ଭୁବନେଶ୍ବର: ବାତ୍ୟା ‘ଦାନା’କୁ ନେଇ ସମଗ୍ର ଉପକୂଳରେ ହାଇ ଆଲର୍ଟ । ଏପରି ସ୍ଥିତିରେ ସାମ୍ନାକୁ ଆସିଛନ୍ତି ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ବାତ୍ୟା ପରିପ୍ରେକ୍ଷୀରେ ଲୋକଙ୍କୁ ବିରୋଧୀ ଦଳ ନେତା ନିବେଦନ କରିଛନ୍ତି ଓ ପରାମର୍ଶ ମଧ୍ୟ ଦେଇଛନ୍ତି । ଭୟ ନକରି ସଜାଗ ରହିବାକୁ ନବୀନ ଦେଇଛନ୍ତି ପରାମର୍ଶ । ଜୀବନ ଅମୂଲ୍ୟ ତେଣୁ ପ୍ରଶାସନକୁ ପୁରା ସହଯୋଗ କରନ୍ତୁ ବୋଲି ସେ ନିବେଦନ କରିଛନ୍ତି ।
- ‘ପୂର୍ବରୁ ସାମ୍ନା କରିଛନ୍ତି, ଏବେବି ଡରିବାନି’
ସମ୍ଭାବ୍ୟ ବାତ୍ୟା ପରିପ୍ରେକ୍ଷୀରେ ବିରୋଧୀ ଦଳ ନେତା ନବୀନ ପଟ୍ଟନାୟକ ରାଜ୍ୟବାସୀଙ୍କ ଉଦ୍ଦେଶ୍ୟରେ ଏକ ଭିଡିଓ ବାର୍ତ୍ତା ଜାରି କରିଛନ୍ତି । ନବୀନ କହିଛନ୍ତି, ବାତ୍ୟା ଆସୁଥିବା ଖବର ପାଇ ଆମେ ସମସ୍ତେ ଚିନ୍ତିତ । ପୂର୍ବରୁ ଆମେ ସମସ୍ତେ ମିଶି ସଫଳତା ସହ ଅନେକ ବାତ୍ୟାର ମୁକାବିଲା କରିଛେ । ଆମର ଏକ ବହୁତ ସଫଳ ବିପର୍ଯ୍ୟୟ ପରିଚାଳନା ରଣନୀତି ରହିଛି । ତେଣୁ ଆପଣମାନଙ୍କୁ ମୋର ଅନୁରୋଧ ବାତ୍ୟା ପାଇଁ ଆପଣମାନେ ଭୟଭୀତ ହୁଅନ୍ତୁ ନାହିଁ । ସଜାଗ ରୁହନ୍ତୁ, ଜୀବନ ଅମୁଲ୍ୟ, ନିରାପଦ ରୁହନ୍ତୁ । ବାତ୍ୟା ମୁକାବିଲାରେ ପ୍ରଶାସନକୁ ପୂରା ସହଯୋଗ ଦିଅନ୍ତୁ । ନବୀନ ଆହୁରି ମଧ୍ୟ କହିଛନ୍ତି, "ସବୁ ନିର୍ବାଚିତ ପ୍ରତିନିଧିମାନଙ୍କୁ ମୋର ଅନୁରୋଧ ଆପଣମାନେ ଏ ବିପଦ ସମୟରେ ଲୋକଙ୍କ ସହ ରୁହନ୍ତୁ । ଲୋକଙ୍କୁ ସାହାଯ୍ୟ କରନ୍ତୁ । ମୋର ଦୃଢ଼ ବିଶ୍ୱାସ ଆମେ ସମସ୍ତେ ଏକାଠି ପୂର୍ବ ପରି ବାତ୍ୟା ଦାନାର ସଫଳ ମୁକାବିଲା କରିପାରିବା ।"
ସଚେତନତା ଓ ସତର୍କତା ହିଁ ସମ୍ଭାବ୍ୟ ବାତ୍ୟା 'ଦାନା'ରୁ ଆମକୁ ସୁରକ୍ଷିତ କରିବ। ବିଭିନ୍ନ ସମୟରେ ବାତ୍ୟା ଆସିଛି, ଆଉ ଆମେ ଏହାର ଦୃଢ଼ତାର ସହ ମୁକାବିଲା କରିଛେ। ସବୁ ବାତ୍ୟା ପରି ଏଥର ମଧ୍ୟ ସୁରକ୍ଷିତ ରହିବା ପାଇଁ ସମସ୍ତ ପଦକ୍ଷେପ ଗ୍ରହଣ କରିବା। ନିଜର ଏବଂ ପ୍ରିୟଜନଙ୍କ ଯତ୍ନ ନେବା। ଭୟଭୀତ ନ ହୋଇ, ଆମେ ସମସ୍ତେ ସଜାଗ ରହିବା।…
— Naveen Patnaik (@Naveen_Odisha) October 22, 2024
ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ସମ୍ଭାବ୍ୟ ବାତ୍ୟା ଓ ପ୍ରବଳ ବୃଷ୍ଟିପାତ ପରିପ୍ରେକ୍ଷୀରେ ଜିଲ୍ଲା ପ୍ରଶାସନ ସହିତ ସମନ୍ୱିତ ଭାବେ ବାତ୍ୟା ମୁକାବିଲା କରିବା ପାଇଁ ବିଧାୟକ ଓ ବିଧାୟିକାଙ୍କୁ ପରାମର୍ଶ ଦେଇଛନ୍ତି । ଏହା ସହିତ ରିଲିଫ ଓ ଉଦ୍ଧାରକାର୍ଯ୍ୟକୁ ତ୍ୱରାନ୍ୱିତ କରିବା ପାଇଁ ସମସ୍ତ ବିଧାୟକ ଓ ବିଧାୟିକାମାନେ ନିଜ ନିଜ ନିର୍ବାଚନ ମଣ୍ଡଳୀରେ ଉପସ୍ଥିତ ରହିବା ଆବଶ୍ୟକ । ସମସ୍ତ ବିଧାୟକ ଓ ବିଧାୟିକା ନିଜ ନିଜ ଅଞ୍ଚଳବାସୀଙ୍କ ସହିତ ରହି ସେମାନଙ୍କୁ ଆବଶ୍ୟକୀୟ ସହାୟତା ଦେବା ପାଇଁ ଯଥା ସମ୍ଭବ ଚେଷ୍ଟିତ ହୁଅନ୍ତୁ ବୋଲି ମୁଖ୍ୟମନ୍ତ୍ରୀ ଟ୍ବିଟ କରି ନିବେଦନ କରିଥିଲେ ।
ସମ୍ଭାବ୍ୟ ବାତ୍ୟା 'ଦାନା' ନେଇ ଭୟଭୀତ ହୁଅନ୍ତୁ ନାହିଁ। ସଜାଗ ରୁହନ୍ତୁ, ନିରାପଦ ରୁହନ୍ତୁ। ଜୀବନ ବଡ଼ ଅମୂଲ୍ୟ। ପୂର୍ବ ପରି ଆମେ ସମସ୍ତେ ଏକାଠି ଏଥର ମଧ୍ୟ ବାତ୍ୟାର ସଫଳ ମୁକାବିଲା କରିପାରିବା ବୋଲି ମୋର ଦୃଢ଼ ବିଶ୍ୱାସ। #EveryLifeIsPrecious #CycloneDana #Odisha pic.twitter.com/XKodMQ0ka2
— Naveen Patnaik (@Naveen_Odisha) October 23, 2024
- ବିପର୍ଯ୍ୟୟ ମୁକାବିଲାରେ ନବୀନଙ୍କର ରହିଛି ଲମ୍ବା ଅଭିଜ୍ଞତା
ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କର ଦୀର୍ଘ ବର୍ଷ ଶାସନରେ ରାଜ୍ୟ ଏକାଧିକ ସାମୁଦ୍ରିକ ବାତ୍ୟାର ସମ୍ନା କରିଛି । ୧୯୯୯ ମହାବାତ୍ୟା ପରେ ନବୀନ ରାଜ୍ୟରେ ଗାଦି ସମ୍ଭାଳିଥିଲେ । ମହାବାତ୍ୟା ପରବର୍ତ୍ତୀ ଆର୍ଥନୈତିକ ସ୍ଥିତି ଓ ପରେ ଏକାଧିକ ବାତ୍ୟାର ସାମ୍ନା କରିଥିଲା ଓଡିଶା । ଏହା ମଧ୍ୟରେ ‘ଫନି’ ଓ ‘ଫାଇଲିନ’ ପରି ବଡ ବାତ୍ୟା ମଧ୍ୟ ରହିଛି । କେନ୍ଦ୍ର-ରାଜ୍ୟ ସହଯୋଗରେ ନବୀନଙ୍କ ନେତୃତ୍ବରେ ଏକାଧିକ ବାତ୍ୟାର ସଫଳ ମୁକାବିଲା ମଧ୍ୟ କରିବାରେ ଓଡିଶା ସଫଳ ମଧ୍ୟ ହୋଇଛି ।
ଇଟିିଭି ଭାରତ, ଭୁବନେଶ୍ବର
