ସୁବର୍ଣ୍ଣପୁର: ବୀରମହାରାଜପୁର ସମ୍ବଲପୁର ରାଜ୍ୟ ରାଜପଥ ମହଦା ଛକଠାରେ ରାସ୍ତା ଅବରୋଧ । ବ୍ରାହ୍ମଣୀ ପାଲି ଗାଁର ଜନସାଧାରଣ ଏହି ରାସ୍ତାରୋକ କରିଛନ୍ତି । ସୁଶାନ୍ତ ନାଏକ ହତ୍ୟା ଘଟଣାର ସଂପୃକ୍ତ ଅଭିଯୁକ୍ତକୁ ଗିରଫ ଦାବିରେ ପରିବାର ଓ ଗ୍ରାମବାସୀ ଏହି ରାସ୍ତାରୋକ କରିଛନ୍ତି ।
ଗତ 10 ମାର୍ଚ୍ଚରେ ବ୍ରାହ୍ମଣିପାଲି ଗାଁର ସୁଶାନ୍ତ ଏକ ବରଯାତ୍ରୀରେ ଯାଇଥିବା ବେଳେ ତାଙ୍କୁ ହତ୍ୟା କରି ପିପିଲିପାଲିର ଏକ ପରିତ୍ୟକ୍ତ କୂଅରେ ପକାଇ ଦେଇଥିବା ସୋନପୁର ଥାନାରେ ଅଭିଯୋଗ ହୋଇଥିଲା । ତେବେ ହତ୍ୟା ଘଟଣାକୁ ୭ ମାସ ବିତିଯାଇଥିବା ବେଳେ ଏବେ ବି ପୋଲିସ ଅଭିଯୁକ୍ତ ମାନଙ୍କୁ ଗିରଫ କରିନଥିବା ଅଭିଯୋଗ ହୋଇଛି ।
ପୋଲିସ ଜାଣିଶୁଣି ଅଭିଯୁକ୍ତକୁ ସୁରକ୍ଷା ଦେଉଥିବା ପରିବାର ଲୋକ ଅଭିଯୋଗ କରିଛନ୍ତି । ବାରମ୍ବାର ଏନେଇ ପରିବାର ପକ୍ଷରୁ ଗୁହାରି କରିଥିଲେ ହେଁ କୌଣସି ପଦକ୍ଷେପ ନେଉନଥିବାରୁ ଆଜି ବାଧ୍ୟ ହୋଇ ରାସ୍ତା ଅବରୋଧ କରିଛନ୍ତି ।
ଫଳରେ ଯାତାୟାତ ବାଧାପ୍ରାପ୍ତ ହୋଇଛି । ରାସ୍ତାର ଉଭୟ ପାର୍ଶ୍ବରେ ଗାଡି ମୋଟର ଅଟକି ରହିଛି । ବୀରମହାରାଜପୁର ପୋଲିସ ଘଟଣାସ୍ଥଳରେ ପହଞ୍ଚି ଆନ୍ଦୋଳନକାରୀଙ୍କ ସହ ଆଲୋଚନା କରୁଥିବା ସୂଚନା ରହିଛି ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
