ସୁବର୍ଣ୍ଣପୁର: ଜିଲ୍ଲାରେ ସିରିଜ ସଡକ ଦୁର୍ଘଟଣା ଦେଖିବାକୁ ମିଳିଛି । ପାଞ୍ଚ ଘଣ୍ଟା ଭିତରେ ତିନୋଟି ପୃଥକ ପୃଥକ ସଡକ ଦୁର୍ଘଟଣାରେ ଜଣଙ୍କର ମୃତ୍ୟୁ ହୋଇଥିବା ବେଳେ ପାଞ୍ଚ ଜଣ ଗୁରୁତର ଆହତ ହୋଇଛନ୍ତି । ବୀରମହାରାଜପୁର-ସୁବଳୟା ରାସ୍ତାର ସୁବଳୟା ପାଖରେ ଜଣେ ବାଇକ ଆରୋହୀଙ୍କ ମୃତ୍ୟୁ ହୋଇଛି । ମୃତକ ଜଣକ ସୁବଳୟା ଗାଁର ଆନନ୍ଦ ବେହେରା ବୋଲି ଜଣାପଡିଛି ।
ସୂଚନା ଅନୁସାରେ ଆନନ୍ଦ ବେହେରା ଆଜି (ଗୁରୁବାର) ସନ୍ଧ୍ୟାରେ ବୀରମହାରାଜପୁରରୁ ସୁବଳୟା ଯାଉଥିବା ବେଳେ ଭାରସାମ୍ୟ ହରାଇ ତଳେ ପଡିଯାଇଥିଲେ । ତାଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟକୁ ଗୁରୁତର ଅବସ୍ଥାରେ ପରିବାର ଲୋକେ ଆଣିଥିଲେ । ହେଲେ ଡାକ୍ତର ତାଙ୍କୁ ମୃତ ଘୋଷଣା କରିଛନ୍ତି । ସେପଟେ ସୁବର୍ଣ୍ଣପୁର ମହାନଦୀ ପୋଲ ପାଖରେ ସାଇକେଲ ଓ ବାଇକ ମଧ୍ୟରେ ମୁହାଁମୁହିଁ ଧକ୍କା ହୋଇଥିଲା । ଏଥିରେ ତିନି ଜଣ ଆହତ ହୋଇଥିଲେ । ଆହତମାନେ ହେଲେ ରାମ ଗୋପାଳ ବିଶି, ଚନ୍ଦ୍ର ମଣି ମେହେର ଓ ଶେଷ ଦେବ ମେହେର ।
ସେହିପରି ସୁବର୍ଣ୍ଣପୁର-ବଲାଙ୍ଗୀର ରାସ୍ତାରେ ଦୁଇ ବାଇକ ଆରୋହୀ ଗୁରୁତରମାନେ ହେଲେ ସୁବର୍ଣ୍ଣପୁର ସହର ପଟାଭାଡ଼ିର ଦୁଇ ଭାଇ ସୁଜିତ ମୁଣ୍ଡା ଓ ଅଜିତ ମୁଣ୍ଡା । ତରଭା ବ୍ଲକ କମସରା ଗାଁରୁ ଏକ ବାଇକ ଯୋଗେ ନିଜ ଘରକୁ ଫେରୁଥିବାବେଳେ ଖାରୀ ପାଖରେ ତାଙ୍କ ବାଇକଟି ଭାରସାମ୍ୟ ହରାଇ ରାସ୍ତାରେ ପଡିଯାଇଥିଲା । ଫଳରେ ଦୁଇ ଭାଇଙ୍କୁ ଗୁରୁତର ଅବସ୍ଥାରେ ସୁବର୍ଣ୍ଣପୁର ଡାକ୍ତରଖାନାକୁ ଆଣି ଚିକିତ୍ସା କରାଯାଇଛି ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
