ସୁବର୍ଣ୍ଣପୁର: ସଦର ବ୍ଳକ ରୁଗୁଡିପାଲି ଗାଁରେ ରାସ୍ତା ପ୍ରଶସ୍ତିକରଣ ପାଇଁ ସଦର ତହସିଲ କାର୍ଯ୍ୟାଳୟ ପକ୍ଷରୁ ଜବରଦଖଲ ଉଚ୍ଛେଦ ଆରମ୍ଭ ହୋଇଛି । ତେବେ ଉଚ୍ଛେଦ ସମୟରେ ରାସ୍ତାର ଉଭୟ ପାର୍ଶ୍ବରେ ସରକାରୀ ଯାଗା ମାଡି ବସିଥିବା କିଛି ପରିବାର ଏହାକୁ ବିରୋଧ କରିବା ସହିତ ଉକ୍ତ ସ୍ଥାନରେ ଧାରଣାରେ ବସିଛନ୍ତି । ଫଳରେ ଘଟଣାସ୍ଥଳରେ ଉତ୍ତେଜନା ପ୍ରକାଶ ପାଇଛି ।
ତେବେ ତହସିଲ କାର୍ଯ୍ୟାଳୟ ପକ୍ଷରୁ ରାସ୍ତାର ଗୋଟିଏ ପାର୍ଶ୍ବରେ ଜବରଦଖଲ ଉଚ୍ଛେଦ କରାଯାଉଥିବା ମଧ୍ୟ ଅଭିଯୋଗ କରିଛନ୍ତି । ରାସ୍ତା ପ୍ରଶସ୍ତିକରଣ କାର୍ଯ୍ୟ ପାଇଁ ଯଦି ରାସ୍ତାର ଉଭୟ ପାର୍ଶ୍ବରେ ଆବଶ୍ୟକ କରୁଥିବା ଯାଗା ଉଚ୍ଛେଦ କରାଯାଏ ତେବେ ତାହା ସର୍ବମାନ୍ୟ ହେବ ବୋଲି ଗାଁଲୋକେ କହିଛନ୍ତି । ତେବେ ରାସ୍ତା ପ୍ରଶସ୍ତିକରଣ ପାଇଁ ପୂର୍ବରୁ ତହସିଲ କାର୍ଯ୍ୟାଳୟ ପକ୍ଷରୁ ଜବରଦଖଲକାରୀଙ୍କୁ ସୂଚନା ପ୍ରଦାନ କରାଯାଇଥିଲେ ମଧ୍ୟ ଆଜି ଦବରଦଖଲକାରୀ ମାନେ ଏହାକୁ ବିରୋଧ କରିଥିଲେ ।
ନନ୍ଦନମାଲରୁ ଖଲିଆପାଲିକୁ ଯାଉଥିବା ଏହି ରାସ୍ତା ପାଇଁ ଆବଶ୍ୟକ କରୁଥିବା ସରକାରୀ ଯାଗା ଆଜି ଉଚ୍ଛେଦ କରାଯାଉଥିବା ବେଳେ ଗାଁଲୋକେ ରାସ୍ତାର ଉଭୟ ପାର୍ଶ୍ବର ଯାଗା ଖାଲି କରିବାକୁ ଅନୁରୋଧ କରିଥିଲେ । ହେଲେ ପୂର୍ବ ପ୍ରସ୍ତୁତି ଅନୁଯାୟୀ ତହସିଲଦାର ମନା କରିବାରୁ ଉତ୍ତେଜନା ଦେଖା ଦେଇଥିଲା । ଫଳରେ ଘଟଣାସ୍ଥଳରେ ଜିଲ୍ଲା ପୋଲିସ ବିଭାଗ ପକ୍ଷରୁ ଜବରଦଖଲ ଉଚ୍ଛେଦ ପାଇଁ ସଦର ଆଇଆଇସି, ଏସଡିପି ଓ ସମେତ ଗୋଟିଏ ପ୍ଲାଟୁନ ପୋଲିସ ଫୋର୍ସ ମୁତୟନ କରାଯାଇଛି । ଜବରଦଖଲକାରୀଙ୍କ ବିରୋଧ ସତ୍ତ୍ବେ ପୋଲିସ ସହାୟତାରେ ଜବରଦଖଲ ଉଚ୍ଛେଦ କରାଯାଉଛି ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
