ସୁବର୍ଣ୍ଣପୁର: କୋରୋନା ମହାମାରୀର ଦ୍ବିତୀୟ ଲହରରେ ସଂକ୍ରମଣ ଯେତିକି ବୃଦ୍ଧି ପାଉଛି ମୃତ୍ୟୁ ସଂଖ୍ୟା ମଧ୍ୟ ସେତିକି ବୃଦ୍ଧି ହେଉଛି । ସଂକ୍ରମଣ ଭୟରେ ବନ୍ଧୁ ପରିଜନ ମୃତଦେହକୁ ଅନ୍ତିମ ସଂସ୍କାର ପାଇଁ ଭୟ କରୁଛନ୍ତି। ଏଭଳି ସ୍ଥିତିରେ ପ୍ରଶାସନ ମୃତ କୋରୋନା ରୋଗୀଙ୍କ ଅନ୍ତିମ ସଂସ୍କାର କରୁଥିବା ଦେଖାଯାଇଛି । ଏପରି ଏକ ଘଟଣା ଦେଖିବାକୁ ମିଳିଛି ସୁବର୍ଣ୍ଣପୁର ଜିଲ୍ଲା ବିରମହରାଜପୁର ବ୍ଳକର ଅଡାଳ ଗାଁରେ ।
ଗାଁର ଜଣେ ମହିଳା ଗତ ୩ ଦିନ ପୂର୍ବରୁ କୋରୋନାରେ ଆକ୍ରାନ୍ତ ହୋଇଥିଲେ । ମାତ୍ର ମଙ୍ଗଳବାର ତାଙ୍କର ମୃତ୍ୟୁ ଘଟିଥିଲା । କୋଭିଡ ଆକ୍ରାନ୍ତ ହୋଇଥିବାରୁ ପରିବାର ଓ ସମ୍ପର୍କୀୟ ଦାହ ପାଇଁ ଆଗକୁ ଆସି ନଥିଲେ । ଏଭଳି ସ୍ଥିତିରେ ଆଗକୁ ଆସିଥିଲେ ଜିଲ୍ଲା ପ୍ରଶାସନ ।
ବୀରମହାରାଜପୁର ବିଡିଓ ମୋତିଲାଲ ସୁଲିଆଙ୍କ ନେତୃତ୍ବରେ ସହକାରୀ ଯନ୍ତ୍ରୀ ବିନିତ ଲାକ୍ରା, ବ୍ଳକ କର୍ମଚାରୀ ସାରାମ ମିଶ୍ର, ସଞ୍ଜୟ ଦାସ ଓ ଖଣ୍ଡହତାର ପୂର୍ବତନ ସରପଞ୍ଚ ନିତ୍ୟାନନ୍ଦ ସାହୁ ପ୍ରମୁଖ ମିଳିତ ଭାବେ ନିକଟସ୍ଥ ଶ୍ମଶାନ ଘାଟରେ ମହିଳାଙ୍କ ଅନ୍ତିମ ସଂସ୍କାର କରିଛନ୍ତି । ବିଡ଼ିଓଙ୍କ ଏହି ଉଦ୍ୟମକୁ ବିଭିନ୍ନ ମହଲରେ ସ୍ବାଗତ କରାଯାଇଛି।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
