ସୁବର୍ଣ୍ଣପୁର: ବିରମହାରାଜପୁର ପୋଲିସ ଜବତ କଲା ଗଞ୍ଜେଇ । ଗୋଟିଏ ନମ୍ବର ବିହୀନ କାର ସହିତ ଏକ କ୍ୟୁଣ୍ଟାଲ ଗଞ୍ଜେଇ ଜବତ କରିଛି ପୋଲିସ ।
ସୂଚନା ଅନୁଯାୟୀ ଜିଲ୍ଲାର ବୀରମହାରାଜପୁର ଥାନା ଅନ୍ତର୍ଗତ ହିକୁଡି ବିଟ ହାଉସ ଆଗରେ ପୋଲିସକୁ ଦେଖି ଭୟରେ ଗଞ୍ଜେଇ ଗାଡିଟି ଟୋଲ୍ ଗେଟକୁ ଧକ୍କାଦେଇ ପଳେଇବା ପାଇଁ ଚେଷ୍ଟା କରୁଥିଲା । ଏହି ସମୟରେ ପୋଲିସ ଗାଡିକୁ ପିଛା କରିବାରୁ ଭୟରେ ରାସ୍ତାନପାଇ ବୀରମହାରାଜପୁର ଥାନା ଅନ୍ତର୍ଗତ ସହରୀପାଲି ଗାଁ ଭିତରେ ଗାଡ଼ି ଛାଡି ଡ୍ରାଇଭର ଚମ୍ପଟ ମାରିଥିଲା । ଆଳୁ ଖୋଳୁ ମହାଦେବ ବାହାରିଲା ଭଳି ଗାଡ଼ି ତଲାସୀ କରିବାରୁ ଏକ କ୍ୟୁଣ୍ଟାଲ ଗଞ୍ଜେଇ ଜବତ ହୋଇଛି ।
ଘଟଣାସ୍ଥଳରେ ବୀରମହାରାଜପୁର ଏସଡିପିଓ, ଥାନା ଅଧିକାରୀ ପହଞ୍ଚି ଗ୍ରାମବାସୀଙ୍କ ଉପସ୍ଥିତରେ ଗେଞ୍ଜେଇ ଜବତ କରିବା ସହ ଗାଡ଼ିଟିକୁ ବୀରମହାରାଜପୁର ଥାନାକୁ ପଠାଇଛି । ତେବେ ଜବତ ଗଞ୍ଜେଇର ଅନୁମାନିକ ମୂଲ୍ୟ ପାଞ୍ଚ ଲକ୍ଷ ହେବ ବୋଲି ଜଣାପଡ଼ିଛି । ମାମଲାରେ ଆଉ କାହାର ସମ୍ପୃକ୍ତି ରହିଛି ସେନେଇ ପୋଲିସ ଅଧିକ ତଦନ୍ତ ଆରମ୍ଭ କରିଛି ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
