ସୁବର୍ଣ୍ଣପୁର: ଆସୁଛି ପଶ୍ଚିମ ଓଡିଶାର ଗଣପର୍ବ ନୂଆଁଖାଇ । ପ୍ରତିବର୍ଷ ପରି ଏଥର ମଧ୍ୟ ସୋନପୁର ଗଡଜାତବାସୀ ନବାନ୍ନ ପାଳନ କରିବେ । ଏଥିପାଇଁ ଲଗ୍ନ ଧାର୍ଯ୍ୟ କରାଯାଇଛି । ଭାଦ୍ରବ ଋଷି ପଞ୍ଚମୀ ଶୁକ୍ଲପକ୍ଷ ତୁଳା ଲଗ୍ନ ନବାଂଶରେ ସକାଳ ଅମୃତ ଲଗ୍ନ 9 ଘଣ୍ଟା 30 ମିନିଟରୁ 9 ଘଣ୍ଟା 44 ମିନିଟ ମଧ୍ୟରେ ନବାନ୍ନ ସମର୍ପଣ ଓ ଭକ୍ଷଣ ପାଇଁ ପଣ୍ଡିତମାନେ ଲଗ୍ନ ସ୍ଥିର କରିଛନ୍ତି । ଆଗାମୀ 23 ତାରିଖ ରବିବାର ଦିନ ଆନନ୍ଦ ଉଲ୍ଲାସର ସହିତ ସୋନପୁର ଗଡଜାତବାସୀ ନବନ୍ନା ପାଳନ କରିବେ। ହେଲେ ଏଥର ଜିଲ୍ଲା ପ୍ରଶାସନ ପକ୍ଷରୁ ନୂଆଁଖାଇ ପାଇଁ ଏଯାଏଁ ଅନୁମତି ମିଳିନାହିଁ।
କିଛି ସ୍ବେଚ୍ଛାସେବୀଙ୍କ ପ୍ରୟାସରେ ସୋନପୁର ଗଡଜାତ ପାଇଁ ଲଗ୍ନ ସ୍ଥିର କରାଯାଇଛି। ଏଥିସହ ରାଜରାଜୁଡା ଅମଳରୁ ସୁବର୍ଣ୍ଣପୁରର ଅଧିଷ୍ଠାତ୍ରୀ ଦେବୀ ସୁରେଶ୍ବରୀ ଓ ଅନ୍ୟାନ୍ୟ ଦେବାଦେବୀଙ୍କ ପାଖକୁ ସମଲେଶ୍ବରୀ ମନ୍ଦିରରୁ ପାହୁର୍ ଭୋଗ ଯିବାକୁ ମଧ୍ୟ ଲଗ୍ନ ସ୍ଥିର ହୋଇଛି । ଗଡଜାତର ଲୋକଦେବୀ ସୁରେଶ୍ବରୀଙ୍କ ନାମରେ ଗଣନା କରି ଏହି ନବାନ୍ନ ଲଗ୍ନ ସ୍ଥିର ହୋଇଛି ।ହେଲେ ପ୍ରଶାସନ ପକ୍ଷରୁ ଦେବଦେବୀଙ୍କ ପୂଜା ଆରାଧନା ଓ ପାହୁର ପାଇଁ ଜିଲ୍ଲା ପ୍ରଶାସନ ଅନୁମତି ଦେଇ ନାହାନ୍ତି। ଫଳରେ ଦେବୀ ପୀଠ ଗୁଡ଼ିକରେ ନବାନ୍ନ ସମର୍ପଣ ପାଇଁ କୌଣସି ବ୍ୟବସ୍ଥା ଏଯାଏଁ କରାଯାଇ ପାରିନାହିଁ। ତେବେ ଏ ସମ୍ପର୍କରେ ଆଗକୁ ନିଷ୍ପତ୍ତି ନିଆଯିବ ବୋଲି ଜିଲ୍ଲାପାଳ ମନୀଷା ବାନାର୍ଜୀ କହିଥିବା ବେଳେ ଗଡଜାତବାସୀ ନୂଆଁଖାଇ ପାଳନକୁ ନେଇ ଅନିଶ୍ଚିତତା ଭିତରେ ଅଛନ୍ତି।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
