ସୁବର୍ଣ୍ଣପୁର: କ୍ବାରେଣ୍ଟାଇନ ନିୟମକୁ କଡାକଡି କରିଛି ଜିଲ୍ଲା ପୋଲିସ । ବାହାର ରାଜ୍ୟରୁ ଆସିଥିବା ଲୋକଙ୍କୁ କ୍ବାରେଣ୍ଟାଇନରେ ରଖାଯାଉଛି । ଯିଏ ନିଜେ ତଥ୍ୟ ନ ଦେଉଛି ପୋଲିସ ଖୋଜିଖୋଜି ଆଣି ସେମାନଙ୍କୁ ସେଣ୍ଟରରେ ରଖୁଛି ।
ଜିଲ୍ଲାର ବୀରମହାରାଜପୁର ଥାନା ଅନ୍ତର୍ଗତ ହିଲୁଙ୍ଗ ଗ୍ରାମପଞ୍ଚାୟତର ଅସ୍ଥାୟୀ ସ୍ବାସ୍ଥ୍ୟ ଶିବିରରେ 10 ଜଣଙ୍କୁ କ୍ବାରେଣ୍ଟାଇନରେ ରଖାଯାଇଛି । ଏମାନେ ସମସ୍ତେ ଦିଲ୍ଲୀରୁ ଫେରିଥିବା ସୂଚନା ମିଳିଛି । ନିର୍ଦ୍ଦିଷ୍ଟ ଧର୍ମ ଓ ସଂପ୍ରଦାୟର ଏହି 10 ବ୍ୟକ୍ତି ବୀରମହାରାଜପୁରର ଜଣେ ବ୍ୟକ୍ତିଙ୍କ ଘରେ ରହିଥିଲେ । ସେମାନଙ୍କୁ ବୀରମହାରାଜପୁର ପୋଲିସ ଆଣି ସ୍ଥାନୀୟ ଗୋଷ୍ଠୀ ଉନ୍ନୟନ ଅଧିକାରୀଙ୍କ ପାଖରେ ଜିମା ଦେଇଥିଲେ ।
ପରେ ଅଧିକାରୀ ସେମାନଙ୍କୁ 14 ଦିନ ପାଇଁ ହିଲୁଙ୍ଗ ଅସ୍ଥାୟୀ ଶିବିରରେ କ୍ବାରେଣ୍ଟାଇନରେ ରଖିବା ପରେ ଜିଲ୍ଲାପାଳ ମନୀଷା ବାନାର୍ଜୀଙ୍କୁ ଏହା ସମ୍ପର୍କରେ ଜଣାଇଛନ୍ତି । ଏବେ ଜିଲ୍ଲାରେ ପୋଲିସ ପ୍ରଶାସନ ପକ୍ଷରୁ କଡାକଡି ଲକଡାଉନ କରାଯାଇଛି । ଏହାସହ ବିଦେଶ ଓ ବାହାର ରାଜ୍ୟ ଫେରନ୍ତା ବ୍ୟକ୍ତି ବିଶେଷଙ୍କୁ ଅସ୍ଥାୟୀ ସ୍ବାସ୍ଥ୍ୟ ଶିବିରରେ ରଖାଯାଉଛି ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
