ସୁବର୍ଣ୍ଣପୁର: ଜିଲ୍ଲାରେ ପବିତ୍ର ଶୀତଳଷଷ୍ଠୀ ଯାତ୍ରାରେ ଦେବ ଦମ୍ପତିଙ୍କ ବିବାହ ଉତ୍ସବ ସମ୍ପନ୍ନ ହୋଇଛି । ବୁଧବାର ରାତିରେ ବାବା ଚନ୍ଦ୍ରଶେଖର ଏକ ନିରାଡ଼ମ୍ବର ବରଯାତ୍ରୀ ଦଳରେ କନ୍ୟା ମାତା ପାର୍ବତୀଙ୍କ ବାସଭବନକୁ ଆସି ପାଣି ଗ୍ରହଣ କରିଥିଲେ । ବରଯାତ୍ରୀ ଦଳରେ ସହରର ଅଷ୍ଟ ଶମ୍ଭୁ ଓ ଅଷ୍ଟ ବିଷ୍ଣୁ ସାମିଲ ହୋଇଥିଲେ ।
ନିର୍ଦ୍ଧାରିତ ଲଗ୍ନରେ ବାବା ଚନ୍ଦ୍ରଶେଖର କନ୍ୟା ପିତା ଢେରାପଡାର ବି.ସତ୍ୟନାରାୟଣ ପାତ୍ରଙ୍କ ବାସଭବନରେ ପହଞ୍ଚି କନ୍ୟା ମାତାଙ୍କଠାରୁ ପାଣି ଗ୍ରହଣ କରିଥିଲେ। ଗୁରୁବାର ଦେବ ଦମ୍ପତି କନ୍ୟା ମାତାଙ୍କ ବାସଭବନରେ ଭକ୍ତଙ୍କୁ ଯୁଗଳ ଦର୍ଶନ ଦେବେ ।
ତେବେ ମହାମାରୀ କୋରନା ପାଇଁ ନିରାଡ଼ମ୍ବର ଭାବେ ଏହି ବିବାହ ଉତ୍ସବ ପାଳନ କରାଯାଇଥିବା ବେଳେ ଜନ ସମାଗମ ପାଇଁ ଜିଲ୍ଲା ଦେବୋତ୍ତର ବିଭାଗ , ଯାତ୍ରା କମିଟି ଓ ଜିଲ୍ଲା ପୋଲିସ ପ୍ରଶାସନ ମିଳିତଭାବେ ବାରଣ କରିଛନ୍ତି । କନ୍ୟା ପିତାମାତା ଜାନିଯୌତୁକ ଦେଇ ଗୁରୁବାର ରାତିରେ ଯୁଗଳ ଦମ୍ପତିଙ୍କୁ ବିଦାୟ ଦେବାର କାର୍ଯ୍ୟକ୍ରମ ରହିଛି । ଶୁକ୍ରବାର ସକାଳୁ ଦେବ ଦମ୍ପତି ମନ୍ଦିରରେ ପହଞ୍ଚିବେ ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା , ଇଟିଭି ଭାରତ
