ସୁବର୍ଣ୍ଣପୁର: ତେଲେଙ୍ଗାନାରୁ ଉଦ୍ଧାର ହେଲେ ଓଡିଆ ଦାଦନ ଶ୍ରମିକ ପରିବାର । ସୁବର୍ଣ୍ଣପୁର ଜିଲ୍ଲା ଶ୍ରମ ଅଧିକାରୀ ତେଲେଙ୍ଗାନାରୁ ଏକ ଓଡିଆ ଦାଦନ ଶ୍ରମିକ ପରିବାରଙ୍କୁ ଉଦ୍ଧାର କରିଛନ୍ତି ।
ଗତ ନଭେମ୍ବର ଦ୍ଵିତୀୟ ସପ୍ତାହରେ ଉଲୁଣ୍ଡା ବ୍ଲକ ଢେଳେଇ ଗାଁର ସୁରେନ୍ଦ୍ର ଭରାସାଗର ନିଜ ପତ୍ନୀ ଓ ଝିଅକୁ ଧରି ଇଟା ଗଢିବା ପାଇଁ ତେଲେଙ୍ଗାନାର ବାଗାନପେଟକୁ ଯାଇଥିଲେ । ସେଠାରେ ସେମାନେ ଦୈନିକ ଖାଇବା ବାବଦ ମଜୁରୀ ପାଇଁ ଇଟା ଗଢୁଥିଲେ ।
ହେଲେ ଦୁଇ ମାସ ପରେ ସୁରେନ୍ଦ୍ର ମାଲିକଙ୍କୁ ମଜୁରୀ ମାଗିବାରୁ ତାଙ୍କ ମଜୁରୀ ଦଲାଲକୁ ଦେଇଦେଇଥିବା ମାଲିକ କହିଥିଲେ । ଏହାପରେ ସୁରେନ୍ଦ୍ର ଦଲାଲଙ୍କୁ ପଚାରିବାରୁ ସେ ଟଙ୍କା ପାଇନଥିବା କହିଥିଲେ ।
ଏହାପରେ ସୁରେନ୍ଦ୍ର ପୁଣିଥିରେ ମାଲିକଙ୍କ ପାଖକୁ ଯାଇ ମଜୁରୀ ବାବଦରେ ପଚାରିବାରୁ ମାଲିକ ତାଙ୍କର ମୋବାଇଲ ଛଡାଇ ନେବା ସହ ଜଗୁଆଳି ଲଗାଇ ଜୋର ଜବରଦସ୍ତ କାମ ଆଦାୟ କରୁଥିବା ସୁରେନ୍ଦ୍ର ନିଜ ଭାଇଙ୍କୁ ଜଣାଇଥିଲେ ।
ଏହାପରେ ତାଙ୍କ ଭାଇ ଜିଲ୍ଲା ଶ୍ରମ ଅଧିକାରୀଙ୍କ ପାଖରେ ଏନେଇ ଏକ ଅଭିଯୋଗ କରିଥିଲେ । ଅଭିଯୋଗ ପାଇବା ପରେ ଶ୍ରମ ବିଭାଗ ପକ୍ଷରୁ ସେଠାକାର ଆରକ୍ଷୀ ଅଧିକ୍ଷକଙ୍କ ସହିତ ଯୋଗାଯୋଗ କରି ସୁରେନ୍ଦ୍ରଙ୍କ ପରିବାରକୁ ସେଠାରୁ ଉଦ୍ଧାର କରାଯାଇଛି ।
ଏଥିସହ ସୁରେନ୍ଦ୍ରଙ୍କ ପରିବାରକୁ ଟ୍ରେନ ଯୋଗେ ବଲାଙ୍ଗୀର ପଠାଇ ଜିଲ୍ଲା ଶ୍ରମ ଅଧିକାରୀ ତାଙ୍କୁ କାମ ଯୋଗାଇ ଦେବାକୁ ଗ୍ରାମ ପଞ୍ଚାୟତ ଅଧିକାରୀଙ୍କୁ ଅନୁରୋଧ କରିଛନ୍ତି ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
