ରାଉରକେଲା: ସୁନ୍ଦରଗଡ଼ ଜିଲ୍ଲା ବଣାଇ ଅଞ୍ଚଳରେ ଚାଷୀଙ୍କ ଲାଗି ଟୋକନ ସାଜିଛି ବାଧକ । ଏନେଇ ଗୁରୁବାର ଶତାଧିକ ଚାଷୀ ଉପଜିଲ୍ଲାପାଳଙ୍କ କାର୍ଯ୍ୟାଳୟଠାରେ ଧାରଣାରେ ବସିଥିଲେ ।
ଏହାକୁ ନେଇ ଉପଜିଲ୍ଲାପାଳ ନିଜ ପ୍ରତିକ୍ରିୟା ରଖିଛନ୍ତି । ଟାର୍ଗେଟ ଆସିଲେ ଖୁବଶୀଘ୍ର ଧାନ କିଣା ହେବ ।
ଗୁରୁବାର ରାଜରାସ୍ତାରେ ଚାଷୀ ହାତରେ ବ୍ୟାନର ଧରି ଉପଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଧାରଣା ଦେଇଥିଲେ । ଦୀର୍ଘ 4 ମାସ ଶେଷ ସୁଦ୍ଧା ବଣାଇ ଗୁରୁଣ୍ଡିଆ ବ୍ଲକର ଭାଲୁ ଡୁଙ୍ଗୁରି, ନରେନ୍ଦ୍ର, ବନେଇ କେଳା ପଞ୍ଚାୟତର ଚାଷୀଙ୍କ ଧାନ ବିକ୍ରି ହୋଇ ପାରିନଥିଲା । ଯାହାକୁ ନେଇ ଚାଷୀ ଜିଲ୍ଲାପାଳ, ଉପଜିଲ୍ଲାପାଳ ସମସ୍ତଙ୍କୁ ଜଣାଇଥିଲେ। ମାତ୍ର କିଛି ଫଳାଫଳ ମିଳି ନଥିଲା ।
ଧାନ ବିକ୍ରି ହେଲେ ଚାଷୀ ଋଣ ଶୁଝିବା, ପିଲାଙ୍କ ପାଠ ଖର୍ଚ୍ଚ ସହ ଘର ଖର୍ଚ୍ଚ ମେଣ୍ଟଇପାରନ୍ତା । ମାତ୍ର ଧାନ ବିକ୍ରି ହୋଇପାରିଲା ନାହିଁ। ଯାହାଫଳରେ ଗୁରୁବାର ଏହି ଧାରଣା ଦେବାକୁ ପଡିଲା । ତେବେ ଯେ ପର୍ଯ୍ୟନ୍ତ ସରକାର ଚାଷୀଙ୍କ କଥା ଶୁଣିନାହାନ୍ତି ସେ ପର୍ଯ୍ୟନ୍ତ ଏହି ଧାରଣା ଜାରି ରହିବା ନେଇ ଚେତାବନୀ ଦେଇଛନ୍ତି କୃଷକ ।
ଏନେଇ ଉପଜିଲ୍ଲାପାଳ କହିଛନ୍ତି ଏବର୍ଷ 3 ଲକ୍ଷ 40 ହଜାର କ୍ବିଣ୍ଟାଲ ଧାନ କିଣା ସରିଲାଣି । ତେବେ ଅଧିକ ଟାର୍ଗେଟ ଆସିଲେ ଚାଷୀଙ୍କ ଧାନ କିଣା ହେବ ।
ରାଉରକେଲାରୁ ରାଜେନ୍ଦ୍ର ନାଥ ମିଶ୍ର, ଇଟିଭି ଭାରତ
