ସୁବର୍ଣ୍ଣପୁର: ଜମ୍ମୁ କଶ୍ମୀରରେ ଧାରା 370 ଉପରେ ଲୋକଙ୍କୁ ସଚେତନ କରିବା ପାଇଁ ଜିଲ୍ଲା ବିଜେପି ପକ୍ଷରୁ ସ୍ଥାନୀୟ ଟାଉନ ହଲରେ ଆୟୋଜିତ ହୋଇଛି ବୁଦ୍ଧିଜୀବୀ ସମ୍ମିଳନୀ । ଏଥିରେ ବୁଦ୍ଧିଜୀବୀମାନେ ସାମିଲ ହୋଇ ଏହି ଆଲୋଚନାଚକ୍ରରେ ନିଜ ନିଜର ମନ୍ତବ୍ୟ ରଖିଥିଲେ ।
ହେଲେ ଆଶ୍ଚର୍ଯ୍ୟର କଥା କି, ଆୟୋଜିତ କାର୍ଯ୍ୟକ୍ରମରେ ନିମନ୍ତ୍ରିତ ଅତିଥିଙ୍କ ଦେଖା ମିଳି ନଥିଲା । କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ବଲାଙ୍ଗୀର ସାଂସଦ ସଙ୍ଗୀତା ସିଂ ଦେଓ ଓ ସମ୍ବଲପୁର ବିଧାୟକ ଜୟନାରାୟଣ ମିଶ୍ରଙ୍କୁ ନିମନ୍ତ୍ରଣ କରାଯାଇଥିଲା । ହେଲେ ବିଡମ୍ବନା କି କେହି ବି କାର୍ଯ୍ୟକ୍ରମରେ ଉପସ୍ଥିତ ହୋଇନଥିଲେ । ଏପରିକି ଜିଲ୍ଲା ବିଜେପି କର୍ମୀ ମଧ୍ୟ କାର୍ଯ୍ୟକ୍ରମକୁ ଆସିନଥିଲେ । ଯାହା ଜିଲ୍ଲା ବିଜେପିରେ ଫାଟକୁ ଏକ ପ୍ରକାର ଇଙ୍ଗିତ କରୁଛି ।
ତେବେ ମୁଖ୍ୟ ଅତିଥିଙ୍କ ଅନୁପସ୍ଥିତି ସତ୍ତ୍ବେ ଜିଲ୍ଲା ସଭାପତି ବିଜୟ କୁମାର ମହାକୁରଙ୍କ ନେତୃତ୍ବରେ କାର୍ଯ୍ୟକ୍ରମ ସମ୍ପନ୍ନ ହୋଇଥିଲା । ସେପଟେ ବରିଷ୍ଠ ବିଜେପି କାର୍ଯ୍ୟକର୍ତ୍ତା ଅଶୋକ ପୂଜାରୀ ଏହାକୁ ଖଣ୍ଡନ କରିବା ସହିତ ଏହି ସମ୍ବିଳନୀ ସଫଳ ହୋଇଛି ବୋଲି ପ୍ରତିକ୍ରିୟା ରଖିଛନ୍ତି।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
