ସୁବର୍ଣ୍ଣପୁର: ଆଜି ପାତାଳୀ ଶ୍ରୀକ୍ଷେତ୍ରରେ ବୁଦ୍ଧ ବେଶରେ ଭକ୍ତଙ୍କୁ ଦର୍ଶନ ଦେବେ ବଡ ଠାକୁର । ସୁବର୍ଣ୍ଣପୁର ଶ୍ରୀଗୁଣ୍ଡିଚା ମନ୍ଦିରରେ ଜଗନ୍ନାଥ ଓ ବଳଭଦ୍ର ବୁଦ୍ଧ ବେଶରେ ଶ୍ରଦ୍ଧାଳୁଙ୍କୁ ଦର୍ଶନ ଦେବେ । ଭଗବାନଙ୍କ ଏହି ଦିବ୍ୟବେଶକୁ ଦର୍ଶନ କରିବାକୁ ଭକ୍ତଙ୍କର ପ୍ରବଳ ସମାଗମ ହେବାରେ ଲାଗିଛି ।
ଗତକାଲି ବେନିଭାଇ ଜଗନ୍ନାଥ ଓ ଶ୍ରୀ ବଳଭଦ୍ର କୃଷ୍ଣ-ବଳରାମ ବେଶ ଧାରଣ କରି ଶ୍ରଦ୍ଧାଳୁଙ୍କୁ ଦର୍ଶନ ଦେଇଥିଲେ । ସନ୍ଧ୍ୟାରେ ଏହି ବେଶ ଦେଖିବା ପାଇଁ ଶ୍ରୀଗୁଣ୍ଡିଚା ମନ୍ଦିରରେ ଭକ୍ତଙ୍କର ଲମ୍ବାଧାଡି ଲାଗିଥିଲା । ସନ୍ଧ୍ୟା 6ଟାରୁ ପ୍ରାୟ ରାତି 11 ଟା ଯାଏଁ ଶ୍ରଦ୍ଧାଳୁମାନେ ପ୍ରଭୁଙ୍କୁ ଦର୍ଶନ କରିବାର ସୌଭାଗ୍ୟଲାଭ କରିଥିଲେ।
ଶାନ୍ତି ଶୃଙ୍ଖଳାର ସହିତ ଦର୍ଶନ ପାଇଁ ଜିଲ୍ଲା ପୋଲିସ ପକ୍ଷରୁ ଗୁଣ୍ଡିଚା ମନ୍ଦିର ଗର୍ଭଗୃହରେ ସୁରକ୍ଷା କର୍ମୀଙ୍କୁ ମୁତୟନ କରାଯାଇଛି । ଜଗନ୍ନାଥ ସଂସ୍କୃତିର ଅନନ୍ୟ ପୀଠରେ ଶ୍ରଦ୍ଧାଳୁଙ୍କ ହରିବୋଲ, ହୁଳହୁଳି, ଘଣ୍ଟ, ଘଣ୍ଟା, ଶଙ୍ଖର ଗର୍ଜନ ସହିତ ନାମ ସଂକୀର୍ତ୍ତନରେ ଉଛୁଳି ଉଠୁଛି ସାରା ସହର ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
