ସୁବର୍ଣ୍ଣପୁର: ପାତାଳୀ ଶ୍ରୀକ୍ଷେତ୍ର ଭାବେ ପରିଚିତ ସୁବର୍ଣ୍ଣପୁରରେ ଆଜି(ଗୁରୁବାର) ମହାପ୍ରଭୁଙ୍କ ଦେବସ୍ନାନ ପୂର୍ଣ୍ଣିମା ପାଳିତ ହୋଇଛି । ସହରର ଶ୍ରୀ ବଡ ଜଗନ୍ନାଥ ମନ୍ଦିରରେ ତିନି ବିଗ୍ରହଙ୍କୁ ସ୍ନାନ କରାଯାଇଥିବାବେଳେ ଜିଲ୍ଲାର କୋଟସମଲାଇ ପାତାଳୀ ଶ୍ରୀକ୍ଷେତ୍ରରେ ବି ପାରମ୍ପରିକ ରୀତିନୀତିରେ ଏହି ପର୍ବ ଅନୁଷ୍ଠିତ ହୋଇଛି । ଦେବୋତ୍ତର ଅଧିକାରୀ ତଥା ଉପ ଜିଲ୍ଲାପାଳ ନରେନ୍ଦ୍ର କଅଁରଙ୍କ ଅଧ୍ୟକ୍ଷତାରେ ଆୟୋଜିତ ବୈଠକରେ କୋଭିଡ ନିୟମ ପାଳନ କରି ଦେବ କାର୍ଯ୍ୟ ସମ୍ପନ୍ନ କରିବା ପାଇଁ ନିଷ୍ପତ୍ତି ହୋଇଥିଲା । ସେହି ଆଧାରରେ ସେବାୟତମାନେ ସୀମିତ ସଂଖ୍ୟାରେ ଯୋଗ ଦେଇ ବିଗ୍ରହଙ୍କ ସ୍ନାନ ପର୍ବ ପାଳନ କରିଛନ୍ତି ।
ସ୍ନାନ ନୀତି ସମୟରେ ମାସ୍କ ପରିଧାନ କରିବା ସହିତ ଯଥାସମ୍ଭବ ସାମାଜିକ ଦୂରତ୍ବ ରକ୍ଷା କରାଯାଇଛି । ସେହିପରି ମନ୍ଦିର ପରିସରକୁ ସାନିଟାଇଜ କରାଯାଇଛି । ତେବେ ଏଥର ବିଗ୍ରହମାନଙ୍କୁ ରଥାଋଢ କରାନଯାଇ ରଥଯାତ୍ରା ପାଳନ କରିବା ପାଇଁ ଦେବୋତ୍ତର ବିଭାଗ ନିଷ୍ପତ୍ତି ନେଇଛି । ମହାମାରୀ କୋରୋନା ପାଇଁ ସର୍ବସାଧାରଣ ଦର୍ଶନକୁ ବାରଣ କରାଯାଇଥିବାବେଳେ କେବଳ ନୀତିକାନ୍ତି ଅନୁଯାୟୀ ସ୍ନାନ ପୂର୍ଣ୍ଣିମା ପାଳନ କରାଯାଇଛି ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
