ସୁବର୍ଣ୍ଣପୁର: କୋରୋନା ଭୟରେ ସବୁକିଛି ବନ୍ଦ ରହିଥିବାବେଳେ ଲୋକଙ୍କୁ ଖାଦ୍ୟ ସାମଗ୍ରୀ ଓ ପନିପରିବା ନେଇ ନାନାଦି ହଇରାଣ ହେଉଛନ୍ତି । ମାତ୍ର ଅନ୍ୟପଟେ ସୁବର୍ଣ୍ଣପୁର ଜିଲ୍ଲା ଉଲୁଣ୍ଡା ବ୍ଳକ ସିଂଣ୍ଡୋଲ ଗାଁରେ ହାତୀପଲଙ୍କ ଆତଙ୍କ ଦେଖିବାକୁ ମିଳିଛି । ହାତୀପଲମାନେ ଗାଁରେ ପଶି ବ୍ୟାପକ ପରିମାଣର ପନିପରିବା ଫସଲ ନଷ୍ଟ ହୋଇଥିବା ଅଭିଯୋଗ ହୋଇଛି ।
ସୂଚନା ଅନୁସାରେ, ଗତକାଲି(ସୋମବାର) ରାତିରେ ଦଳେ ହାତୀ ପଲ ଗାଁକୁ ଭିତରକୁ ପଶିଆସି ପନିପରିବା ଖାଇବା ସହ ଦଳି ମକଚି ଅନେକ ପରିବା ନଷ୍ଟ କରି ଦେଇଛନ୍ତି । ରବି ଋତୁରେ ପ୍ରାୟ 5 ଏକର ପରିମିତ ଜମିରେ ଚାଷୀମାନେ ତରଭୁଜ , ଲାଉ , ମାଖନ, ଟମୋଟୋ ଆଦି ପନିପରିବା ଚାଷ କରିଥିବାବେଳେ ହାତୀ ପଲ ସବୁକିଛି ନଷ୍ଟ କରି ଦେଇଛନ୍ତି । ନିକଟସ୍ଥ ସିଂହାସନ ଜଙ୍ଗଲରେ ହାତୀମାନେ ନିଜ ବାସସ୍ଥାନ କରିଥିବା ବେଳେ ଅଧିକାଂଶ ସମୟରେ ଜନବସତି ମୁହାଁ ହେବାରୁ ଅନେକ ଧନଜୀବନ ପ୍ରତି ବିପଦ ସୃଷ୍ଟି ହେଉଛି।
ହାତୀମାନେ ଘରଦ୍ବାର ଭାଙ୍ଗିବା ସହ ଚାଷଜମି ନଷ୍ଟ କରୁଛନ୍ତି । ଉଲୁଣ୍ଡା ବନ ବିଭାଗର ଫରେଷ୍ଟର ଗୋବିନ୍ଦ କୌରଙ୍କ ନେତୃତ୍ବରେ ଏକ 4 ଜଣିଆ ବନ କର୍ମଚାରୀ ଦଳ କ୍ଷତିଗ୍ରସ୍ତ ଅଞ୍ଚଳ ପରିଦର୍ଶନ କରିଛନ୍ତି । ହାତୀମାନଙ୍କୁ ଜନ ବସତି ଭିତରକୁ ଆସି ନଦେବା ପାଇଁ ଟ୍ରେଂଜ ଖୋଲିବା ପାଇଁ ଦାବି ହେଉଛି ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା , ଇଟିଭି ଭାରତ
