ସୁବର୍ଣ୍ଣପୁର: ସୁବର୍ଣ୍ଣପୁର ଜିଲ୍ଲା ଉଲୁଣ୍ଡା ବନାଞ୍ଚଳ ଅଧିନସ୍ଥ କ୍ଷୀରପୁର ଗାଁରେ ଶନିବାର ଏକ ସମ୍ବେଦନଶୀଳ ଓ କୌତୁହଳପ୍ରଦ ଘଟଣା ଦେଖିବାକୁ ମିଳିଛି l ଏକ ହରିଣ ଶୋଷରେ ଜଙ୍ଗଲରୁ ବାହାରି ପାଣି ପିଇବା ପାଇଁ ଗାଁ ପାଖ କେନାଲକୁ ଆସିଥିବା ବେଳେ କୁକୁର ମାନେ ଦେଖି ହରିଣକୁ ଗୋଡାଇଥିଲେ । ଜୀବନ ବିକଳରେ ହରିଣଟି କେନାଲ ପାଣିକୁ ଡେଇଁ ପଡିଥିଲା l
ହରିଣ ପାଇଁ ଦେବଦୂତ ସାଜିଲେ ଯୁବକ
ଏ ଦୃଶ୍ୟକୁ କ୍ଷୀରପୁର ଗ୍ରାମର ଯୁବକମାନେ ଦେଖି ପ୍ରଥମେ ବନ ବିଭାଗକୁ ଖବର ଦେଇଥିଲେ ହେଁ ବନବିଭାଗର କୌଣସି କର୍ମଚାରୀ ଅବା ଅଧିକାରୀ ଘଟଣା ସ୍ଥଳରେ ପହଞ୍ଚି ନଥିଲେ । ଶେଷରେ ଗ୍ରାମର ଯୁବକମାନେ ଏକତ୍ରିତ ହୋଇ କେନାଲ ପାଣିରେ ଭାସୁଥିବା ହରିଣକୁ ଉଦ୍ଧାର କରଥିଲେ।
ପାଣିରୁ ଉଦ୍ଧାର ହେବା ପରେ ହରିଣଟି ଜଙ୍ଗଲ ଭିତରକୁ ଦୌଡ଼ି ପଳାଇଥିଲା । ଯୁବକ ମାନଙ୍କ ପାଇଁ ଆଜି ଗୋଟିଏ ନିରୀହ ହରିଣର ଜୀବନ ବଞ୍ଚି ଯାଇଥିବା ବେଳେ ଅଞ୍ଚଳବାସୀ ଉଦ୍ଧାରକାରୀ ଯୁବକମାନଙ୍କୁ ବେଶ୍ ପ୍ରଶଂସା କରିଛନ୍ତି।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
