ସମ୍ଵଲପୁର : ବିଲୁପ୍ତ ଲୋକକଳା ଓ କଳାକାରଙ୍କୁ ପରିଚୟ ଦେବା ସହ ସେମାନଙ୍କୁ ବଞ୍ଚାଇ ରଖିଛି ଶୀତଳଷଷ୍ଠୀ । ତେବେ ଏହି ଯାତ୍ରାର ଆଉ ଗୋଟିଏ ରୋଚକ ଦିଗ ହେଉଛି ଏହି ଯାତ୍ରାରେ ବହୁତ କିନ୍ନର ଆସନ୍ତି। ଏବେ ପ୍ରଶ୍ନ ଉଠେ କାହିଁକି ଆସନ୍ତି କିନ୍ନର ?
ଏମାନଙ୍କୁ ଆବଶ୍ୟକ ହୁଏନି ନିମନ୍ତ୍ରଣ । ମନକୁ ମନ ଶୀତଳଷଷ୍ଠୀ ଆସିଲେ ଦୂରାଦୂରାନ୍ତରୁ ଧାଇଁ ଆସନ୍ତି ସମ୍ବଲପୁର । ସତେ ଯେମିତି ଏମାନଙ୍କ ବିନା ଅଧୁରା ଏହି ଯାତ୍ରା । କେତେବେଳେ ଏମାନେ ଭୋଳାନାଥଙ୍କ ପତରପେଣ୍ଡିରେ ନୃତ୍ୟ ପରିବେଷଣ କରନ୍ତି ତ ଆଉ କେତେବେଳେ ଯୁଗଳଦର୍ଶନ ଶୋଭାଯାତ୍ରରେ ନୃତ୍ୟ କରି ଦର୍ଶକଙ୍କ ମନ କିଣି ନିଅନ୍ତି କିନ୍ନର ମାନେ ।
କୁହାଯାଏ ଭଗବାନ ଭୋଳାନାଥଙ୍କ ବରଯାତ୍ରୀ ଶୋଭାଯାତ୍ରାରେ ନୃତ୍ୟ ପରିବେଷଣ ସହ ଦେବ ଦମ୍ପତିଙ୍କ ଯୁଗଳଦର୍ଶନ ଦେଖିଲେ ଅଭିଶପ୍ତ କିନ୍ନର ଜନ୍ମରୁ ମୁକ୍ତି ମିଳିଥାଏ। ଭଗବାନ ଅର୍ଦ୍ଧନାରୀଶ୍ବର ଏମାନଙ୍କୁ ମୁକ୍ତି ଦେଇଥାନ୍ତି । ସେଥିପାଇଁ ରାଜ୍ୟ ତଥା ରାଜ୍ୟ ବାହାରୁ ଶହ ଶହ କିନ୍ନର ଶୀତଳଷଷ୍ଠୀରେ ସମ୍ବଲପୁର ଆସିଥାନ୍ତି ।
ସମ୍ବଲପୁରରୁ ଜୁସ୍ମନ ରଣା,ଇଟିଭି ଭାରତ
