ସୁବର୍ଣ୍ଣପୁର: ତିନିଦିନ ପାଇଁ ସିଲ ହେଲା ଜିଲ୍ଲା ସଦର ତହସିଲ କାର୍ଯ୍ୟାଳୟ । କାର୍ଯ୍ୟାଳୟର ଦୁଇ ଜଣ କର୍ମଚାରୀ କୋଭିଡ ସଂକ୍ରମିତ ବୋଲି ଜଣା ପଡିବା ପରେ ତୁରନ୍ତ କାର୍ଯ୍ୟାଳୟକୁ ବନ୍ଦ କରି ଦିଆଯାଇଥିଲା । ପ୍ରଶାସନର ନିର୍ଦ୍ଦେଶରେ କର୍ମଚାରୀଙ୍କୁ କୋଭିଡ ପରୀକ୍ଷା କରି ରିପୋର୍ଟ ଦାଖଲ କରିବା ପାଇଁ ନିର୍ଦ୍ଦେଶ ଦିଆଯାଇଛି ।
ତହସିଲଦାରଙ୍କ କାର୍ଯ୍ୟାଳୟରେ ହାତ ଧୋଇବା ବ୍ୟବସ୍ଥା ସହିତ ସାମାଜିକ ଦୂରତ୍ୱ ରକ୍ଷା କରିବା ଓ ସାନିଟାଇଜର ବ୍ୟବହାର କରିବା ଉପରେ ବେଶ ଗୁରୁତ୍ୱ ଦିଆଯାଉଥିଲା । ତହସିଲଦାର ଅରବିନ୍ଦ ବେହେରା କୋଭିଡ ଯୋଦ୍ଧା ଭାବେ କାର୍ଯ୍ୟ କରି ଆସୁଛନ୍ତି। କାର୍ଯ୍ୟାଳୟରେ କିଭଳି କୋଭିଡ ସଂକ୍ରମଣ ନ ହେବ ସେଥିପାଇଁ ସେ ବେଶ ଯତ୍ନବାନ ଥିଲେ।
ମାତ୍ର ପ୍ରତିଦିନ ଶହ ଶହ ଲୋକ ବିଭିନ୍ନ ପ୍ରକାର ରାଜସ୍ୱ କାର୍ଯ୍ୟରେ କାର୍ଯ୍ୟାଳୟକୁ ଆସୁଥିବାରୁ କର୍ମଚାରୀମାନେ କୋଭିଡ ସଂକ୍ରମିତ ହୋଇଥିବା ଅନୁମାନ କରାଯାଉଛି । ତେବେ ଦୁଇ ଦିନ ପରେ ପୁଣି କାର୍ଯ୍ୟାଳୟ ସ୍ୱାଭାବିକ ଭାବେ ଚାଲିବ ବୋଲି ତହସିଲଦାର ସୂଚନା ଦେଇଛନ୍ତି।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
