ରାଉରକେଲା: ଦ୍ବିତୀୟ ବ୍ରାହ୍ମଣ ସେତୁ ନିର୍ମାଣକୁ ନେଇ ଜୋର ଧରିଲା ରାଜନୀତି । ଉଭୟ କେନ୍ଦ୍ର ଓ ରାଜ୍ୟ ସରକାର ବ୍ରାହ୍ମଣୀ ନଦୀ ଉପରେ ସେତୁ ନିର୍ମାଣ ଲାଗି ପ୍ରସ୍ତାବ ଦେଇଥିଲେ । ହେଲେ ଆଜି ଏଯାଏଁ କାର୍ଯ୍ୟକାରୀ ହୋଇପାରି ନାହିଁ । ଏପରିକି କୁଆଁରମୁଣ୍ଡା ବ୍ଲକର ଯମୁନାଢିପାରେ ତୃତୀୟ ସେତୁ ମଧ୍ୟ ନିର୍ମାଣ ହୋଇପାରିନାହିଁ । ଯାହାକୁ ନେଇ ଆଜି ବୀରମିତ୍ରପୁରର ପୂର୍ବତନ ବିଧାୟକ ଜର୍ଜ ତିର୍କୀ ବିକ୍ଷୋଭ ପ୍ରଦର୍ଶନ କରିବା ସହ ରାସ୍ତାରୋକ କରିଥିଲେ ।
ଏହି ଆନ୍ଦୋଳନରେ ପ୍ରଧାନମନ୍ତ୍ରୀ, ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସମେତ କେନ୍ଦ୍ରୀୟ ମନ୍ତ୍ରୀ ନିତିନ ଗଡକାରୀ ଓ ଧର୍ମେନ୍ଦ୍ର ପ୍ରଧାନଙ୍କ କୁଶ ପୁତ୍ତଳିକା ଦାହ କରାଯାଇଥିଲା । ପୋଲ ନିର୍ମାଣ କରାନଗଲେ ଆଗକୁ ଆନ୍ଦୋଳନ ଜାରି ରହିବ ବୋଲି ମଧ୍ୟ ଚେତାବନୀ ଦେଇଛନ୍ତି କଂଗ୍ରେସ ନେତା ତିର୍କୀ ।
ଗତ ଶୁକ୍ରବାର ବ୍ରାହ୍ମଣୀ ନଦୀରେ ସେତୁ ନିର୍ମାଣ ଦାବିରେ ରାଉରକେଲାର ପୂର୍ବତନ ବିଧାୟକ ପ୍ରଭାତ ମହାପାତ୍ର ସାମ୍ବାଦିକ ସମ୍ମିଳନୀରେ ଅକ୍ଟୋବର 2ରୁ ଅନଶନ ସହ ଧାରଣା ଦେବେ ବୋଲି ଘୋଷଣା କରିଛନ୍ତି । ସୂଚନାଯୋଗ୍ୟ, ଦ୍ବିତୀୟ ବ୍ରାହ୍ମଣୀ ସେତୁ 5 ବର୍ଷେ ପୂର୍ବେ ପ୍ରଧାନମନ୍ତ୍ରୀଙ୍କ ଦ୍ବାରା ଘୋଷଣା କରାଯାଇଥିବା ସତ୍ତ୍ବେ ଏହାର ବିଶେଷ ଅଗ୍ରଗତି ହୋଇପାରି ନାହିଁ ।
ଅନ୍ୟପଟେ, ଗତ 2ବର୍ଷ ହେବା ଯମୁନାଢିପାରେ ତୃତୀୟ ବ୍ରିଜ ନେଇ ରାଜ୍ୟ ସରକାର ପକ୍ଷରୁ ଘୋଷଣା କରାଯାଇଛି । ହେଲେ ତାହା ମଧ୍ୟ ଆଗେଇ ପାରୁନାହିଁ ।
ରାଉରକେଲାରୁ ରାଜେନ୍ଦ୍ର ନାଥ ମିଶ୍ର, ଇଟିଭି ଭାରତ
