରିଥିଲେ । ଏହାପରେ ସେ 1936 ମସିହାରେ ଇଂଲଣ୍ଡରେ ଭାରତୀୟ କ୍ରିକେଟ ଦଳରେ 40 ବର୍ଷ ବୟସରେ ଡେବ୍ୟୁ କରିଥିଲେ ଏବଂ ଦୁଇଟି ଟେଷ୍ଟ ମ୍ୟାଚ୍ ଖେଳିଥିଲେ । ସେ ତାଙ୍କର ପ୍ରଥମ ଶ୍ରେଣୀ କ୍ୟାରିୟରରେ 53 ମ୍ୟାଚ୍‌ରେ ହାରାହାରି 28.91ରେ ମୋଟ 2400 ରନ୍ ସଂଗ୍ରହ କରିଥିଲେ, ଏଥିରେ 2 ଶତକ ଏବଂ 12 ଅର୍ଦ୍ଧଶତକ ସାମିଲ ଅଛି ।

ଅଜିତ ଅଗରକର (IANS Photo)

ଅଜିତ ଅଗରକର :-

ବର୍ତ୍ତମାନର ଭାରତୀୟ କ୍ରିକେଟ୍‌ ଦଳର ମୁଖ୍ୟ ଚୟନକର୍ତ୍ତା ତଥା ପୂର୍ବତନ କ୍ରିକେଟର ଅଜିତ ଅଗରକର କ୍ରିକେଟ୍‌ ଏବଂ ଗଲ୍ଫରେ ନିଜର କ୍ୟାରିୟର ଗଢ଼ିଛନ୍ତି । ଅନ୍ତର୍ଜାତୀୟ କ୍ରିକେଟରୁ ଅବସର ନେବା ପରେ ଅଗରକର ଗଲ୍ଫରେ ନିଜର କ୍ୟାରିୟର ଆରମ୍ଭ କରିଥିଲେ ଏବଂ ଅନେକ ଟୁର୍ଣ୍ଣାମେଣ୍ଟରେ ଭାଗ ନେଇଥିଲେ । ସେ 2016ରେ ବେଙ୍ଗାଲୁରୁର ପ୍ରେଷ୍ଟିଜ୍‌ ଗଲ୍ଫଶାୟରରେ ଆୟୋଜିତ ବିଏମ୍‌ଆର୍‌ ୱାର୍ଲ୍ଡ କର୍ପୋରେଟ ଗଲ୍ଫ ଚ୍ୟାଲେଞ୍ଜର ଫାଇନାଲରେ ଭାରତକୁ ବିଜୟୀ କରାଇଥିଲେ । ସେ କ୍ରକେଟରେ 191ଟି ଦିନିକିଆରେ 288 ୱିକେଟ୍ ଏବଂ 26ଟି ଟେଷ୍ଟରେ 58 ୱିକେଟ୍ ନେଇଛନ୍ତି ।

କପିଲ ଦେବ (IANS Photo)

କପିଲ ଦେବ :-

ଟିମ୍ ଇଣ୍ଡିଆର ବିଶ୍ବ ବିଜୟୀ ଅଧିନାୟକ କପିଲ ଦେବ ମଧ୍ୟ ସେହି ଖେଳାଳିଙ୍କ ମଧ୍ୟରେ ଅଛନ୍ତି, ଯେଉଁମାନେ ଭାରତକୁ ଦୁଇଟି କ୍ରୀଡ଼ାରେ ପ୍ରତିନିଧିତ୍ବ କରିଛନ୍ତି । କପିଲ ଦେବ ମଧ୍ୟ କ୍ରିକେଟ୍ ଏବଂ ଗଲ୍ଫ ଉଭୟ କ୍ରୀଡ଼ାରେ ଭାଗ ନେଇଛନ୍ତି । କ୍ରିକେଟରୁ ଅବସର ନେବା ପରେ କପିଲ ଗଲ୍ଫ ଟୁର୍ଣ୍ଣାମେଣ୍ଟରେ ଭାରତର ପ୍ରତିନିଧିତ୍ୱ କରିଛନ୍ତି । କପିଲ ଦେବ ଋଷି ନାରାୟଣ ଏବଂ ଅମିତ ଲୁଥ୍ରାଙ୍କ ସହ ଏସିଆ ପାସିଫିକ୍ ସିନିୟର 2018ରେ ଭାରତ ପାଇଁ ଗଲ୍ଫ ଖେଳିଥିଲେ । ମାର୍ଚ୍ଚ 2021ରେ, ସେ ପ୍ରଫେସନାଲ୍ ଗଲ୍ଫ ଟୁର୍ ଅଫ୍ ଇଣ୍ଡିଆ (PGTI)ର ବୋର୍ଡ ସଦସ୍ୟ ଭାବରେ ମଧ୍ୟ ଅନ୍ତର୍ଭୁକ୍ତ ହୋଇଥିଲେ ।

ୟୁଜବେନ୍ଦ୍ର ଚହଲ (IANS Photo)

ୟୁଜବେନ୍ଦ୍ର ଚହଲ :-

ଭାରତୀୟ କ୍ରିକେଟ୍‌ ଦଳର ଷ୍ଟାର ଲେଗ୍‌ ସ୍ପିନର ୟୁଜବେନ୍ଦ୍ର ଚହଲ ଉଭୟ କ୍ରିକେଟ୍ ଏବଂ ଚେସରେ ଭାରତର ପ୍ରତିନିଧିତ୍ବ କରିଛନ୍ତି । ଚହଲ ଭାରତ ପକ୍ଷରୁ ବିଶ୍ବ ଯୁବ ଚେସ ଚାମ୍ପିୟନସିପରେ ଭାଗ ନେଇଥିଲେ । ଏହାପରେ ସେ ଚେସ୍‌ ଛାଡି କ୍ରିକେଟ୍ ଖେଳିବା ଆରମ୍ଭ କରିଥିଲେ । ବର୍ତ୍ତମାନ ଚହଲ ଭାରତ ପାଇଁ କ୍ରିକେଟ୍ ଖେଳୁଛନ୍ତି । ଚାହଲ ଦେଶ ପାଇଁ 72ଟି ଦିନିକିଆ ମ୍ୟାଚ୍‌ ଖେଳି 121 ୱିକେଟ୍ ଏବଂ 75 ଟି20 ମ୍ୟାଚ୍‌ରେ 91 ୱିକେଟ୍ ଅକ୍ତିଆର କରିଛନ୍ତି ।

ଏହା ମଧ୍ୟ ପଢ଼ନ୍ତୁ :-

ବ୍ୟୁରୋ ରିପୋର୍ଟ, ଇଟିଭି ଭାରତ