ସୁବର୍ଣ୍ଣପୁର: ଆଜି ଶ୍ରାବଣ ମାସର ତୃତୀୟ ସୋମବାର । ଏନେଇ ସୋନପୁର ସହରରେ ଥିବା ବିଭିନ୍ନ ଶୈବପୀଠରେ କାଉଡିଆଙ୍କ ଭିଡ ଜମିଥିଲା । ସକାଳୁ ସକାଳୁ କାଉଡିଆ ମହାନଦୀ ସ୍ବର୍ଣ୍ଣପ୍ରୟାଗ ଘାଟରୁ ଜଳ ଉଠାଇ ଅଷ୍ଟଶମ୍ଭୁଙ୍କ ପୀଠରେ ଜଳଲାଗି କରିଥିଲେ ।
ସେପଟେ ଏକ ନିଆରା ଢଙ୍ଗରେ ତ୍ରିବେଣୀ ସଙ୍ଗମସ୍ଥିତ ରାମେଶ୍ବର ମନ୍ଦିରରେ ପହଞ୍ଚିଥିଲେ କିଛି କାଉଡିଆ । ଜିଲ୍ଲାର ତରଭା ଦେଇ ପ୍ରବାହିତ ହେଉଥିବା ତେଲନଦୀର ବ୍ରାହ୍ମଣୀ ଘାଟରୁ ଟ୍ୟୁବରେ ବସି ବାବା ରାମେଶ୍ବରଙ୍କ ନିକଟରେ ଜଳଲାଗି କରିଛନ୍ତି ଭକ୍ତ ।
ଜଳ ହିଁ ଜୀବନ ଏବଂ ନଦୀର ସ୍ବଚ୍ଛତା ବାର୍ତ୍ତା ନେଇ ପ୍ରାୟ 10 ଘଣ୍ଟାରୁ ଅଧିକ ସମୟ ଧରି 6 ଜଣ ବୋଲବମ୍ ଭକ୍ତ 40 କିମି ପର୍ଯ୍ୟନ୍ତ ନଦୀ ସୁଅରେ ଆସି ଜନ ସଚେତନତା ସୃଷ୍ଟି କରିଥିଲେ। ଖାଲି ଯେ ଆଧ୍ୟାତ୍ମିକ ମନୋଭାବ ତାହା ନୁହେଁ, ସାମାଜିକ ଓ ପରିବେଶ ସୁରକ୍ଷାର ବାର୍ତ୍ତା ନେଇ ତରଭାରୁ ରାମେଶ୍ବର ପର୍ଯ୍ୟନ୍ତ ଆସିଥିବା କାଉଡିଆଙ୍କ ଏହି ପ୍ରୟାସକୁ ସାଧାରଣରେ ପ୍ରଶଂସା କରାଯାଇଛି ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା , ଇଟିଭି ଭାରତ
