ସୁବର୍ଣ୍ଣପୁର: ପୌର ପରିଷଦର ସଫେଇ ପାଇଁ ଟେଣ୍ଡର ମାଧ୍ୟମରେ ଚୟନ ପ୍ରକ୍ରିୟା ଶେଷ ହୋଇଛି । ଏପରିକି ଠିକାଦାର ମଧ୍ୟ ନିଯୁକ୍ତି ପାଇ ସାରିଛନ୍ତି । ହେଲେ ଧରାଛୁଆଁ ଦେଉ ନାହାଁନ୍ତି । ପାଖାପାଖି 15ଟି ୱାର୍ଡ ସଫେଇ ପାଇଁ ସବୁ ପ୍ରକ୍ରିୟା ଶେଷ ହୋଇଥିଲେ ବି ସହରରୁ ଉଠୁନି ଆବର୍ଜନା ।
ଯାହାଫଳରେ ସୁବର୍ଣ୍ଣପୁର ବିଭିନ୍ନ ସ୍ଥାନରେ ପଡି ରହିଛି କୁଢକୁଢ ଅଳିଆ ଆବର୍ଜନା । ପ୍ରତ୍ୟେକ ଦିନ ଆବର୍ଜନା ଓ ବର୍ଯ୍ୟବସ୍ତୁ ଉଠି ପାରୁନଥିବାରୁ ଦୁର୍ଗନ୍ଧରେ ନାକ ଫାଟିଯାଉଛି । ପୌର ପରିଷଦର 28 ଜଣ ସଫେଇ କର୍ମଚାରୀ ରହିଛନ୍ତି। ସେମାନଙ୍କୁ ବିଭିନ୍ନ ସରକାରୀ କାର୍ଯ୍ୟାଳୟରେ ନିଯୁକ୍ତି ଦିଆଯାଇଛି । ଏବେ ମାଷ୍ଟରରୋଲ ଫର୍ମ ପୂରଣ କରି ଦୈନିକ ସଫେଇ କର୍ମଚାରୀଙ୍କୁ ନିଯୁକ୍ତି ଦିଆଯାଇଛି ।
ଆବଶ୍ୟକ ସଫେଇ କର୍ମଚାରୀ ଅଭାବରୁ ସହରର ବସଷ୍ଟାଣ୍ଡରୁ ଆରମ୍ଭ କରି ଜନଗହଳିପୂର୍ଣ୍ଣ ସ୍ଥାନମାନଙ୍କରେ ଗଦାଗଦା ଆବର୍ଜନା ପଡି ରହୁଛି। ଲୋକେ ପୌର ପରିଷଦ ପାଖରେ ଯେତେ ଅଭିଯୋଗ କଲେ ବି ଆବଶ୍ୟକ ସଫେଇ କର୍ମଚାରୀ ନଥିବାରୁ ସହରର ପରିଷ୍କାର ପରିଛନ୍ନତା ହୋଇପାରୁନାହିଁ ।
ପୌର ପରିଷଦ ତରଫରୁ ସଫେଇ ଠିକାଦାରକୁ ଆବଶ୍ୟକ ସରକାରୀ ଅର୍ଥ ଜମାକାରି 7 ଦିନ ଭିତରେ କାର୍ଯ୍ୟ ଆରମ୍ଭ କରିବାକୁ ନିର୍ଦ୍ଦେଶ ଦିଆଯାଇଛି । ଆଗାମୀ ତିନି ଦିନ ଭିତରେ ଏହି କାର୍ଯ୍ୟ ସମ୍ପୂର୍ଣ୍ଣ କରିବାକୁ ପୌର ପରିଷଦ ଯୋଜନା କରିଛି। ଅପରପକ୍ଷରେ ଖୁବ ଶୀଘ୍ର ଏହି ସମସ୍ୟାର ସମାଧାନ କରାଯିବ ବୋଲି ପୌର ପରିଷଦ କାର୍ଯ୍ୟ ନିର୍ବାହୀ କହିଛନ୍ତି।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା , ଇଟିଭି ଭାରତ
