ସୁନ୍ଦରଗଡ଼: କୁତ୍ରା ବ୍ଲକ୍ରେ ସିନିୟର ଜିଲ୍ଲାସ୍ତରୀୟ ମହିଳା ଓ ପୁରୁଷ ହକି ଟୁର୍ଣ୍ଣାମେଣ୍ଟ ଉଦଯାପିତ ହୋଇଛି । ଉଭୟ ପୁରୁଷ ଓ ମହିଳା ବର୍ଗରେ ସୁନ୍ଦରଗଡ଼ର ଦଳ ବାଜିମାତ୍ କରିଛନ୍ତି । ଗତ ଶନିବାର ଜିଲ୍ଲାପାଳ ନିଖିଲ ପବନ କଲ୍ୟାଣ ଏହି ଟୁର୍ଣ୍ଣାମେଣ୍ଟକୁ ଉଦଘାଟନ କରିଥିଲେ । ପ୍ରଥମେ ପଞ୍ଚାୟତସ୍ତର ପରେ ବ୍ଲକସ୍ତର ଉପଖଣ୍ଡସ୍ତରୀୟ ପ୍ରତିଯୋଗିତା ପରେ ଆରମ୍ଭ ହୋଇଥିଲା ଅନ୍ତିମ ପର୍ଯ୍ୟାୟ ବା ଜିଲ୍ଲାସ୍ତରୀୟ ପ୍ରତିଯୋଗିତା । ସିନିୟର ପୁରୁଷ ଓ ମହିଳା ବର୍ଗରେ ସୁନ୍ଦରଗଡ଼, ବଣାଇଁ ଓ ପାନପୋଷ ଉପଖଣ୍ଡରୁ ମୋଟ ୮ଟି ବ୍ଲକସ୍ତରୀୟ ଟିମ୍ ଏହି ପ୍ରତିଯୋଗିତାରେ ସାମିଲ ହୋଇଥିଲେ।
ଜିଲ୍ଲା ଗ୍ରାମ୍ୟ ଉନ୍ନୟନ ସଂସ୍ଥାର ପ୍ରକଳ୍ପ ନିର୍ଦ୍ଦେଶକ ଭୈରବ ସିଂହ ପଟେଲ ଏହି ଟୁର୍ଣ୍ଣାମେଣ୍ଟ ଉଦଯାପିତ କରିଛନ୍ତି । ପ୍ରତିଯୋଗୀଙ୍କୁ ଟ୍ରଫି ଓ ଅର୍ଥରାଶି ଦେଇ ସମ୍ବର୍ଦ୍ଧିତ କରିବା ସହ କ୍ରୀଡାବିତଙ୍କ ଦ୍ୱାରା କ୍ରୀଡ଼ା ପତାକାକୁ ଅବତରଣ କରାଇ ଜିଲ୍ଲା ହକି ଆସୋସିଏସନର କାର୍ଯ୍ୟକାରୀ ଉପ ସଭାପତି ରାମେଶ୍ୱର ଟପ୍ପୋଙ୍କୁ ହସ୍ତାନ୍ତର କରିଛନ୍ତି ।
କ୍ରୀଡ଼ାବିତ୍ଙ୍କ ପ୍ରତିଭାକୁ ପ୍ରଶଂସା କରିଛି ଜିଲ୍ଲା ହକି ଆସୋସିଏସନ । ଉଦଯାପନୀ ଦିବସରେ ସମ୍ମାନିତ ଅତିଥି ଭାବେ ଯୋଗ ଦେଇଥିବା ବଣାଇ ଉପ ଜିଲ୍ଲାପାଳ ପ୍ରଦୀପ କୁମାର ଡାଙ୍ଗ ହକି ପ୍ରତିଭାଙ୍କୁ ଦେଖି ଖୁସି ବ୍ୟକ୍ତ କରିଛନ୍ତି । ବଣାଇ ଉପଖଣ୍ଡରେ ଏହିଭଳି ଖେଳାଳୀଙ୍କ ପାଇଁ ଚାରୋଟି ଭିନ୍ନ ସ୍ଥାନରେ ଟର୍ଫର ବ୍ୟବସ୍ଥା କରାଯାଉଛି । ଏଭଳି ପ୍ରତିଯୋଗିତାକୁ ନେଇ ଖୁସି ଜାହିର କରିଛନ୍ତି ଭାଗ ନେଇଥିବା ପ୍ରତିଯୋଗୀ ।
ସୁନ୍ଦରଗଡ଼ରୁ ହରିହର ଦାସମହାପାତ୍ର, ଇଟିଭି ଭାରତ
