ସୁବର୍ଣ୍ଣପୁର: ସୁବର୍ଣ୍ଣପୁର ଜିଲ୍ଲା ବୀରମହାରାଜପୁର ବ୍ଲକ କେଞ୍ଜିରିଆପାଲି ପଞ୍ଚାୟତର ଜଟିଆପାଲି ଗାଁର ଅଙ୍ଗନବାଡି କେନ୍ଦ୍ରରେ ୩ ବର୍ଷୀୟ ଝିଅ ଦେହରେ ଗରମ ପାଣି ପଡି ଗୁରୁତର ହେବା ଘଟଣାରେ କର୍ମଚାରୀମାନଙ୍କୁ ଜିଲ୍ଲାପାଳ ମଧୂସୂଦନ ମିଶ୍ର କାର୍ଯ୍ୟରୁ ବହିଷ୍କାର କରିଛନ୍ତି । ଅଙ୍ଗନବାଡି କେନ୍ଦ୍ରର ପାଚିକା ବେଦମତୀ ମହାକୁଡ ,ଅଙ୍ଗନବାଡି କର୍ମୀ ମମତା ମୁଣ୍ଡାଙ୍କୁ କାର୍ଯ୍ୟରୁ ବହିଷ୍କାର କରିବା ସହିତ ସୁପରଭାଇଜର ମମତାମୟୀ ପ୍ରଧାନଙ୍କୁ ଜିଲ୍ଲାପାଳ କାର୍ଯ୍ୟମୁକ୍ତ କରିଛନ୍ତି ।
ଗତ ମେ 14 ତାରିଖ ସକାଳୁ ଅଙ୍ଗନବାଡି କେନ୍ଦ୍ରକୁ ପଞ୍ଚାନନ ମହାକୁଡଙ୍କ ୩ ବର୍ଷୀୟ ଝିଅ ପ୍ରୀତିମୟୀ ମହାକୁଡ ଆସିଥିଲେ। କେନ୍ଦ୍ରର ପାଚିକା ବେଦମତୀ ଅଣ୍ଡା ସିଝାଇବା ପରେ ପ୍ରୀତିମୟୀ ଉପରକୁ ଗରମ ପାଣି ଫୋପାଡି ଦେଇଥିଲେ। ଏଥିରେ ପ୍ରୀତିମୟୀଙ୍କ ଶରୀରର 40 ପ୍ରତିଶତ ପୋଡି ଯାଇଥିଲା । ଅବସ୍ଥା ଗୁରୁତର ହେବାରୁ ପରିବାର ଲୋକେ ଶିଶୁକନ୍ୟାକୁ ପ୍ରଥମେ ସୁବର୍ଣ୍ଣପୁର ମୁଖ୍ୟ ଚିକିତ୍ସାଳୟରେ ପ୍ରାଥମିକ ଚିକିତ୍ସା ଦେବା ପରେ ବୁର୍ଲା ଡାକ୍ତରଖାନା ଓ ପରେ କଟକ ବଡ ମେଡିକାଲକୁ ଅଧିକ ଚିକିତ୍ସା ପାଇଁ ନେଇଥିଲେ ।
ଜିଲ୍ଲା ପ୍ରଶାସନ ଏହି ସମ୍ବେଦନଶୀଳ ଘଟଣାକୁ ହୃଦବୋଧ କରି ଜିଲ୍ଲା ରେଡକ୍ରସ ତରଫରୁ 30 ହଜାର, ଓଡିଶା ଟ୍ରିଟମେଣ୍ଟ ଫଣ୍ଡରୁ 1 ଲକ୍ଷ 90 ହଜାର ଓ ନିର୍ଭୟା ପାଣ୍ଠିରୁ 1 ଲକ୍ଷ 50 ହଜାର ଟଙ୍କାର ଆର୍ଥିକ ସହାୟତା ପ୍ରଦାନ କରିଛନ୍ତି । ଏପରିକି ପୋଲିସ, ପାଚିକାକୁ ଗିରଫ କରି କୋର୍ଟ ଚାଲାଣ କରିଥିବା ବେଳେ ଜିଲ୍ଲାପାଳ ଅଙ୍ଗନବାଡି କର୍ମୀ, ପାଚିକା ଓ ସୁପରଭାଇଜରଙ୍କ ବିରୁଦ୍ଧରେ ଦୃଷ୍ଟାନ୍ତମୂଳକ ପଦକ୍ଷେପ ଗ୍ରହଣ କରିଛନ୍ତି ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
