ରାଉରକେଲା: କିଛି ଦିନ ତଳେ ପାଖାପାଖି ଏକ ମାସ ଧରି ସୁନ୍ଦରଗଡ ସଦର ଫରେଷ୍ଟ ରେଞ୍ଜର ଜାମତଳିଆ ଅଞ୍ଚଳରେ ୬ଟି ଦନ୍ତା ହାତୀ ଗାଁରେ ଘୁରି ବୁଲୁଥିଲେ । ସେମାନଙ୍କୁ ଘଉଡିବା ପାଇଁ ବନ ବିଭାଗକୁ ନାକେଦମ ହେବାକୁ ପଡିଥିଲା । ଗୁରୁବାର ପୁଣି ୧୭ ଟି ହାତୀ ଉଜ୍ବଳପୁର ଫରେଷ୍ଟ ରେଞ୍ଜର କିଞ୍ଜିରକେଲା ସେକ୍ସନ ତିଲଡେଗା ଗାଁ ନିକଟ ବୁଦାଳିଆ ଜଙ୍ଗଲ ମଧ୍ୟରେ ରହିଥିବାର ଦେଖିବାକୁ ମିଳିଥିଲା । ଫଳରେ ସ୍ଥାନୀୟ ଲୋକଙ୍କ ମଧ୍ୟରେ ଆତଙ୍କ ଦେଖାଯାଇଥିଲା ।
ସ୍ଥାନୀୟ ଲୋକଙ୍କ ସହଯୋଗରେ ବନ ବିଭାଗ କର୍ମଚାରୀ ହାତୀ ପଲକୁ ଘଉଡାଇବା ପାଇଁ ଚେଷ୍ଟା କରୁଛି । ଏହାସହ ହାତୀ ଲୋକଙ୍କୁ ଗୋଡାଉଥିବାର ମଧ୍ୟ ଦେଖିବାକୁ ମିଳିଛି ଫଳରେ ଲୋକେ ଆତଙ୍କିତ ଅଛନ୍ତି । ଏହି ହାତୀ ପଲରେ ମାଈ, ଦନ୍ତା ଓ ଛୋଟ ହାତୀ ମଧ୍ୟ ରହିଛନ୍ତି।
ଏହି ଅଞ୍ଚଳ ଛତିଶଗଡ଼ ସୀମାନ୍ତ ହୋଇଥିବାରୁ ଛତିଶଗଡ ଜଙ୍ଗଲରୁ ଏହି ହାତୀ ପଲ ଆସିଥିବା ଅନୁମାନ କରାଯାଉଛି। ବନ ବିଭାଗ କର୍ମଚାରୀ ଘଟଣାସ୍ଥଳରେ ରହି ହାତୀର ଗତିବିଧି ଉପରେ ନଜର ରଖିଛନ୍ତି । ରାତି ହେଲେ ସେମାନଙ୍କୁ ପୁଣି ଛତିଶଗଡ଼ ପଟକୁ ଘଉଡାଇବା ପାଇଁ ପ୍ରୟାସ କରାଯିବ।
ରାଉରକେଲାରୁ ରାଜେନ୍ଦ୍ର ନାଥ ମିଶ୍ର, ଇଟିଭି ଭାରତ
