ସୁବର୍ଣ୍ଣପୁର: ଜିଲ୍ଲାର ବିନିକା ବ୍ଳକ ଅନ୍ତର୍ଗତ ସଂସାମୁରା ଗାଁର 30 ଗୋଟି ପରିବାର ଲୋକେ ଆଜି (ସୋମବାର) ଜିଲ୍ଲାପାଳଙ୍କ ବାସଭବନ ଓ କାର୍ଯ୍ୟାଳୟ ଆଗରେ ନୀରବ ବିକ୍ଷୋଭ ପ୍ରଦର୍ଶନ କରିଛନ୍ତି । ଦୀର୍ଘ ୧୦୦ ବର୍ଷରୁ ସେମାନେ ରହିଆସୁଥିବା ସରକାରୀ ଜମିକୁ ଅନ୍ୟ ଲୋକଙ୍କୁ ପଟ୍ଟା ପ୍ରଦାନ କରାଯାଇ ସେମାନଙ୍କୁ ଜାଗା ଛାଡିବାକୁ ଧମକ ଚମକ ଦେଉଥିବା ନେଇ ଅଭିଯୋଗ କରିଛନ୍ତି ।
ଗାଁର ଦାରିଦ୍ର୍ୟ ସୀମାରେଖା ତଳେ ବସବାସ କରୁଥିବା ଏହି ପରିବାର ଦୀର୍ଘ ୧୦୦ରୁ ଅଧିକ ବର୍ଷ ହେଲା ସରକାରୀ ଜମିରେ ଘର କରି ରହୁଥିବା ଦାବି କରିଛନ୍ତି । ତେବେ ବିନିକା ତହସିଲଦାର ଘର କରାଯାଇଥିବା ଜମିକୁ ଅନ୍ୟ ଲୋକଙ୍କୁ ପଟ୍ଟା ପ୍ରଦାନ କରିଥିବା ନେଇ ଅଭିଯୋଗ କରିଛନ୍ତି । କେତେକ ଲୋକ ସରକାରୀ ବାବୁ ମାନଙ୍କୁ ହାତେଇ ପଟ୍ଟା କରି ନେଇଥିବା ବେଳେ ଜାଗା ଛାଡି ଦେବା ପାଇଁ ସେମାନଙ୍କୁ ଧମକ ଚମକ ଦେଉଥିବା ଅଭିଯୋଗ କରିଛନ୍ତି ।
ତେବେ ଏହି ପରିବାରଗୁଡିକୁ ଘର କରି ରହୁଥିବା ସ୍ଥାନରେ ଜମି ପଟ୍ଟା ପ୍ରଦାନ କରିବା ପାଇଁ ଜିଲ୍ଲାପାଳଙ୍କୁ ନିବେଦନ କରିଛନ୍ତି । ଜିଲ୍ଲା ପ୍ରଶାସନ ଏହି ଗରିବ ପରିବାରଙ୍କ ସମସ୍ୟାକୁ ବିଚାର କରି ନ୍ୟାୟ ପ୍ରଦାନ କରିବାକୁ ଦାବୀ କରିଛନ୍ତି ।
ଇଟିଭି ଭାରତ, ସୁବର୍ଣ୍ଣପୁର
