ସୁବର୍ଣ୍ଣପୁର: ବେଆଇନ ଟିକସ ଆଦାୟକୁ ବିରୋଧ କରି ଟୋଲଗେଟ ବନ୍ଦ କରିବାକୁ ଜୋର ଧରିଛି ଦାବି । ସୁବର୍ଣ୍ଣପୁର ଜିଲ୍ଲା ନଣନ୍ଦମାଲ ଛକରେ ଥିବା ଅଙ୍ଗନଦୀ ପୋଲ ଟୋଲଗେଟରୁ ବେଆଇନ ଭାବେ ଟିକସ ଆଦାୟ ହେଉଥିବା ଅଭିଯୋଗ ହୋଇଛି। ଯାହାକୁ ନେଇ ସ୍ବେଚ୍ଛାସେବୀ ସଙ୍ଗଠନ ପରିବର୍ତ୍ତନ ପକ୍ଷରୁ ଟୋଲଗେଟ ଉଚ୍ଛେଦ ଦାବିରେ ବିକ୍ଷୋଭ ପ୍ରଦର୍ଶନ କରାଯାଇଛି ।
1993 ମସିହାରୁ ଏହି ଟୋଲଗେଟରୁ ଟିକସ ଆଦାୟ କରାଯାଇ ଆସୁଛି। ଏଯାଏଁ ପ୍ରାୟ 6 କୋଟି 50 ଲକ୍ଷରୁ ଅଧିକ ଟଙ୍କାର ରାଜସ୍ବ ଆଦାୟ କରାଯାଇଛି। ଏପରିକି ପୋଲର ବ୍ୟୟ ଅଟକଳରୁ ଦେଢ଼ଗୁଣା ରାଜସ୍ବ ଆଦାୟ ହୋଇ ସାରିଥିଲେ ମଧ୍ୟ ଟୋଲଗେଟ ଉଚ୍ଛେଦ କରାଯାଉ ନଥିବା ଅଭିଯୋଗ ହୋଇଛି ।
ତୁରନ୍ତ ଏହି ଟୋଲଗେଟକୁ ଉଚ୍ଛେଦ କରିବା ଦାବିରେ ସ୍ବେଚ୍ଛାସେବୀ ବଳଦେବ ବେଦବାକଙ୍କ ନେତୃତ୍ବରେ ଶତାଧିକ ଯୁବକ ବିକ୍ଷୋଭ ପ୍ରଦର୍ଶନ କରି ଜିଲ୍ଲାପାଳ ମନୀଷା ବାନାର୍ଜୀଙ୍କୁ ଏକ ଦାବିପତ୍ର ପ୍ରଦାନ କରିଛନ୍ତି । ଆଗାମୀ ଦିନରେ ଦାବି ପୂରଣ ନହେଲେ ଆଗକୁ ଆନ୍ଦୋଳନ ବ୍ୟାପକ କରିବେ ବୋଲି ଆନ୍ଦୋଳନକାରୀ ସ୍ବେଚ୍ଛାସେବୀ କହିଛନ୍ତି ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ