ସୁବର୍ଣ୍ଣପୁର: ପ୍ରକୃତି ପୂଜା, ମାଟି ମା' ସହିତ ବୃକ୍ଷ ଉପାସନା । ସୁବର୍ଣ୍ଣପୁର ଜିଲ୍ଲା ଆଦିବାସୀ ସମ୍ପ୍ରଦାୟର ଲୋକେ ପାଳନ କରି ଆସୁଥିବା ମା' କରମସାନି ପର୍ବରେ ପ୍ରତିଫଳିତ ହେଉଛି । କୃଷି ଭିତ୍ତିକ ଏହି ପର୍ବ ପାଳନ କଲେ ବର୍ଷର ଫସଲ ଭଲ ହେବା ସହିତ ଧନ, ଜନ, ଗୋପ ଓ ଲକ୍ଷ୍ମୀ ଚତୁଃବର୍ଗ ପ୍ରାପ୍ତି ହେବାର ବିଶ୍ବାସ ରହିଛି।
‘ତୁହି ମା' କରମସାନି ଅପୁତ୍ରିକ କେ ପୁତ୍ର ଦାନୀ । ’ ଭାଦ୍ରବ ମାସ ଶୁକ୍ଳ ଏକାଦଶୀ ତିଥିରେ ସୁବର୍ଣ୍ଣପୁର ଜିଲ୍ଲାର ପୁରପଲ୍ଲୀର ପ୍ରତିଟି ଆଦିବାସୀ ଗାଏ ଏହି ଗୀତ। କରମା ଡାଳକୁ ବରଣ କରି ଆଣି ପୂଜା ମଣ୍ଡପରେ ପ୍ରତିଷ୍ଠା କରିଥାନ୍ତି । ରାତିରେ ମା' କରମସାନିଙ୍କୁ ମଣ୍ଡପରେ ରଖି ସାତ ପ୍ରକାର ଫୁଲ, ସାତ ପ୍ରକାର ଫଳ, ଧୂପ, ଦୀପ ଓ ନୈବେଦ୍ୟ ଦେଇ ଆରାଧନା କରିଥାନ୍ତି ଆଦିବାସୀ।
ଏହି ପର୍ବର ମୁଖ୍ୟ ଆକର୍ଷଣ ଧଙ୍ଗରା ଧାଙ୍ଗିରୀଙ୍କର କରମସାନି ନୃତ୍ୟ । ମାଦଲର ତାଳେ ତାଳେ କରମସାନି ନୃତ୍ୟରେ ମତୁଆଲା ହୋଇ ରାତିସାରା ନାଚିଥାନ୍ତି ଆଦିବାସୀ। କୃଷି ଭିତ୍ତିକ ଏହି ପର୍ବ ପାଳନ କଲେ ବର୍ଷସାରା ଅନ୍ନ ପ୍ରାପ୍ତିର ବିଶ୍ବାସ ରହିଛି।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
