ସୁବର୍ଣ୍ଣପୁର: ଆଉ ଦିନକ ପରେ ଦ୍ବିତୀୟ ପର୍ଯ୍ୟାୟ ମତଦାନ। ଏଥିଲାଗି ଆଜି ଥଲା ପ୍ରଚାରର ଶେଷ ଦିନ। ଶେଷ ଦିନରେ ଜିଲ୍ଲାରେ ଧୂଆଁଧାର ପ୍ରଚାର ହୋଇଛି । ସୋନପୁର ବିଧାନସଭା ଆସନର ବିଜେପି ପ୍ରାର୍ଥୀ ଅଶୋକ ପୂଜାରୀଙ୍କ ପାଇଁ ପ୍ରଚାର କରିଛନ୍ତି ରାଜ୍ୟ ବିଜେପି ସଭାପତି ବସନ୍ତ ପଣ୍ଡା।
ମଙ୍ଗଳବାର ସଦର ବ୍ଳକର ସାଗାରପାଲି ଗାଁରେ ଆୟୋଜିତ ନିର୍ବାଚନୀ ସଭାରେ ସାମିଲ ହୋଇଥିଲେ ବସନ୍ତ । ଭାରତୀୟ ଜନତା ପାର୍ଟିକୁ ଭୋଟ ଦେବାକୁ ଭୋଟରଙ୍କୁ ନିବେଦନ କରିଥିଲେ। କେନ୍ଦ୍ରରେ ମୋଦି ସରକାରଙ୍କ ସ୍ବଚ୍ଛ ଓ ଭ୍ରଷ୍ଟାଚାରମୁକ୍ତ ଶାସନ ତଥା ଗରିବୀ କଲ୍ୟାଣ ଯୋଜନା ସମ୍ପର୍କରେ ବସନ୍ତ ଭୋଟରଙ୍କୁ ଅବଗତ କରାଇଥିଲେ। ମୋଦିଙ୍କ ପ୍ରଂଶସା ଓ ବିଜେଡିର ଭତ୍ସନା କରି ସେ ରାଜ୍ୟ ସରକାରଙ୍କୁ ଟାର୍ଗେଟ କରିଥିଲେ। ଖଣି, ପାଣି, ଚିଟଫଣ୍ଡ ଦୁର୍ନୀତି କଥା ଉଠାଇଥିଲେ।
ଅନ୍ୟପଟେ ସ୍ଥାନୀୟ ସମସ୍ୟା ଓ ତାର ସମାଧାନ ଉପରେ ଗୁରୁତ୍ବ ଦେଇଥିଲେ ବିଜେପି ପ୍ରାର୍ଥୀ ଅଶୋକ ପୂଜାରୀ। ଗତ 10 ବର୍ଷ ଭିତରେ ବିଜେଡି ବିଧାୟକ ତଥା ମନ୍ତ୍ରୀ ନିରଞ୍ଜନ ପୂଜାରୀ କିଛି ପଦକ୍ଷେପ ନେଇନାହାଁନ୍ତି କହି ସମାଲୋଚନା କରିଥିଲେ। ଏଣୁ ରାଜ୍ୟ ଓ କେନ୍ଦ୍ରରେ ବିଜେପି ସରକାର ଗଠନ ପାଇଁ ଭୋଟ ଦେବା ପାଇଁ ଭୋଟରମାନଙ୍କୁ ଅନୁରୋଧ କରିଛନ୍ତି । ପ୍ରଚାର ଅଭିଯାନ ଶେଷ ହେବାକୁ ମାତ୍ର ଆଉ କିଛି ଘଣ୍ଟା ବାକିଥିବା ବେଳେ ଏଥର ନିର୍ବାଚନରେ ବିଜୟୀ ହେବା ପାଇଁ ଅଶୋକ ପୂଜାରୀ ବେଶ ପରିଶ୍ରମ କରୁଥିବା ଦେଖିବାକୁ ମିଳିଛି।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
