ସୁନ୍ଦରଗଡ: ରାଉରକେଲା ପ୍ଲାଣ୍ଟସାଇଟ ପୋଲିସ ଦ୍ୱାରା ଶିଶୁ ବିକ୍ରି ଓ ଚାଲଣକାରୀ ରାକେଟର ପର୍ଦ୍ଦାଫାସ ହୋଇଛି । ଏହି ଘଟଣାରେ ୭ ଜଣ ଅଭିଯୁକ୍ତଙ୍କୁ ଗିରଫ କରାଯାଇଛି । ଗିରଫଙ୍କ ମଧ୍ୟରେ 5 ଜଣ ମହିଳା ଓ 2 ଜଣ ପୁରଷ ରହିଛନ୍ତି । ଅଭିଯୁକ୍ତଙ୍କୁ ଗିରଫ ପରେ କୋର୍ଟ ଚାଲାଣ କରାଯାଇଛି । ଏହାସହ 16 ଜଣ ଶିଶୁଙ୍କୁ ଉଦ୍ଧାର କରାଯାଇଛି । ତେବେ ଏବେବି ରାଉରକେଲାରୁ ବିକ୍ରି ହୋଇଥିବା 25 ଶିଶୁ ଓ ନିଖୋଜ ଥିବା 21 ଶିଶୁଙ୍କୁ ଉଦ୍ଧାର କରାଯାଇ ନଥିବା ସୂଚନା ମିଳିଛି ।
କୋର୍ଟଙ୍କୁ ଅପିଲ କରି ରିମାଣ୍ଡରେ ଅଭିଯୁକ୍ତଙ୍କୁ ଆଣାଯିବ ବୋଲି ରାଉରକେଲା ଏସପି ମୁକେଶ କୁମାର ଭାମୁ ଏକ ସାମ୍ବାଦିକ ସମ୍ମିଳନୀରେ କହିଛନ୍ତି । ଏହି ରାକେଟର ଚେର କେଉଁଠି ଅଛି ତାହା ଏବେବି ତଦନ୍ତର ଘେରରେ ରହିଛି । ତେବେ ଏମାନେ ଶିଶୁ ଚାଲାଣ ପାଇଁ କେତେକ ଆଶା କର୍ମୀ ଓ କେତେକ ହସପିଟାଲ ସିହତ ଯୋଗ ସୂତ୍ର ରଖିଥିବା କଥା ପୋଲିସର ତଦନ୍ତରୁ ଜଣାପଡିଛି ।
ଏନେଇ ରାଉରକେଲା ଏସପି ସମସ୍ତ ନିଖୋଜ ଶିଶୁ ବା ବିକ୍ରି କରିଥିବା ଶିଶୁଙ୍କ ମା ଓ ବାପାଙ୍କ ସହଯୋଗ ଲୋଡିଛନ୍ତି । ଏମାନେ ସହଯୋଗ କଲେ ନିଖୋଜ ଶିଶୁଙ୍କୁ ଖୋଜି ବାହାର କରିବା ପାଇଁ ପୋଲିସକୁ ସହଜ ହେବ ବୋଲି ସେ କହିଛନ୍ତି । ତେବେ ଏହି ରାକେଟର ମାଷ୍ଟର ମାଇଣ୍ଡ କିଏ ତାହା ଏବେ ବି ଅସ୍ପଷ୍ଟ ରହିଛି । ତେବେ ଏହି ରାକେଟ ଶିଶୁ କନ୍ୟାଠାରୁ ଶିଶୁ ପୁତ୍ରମାନଙ୍କୁ ଅଧିକ ଟଙ୍କାରେ ବିକ୍ରି କରୁଥିବା ଜଣାପଡିଛି ।
ସୁନ୍ଦରଗଡରୁ ହରିହର ଦାସ ମହାପାତ୍ର, ଇଟିଭି ଭାରତ
