ସୁବର୍ଣ୍ଣପୁର: ସାମାଜିକ ଦୂରତାକୁ ସରକାରୀ କର୍ମଚାରୀଙ୍କ ବେଖାତିର । ଦେଶରେ କୋରୋନା ସଂକ୍ରମଣ ବଢାଚାଲିଥିବା ସତର୍କତା ଅବଲମ୍ବନ କରିବା ସହ ସାମାଜିକ ଦୂରତା ବଜାୟ ରଖିବାକୁ ସରକାରଙ୍କ ପକ୍ଷରୁ ବାରମ୍ବାର ଅପିଲ କରାଯାଉଛି । ହେଲେ ତରଭା ଗୋଷ୍ଠୀ ଉନ୍ନୟନ ଅଧିକାରୀ ସାମାଜିକ ଦୂରତା ରକ୍ଷା କରୁନଥିବା ଦେଖିବାକୁ ମିଳିଛି ।
କୋଭିଡ-19 ନେଇ ଆଲଚନା ପାଇଁ ଜିଲ୍ଲାପାଳଙ୍କ କାର୍ଯ୍ୟାଳୟକୁ କର୍ମଚାରୀମାନଙ୍କ ସହିତ ଆସିଥିଲେ ଗୋଷ୍ଠୀ ଉନ୍ନୟନ ଅଧିକାରୀ ନିହାର ରଞ୍ଜନ କଅଁର । ସେ ସାତ ଜଣ ସରକାରୀ କର୍ମଚାରୀଙ୍କ ସହିତ ଗୋଟିଏ ବୋଲେରୋ ଗାଡ଼ିରେ ଆସିଥିବା ଦେଖିବାକୁ ମିଳିଛି । କର୍ମଚାରୀଙ୍କ ଭିତରେ କେହିବି ସାମାଜିକ ଦୂରତା ରକ୍ଷା କରୁନଥିଲେ । ଏପରିକି ଜିଲ୍ଲାପଙ୍କ କାର୍ଯ୍ୟାଳୟ ଆଗରେ ହାତ ଧୋଇବା ପାଇଁ ଆବଶ୍ୟକ ବ୍ୟବସ୍ଥା ଥିଲେ ମଧ୍ୟ କର୍ମଚାରୀମାନେ ହାତ ନଧୋଇ କାର୍ଯ୍ୟାଳୟ ଭିତରକୁ ପ୍ରବେଶ କରିଥିଲେ । ତେବେ ଏନେଇ ସାମ୍ବାଦିକମାନେ ବିଡ଼ିଓଙ୍କୁ ପଚାରିବାରୁ ସେ ହସିଦେଇ କାର୍ଯ୍ୟାଳୟ ଭିତରକୁ ଚାଲିଯାଇଥିଲେ । ବିଡ଼ିଓଙ୍କ ଏପରି ଅବହେଳା ପ୍ରଦର୍ଶନକୁ ବିଭିନ୍ନ ମହଲରେ ସମାଲୋଚନା କରାଯାଉଛି ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
