ସୁବର୍ଣ୍ଣପୁର: ଜିଲ୍ଲା ବୀରମହାରାଜପୁର ତହସିଲ କାର୍ଯ୍ୟାଳୟରେ କାର୍ଯ୍ୟରତ ରାଜସ୍ବ ନିରୀକ୍ଷକ ଅରୁଣ କୁମାର ପୁରୋହିତ ଆଜି ଜିଲ୍ଲା ଭିଜିଲାନ୍ସ ହାତରେ ଗିରଫ ହୋଇଛନ୍ତି । ବୀରମହାରାଜପୁର ତହସିଲ ଅଧିନସ୍ଥ ସଂଗ୍ରାମପୁର ଗାଁର ପ୍ରଦୀପ ପ୍ରଧାନଙ୍କ ପାଖରୁ ଅଢେଇ ହଜାର ଟଙ୍କା ଲାଞ୍ଚ ନେବା ସମୟରେ ଭିଜିଲାନ୍ସ ଦ୍ବାରା ଧରାପଡିଛନ୍ତି ।
ପ୍ରଦୀପ ନିଜ ଜମି ଡିମାର୍କେସନ ବା ଜମି ଚିହ୍ନଟ ପାଇଁ ତହସିଲ କାର୍ଯ୍ୟାଳୟରେ ଆବେଦନ କରିଥିଲେ । ଏହି ଡିମାର୍କେସନ ପାଇଁ ରାଜସ୍ବ ନିରୀକ୍ଷକ ପ୍ରଦୀପଙ୍କୁ ପାଞ୍ଚ ହଜାର ଟଙ୍କା ଦାବି କରିଥିଲେ । ପ୍ରଦୀପ ଅଢେଇ ହଜାର ଟଙ୍କା ଦେବେ କହି ଜିଲ୍ଲା ଭିଜିଲାନ୍ସର ଦ୍ବାରସ୍ଥ ହୋଇଥିଲେ । ଆଜି ପୂର୍ବ ନିର୍ଦ୍ଧାରିତ ଯୋଜନା ଅନୁଯାୟୀ ପ୍ରଦୀପ ତହସିଲ କାର୍ଯ୍ୟାଳୟକୁ ଯାଇ ରାଜସ୍ବ ନିରୀକ୍ଷକଙ୍କୁ ଡିମାର୍କେସନ ପାଇଁ ଅନୁରୋଧ କରିଥିଲେ ।
ରାଜସ୍ବ ନିରୀକ୍ଷକଙ୍କୁ ଅଢେଇ ହଜାର ଟଙ୍କା ଦେବା ପରେ ତାଙ୍କୁ ଡିମାରକେସନ ପାଇଁ କହିଥିଲେ । ପୂର୍ବରୁ ତହସିଲ କାର୍ଯ୍ୟାଳୟ ନିକଟରେ ଛପି ରହିଥିବା ଜିଲ୍ଲା ଭିଜିଲାନ୍ସ କର୍ମଚାରୀମାନେ ରାଜସ୍ବ ନିରୀକ୍ଷକ ଅରୁଣ କୁମାର ପୁରୋହିତଙ୍କ ପାଖରୁ ପ୍ରଦୀପ ପ୍ରଦାନ କରିଥିବା ଅଢେଇ ହଜାର ଲାଞ୍ଚ ଟଙ୍କା ଜବତ କରିଥିଲେ । ଆବଶ୍ୟକ ଅନୁସନ୍ଧାନ କରିବା ପରେ ଜିଲ୍ଲା ଭିଜିଲାନ୍ସ ପ୍ରଦୀପକୁ ଜିଲ୍ଲା କାର୍ଯ୍ୟାଳୟକୁ ଆଣିଛି । ପ୍ରଦୀପଙ୍କ ନାଁରେ ଏକ ଲାଞ୍ଚ ମାମଲା ରୁଜୁ କରିବା ସହିତ ଆଜି ବଲାଙ୍ଗୀର ଭିଜିଲାନସ କୋର୍ଟକୁ ଚାଲାଣ କରିବ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
