ସୁବର୍ଣ୍ଣପୁର: ଟାଉନ ଥାନା ପୋଲିସ ଆଜି ବିପୁଳ ପରିମାଣର ଗଞ୍ଜେଇ ଜବତ କରିଛି । ସହରର ନଳିନୀ ଛକ ପାଖ ହନୁମାନ ମନ୍ଦିର ନିକଟରେ ପୋଲିସ କର୍ମଚାରୀମାନେ ଏକ ଟ୍ରକ ଉପରେ ଚଢ଼ାଉ କରି ଗଞ୍ଜେଇ ବୋଝେଇ ଗାଡି ଜବତ କରିଛନ୍ତି ।
ସୁବର୍ଣ୍ଣପୁର ଜିଲ୍ଲା ଟାଉନ ଥାନା ପୋଲିସର ଚଢାଉ: ବିପୁଳ ପରିମାଣରେ ଗଞ୍ଜେଇ ଜବତ
ସୂଚନା ଅନୁଯାୟୀ ବୌଦ୍ଧ ଜିଲ୍ଲା ପଟରୁ CG -10 C 9760 ଏକ ବଡ଼ ଟ୍ରକରେ ରାଜ୍ୟ ବାହାରକୁ ଗଞ୍ଜେଇ ଚୋରା ଚାଲାଣ ହେଉଥିବା ଖବର ପାଇ ସଦର ଟାଉନ ଥାନା ପୋଲିସ ଗାଡିକୁ ନଳିନୀ ଛକ ନିକଟରେ କାବୁ କରିଥିଲେ । ଗାଡ଼ି ଡ୍ରାଇଭର ଗାଡି ଛାଡି ଫେରାର ହୋଇ ଯାଇଥିବା ଜଣାପଡ଼ିଛି ।
ସୋନପୁର ଥାନା ଅଧିକାରୀ ଓ ସଦର ତହସିଲ କାର୍ଯ୍ୟାଳୟର ଅତିରିକ୍ତ ତହସିଲଦାରଙ୍କ ଉପସ୍ଥିତରେ ଗାଡ଼ିରେ ଥିବା ଗଞ୍ଜେଇ ଓଜନ କରାଯାଇଥିଲା। ଗାଡି ଭିତରୁ ମୋଟ 2 କ୍ୟୁଇଣ୍ଟାଲ 41 କେଜି 7 ଶହ ଗ୍ରାମ ଗଞ୍ଜେଇ ବାହାରିଥିଲା । ମାଜିଷ୍ଟ୍ରେଟଙ୍କ ଉପସ୍ଥିତିରେ ସେହି ଗଞ୍ଜେଇ ଓଜନ କରାଯାଇ ଗଞ୍ଜେଇ ଗାଡିଟିକୁ ପୋଲିସ ଜବତ କରି ଅନୁସନ୍ଧାନ କରୁଛି ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
