ସୁବର୍ଣ୍ଣପୁର: ପଦାରେ ପଡ଼ିଛି ସରକାରଙ୍କର ବାସ୍ତବ ବିକାଶର ଚିତ୍ର । ଗାଁକୁ ଗଡ଼ିପାରିଲାନି ଆମ୍ବୁଲାନ୍ସ । ଖଟିଆରେ ଦୁଇ କିଲୋମିଟର ବୁହାହେଲେ ଗର୍ଭବତୀ । ବୀରମହାରାଜପୁର ଉପଖଣ୍ଡ ଦୁର୍ଜନତୈଲା ପଞ୍ଚାୟତରେ ଦେଖିବାକୁ ମିଳିଛି ଏଭଳି ଦୟନୀୟ ଚିତ୍ର ।
ଆସିପାରିଲାନି ଆମ୍ବୁଲାନ୍ସ, ପୁଣି ଖଟିଆରେ ଗର୍ଭବତୀ
ଶନିବାର ବିଳମ୍ବିତ ରାତିରେ ମସିଣାପାଲି ଗ୍ରାମର ଲଳିତା ଭୋଇ ନାମକ ଜଣେ ଗର୍ଭବତୀ ମହିଳାଙ୍କର ସ୍ବାସ୍ଥ୍ୟ ଉଦବେଗ ଜନକ ରହିଥିଲା । ଗ୍ରାମର ରାସ୍ତା ଖରାପ ଯୋଗୁଁ ଆମ୍ବୁଲାନ୍ସ ଘର ଠାରୁ ଦୁଇ କି.ମି ପଛରେ ରହିଥିଲା । ଫଳରେ ଆଶାକର୍ମୀଙ୍କ ସହାୟତାରେ ଖଟିଆରେ ବୁହା ହୋଇଥିଲେ ଗର୍ଭବତୀ ।
ମଶିଣାପାଲିରୁ ଠେଙ୍ଗୋ ଡ୍ୟାମ ପର୍ଯ୍ୟନ୍ତ ରାସ୍ତା ଅତ୍ୟନ୍ତ ଖରାପ ଯୋଗୁଁ ଅଟକି ଯାଇଥିଲା ୧୦୮ ଆମ୍ବୁଲାନ୍ସ । ଗୋଟେପଟେ ରାଜ୍ୟ ସରକାର ବିକାଶର କଥା କହୁଥିବା ବେଳେ ଅନ୍ୟପଟେ ଗୋଟେ ପରେ ଗୋଟେ ଜନନୀ ଯନ୍ତ୍ରଣା ଭଳି ଘଟଣା ସାମ୍ନାକୁ ଆସିଛି । ଯାହାକୁ ନେଇ ସାଧାରଣରେ ଅସନ୍ତୋଷ ପ୍ରକାଶ ପାଇଛି ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
