ସମ୍ବଲପୁର: ବରେଇପାଲିରେ ଓ୍ଵେସ୍କୋ (WESCO) କର୍ମଚାରୀଙ୍କ ଦାଦାଗିରି। ଦିନ ଦ୍ବିପ୍ରହରେ ବରେଇପାଲି ଅଞ୍ଚଳର ଜଣେ ଦୋକାନୀଙ୍କଠାରୁ ବିଜୁଳି ବିଲ୍ ସଂଗ୍ରହ କରିବାକୁ ଯାଇଥିବା କିଛି ଓ୍ଵେସ୍କୋ କର୍ମଚାରୀ ତାଙ୍କୁ ମାଡ ମାରିଥିବା ଅଭିଯୋଗ ହୋଇଛି ଅଇଁଠାପାଲି ଥାନାରେ ।
ଆଶିଷ କୁମାର ଗୁପ୍ତା ନାମକ ଜଣେ ଦୋକନୀଙ୍କ କିଛି ପୁରୁଣା ବିଜୁଳି ବିଲ୍ ବକେୟା ରହିଥିଲା । ଶନିବାର ଦିନ ପ୍ରାୟ 11ଟା ସମୟରେ କିଛି ଓ୍ବେସ୍କୋ କର୍ମଚାରୀ ତାଙ୍କ ଦୋକାନକୁ ବିଲ୍ ସଂଗ୍ରହ କରିବାକୁ ଯାଇଥିଲେ । ପ୍ରାୟ 20 ରୁ 25 ଜଣ ତାଙ୍କ ଦୋକାନ ଭିତରକୁ ପଶିବାରୁ ସେମାନଙ୍କୁ ବାରଣ କରିଥିଲେ ଆଶିଷ । ଏହାକୁ ନେଇ ଉଭୟଙ୍କ ମଧ୍ୟରେ କଥା କଟାକଟି ପରେ ହାତାହାତି ହୋଇଥିଲା ।
ଯାହାପରେ କିଛି ଓ୍ଵେସ୍କୋ କର୍ମଚାରୀ ଆଶିଷକୁ ନିର୍ଦ୍ଧୁମ ମାଡ ମାରିବା ସହ ତାଙ୍କ ମୁଣ୍ତରେ ଏକ ବୋତଲ ମାରି ଥିବାର ଅଭିଯୋଗ କରିଛନ୍ତି ଆଶିଷ । ତେବେ ବିଲ୍ ସଂଗ୍ରହ ପାଇଁ ଆସିଥିବା କିଛି ଯୁବକଙ୍କ ନାମରେ ପୁର୍ବରୁ ଅଇଁଠାପାଲି ଥାନାରେ ସଙ୍ଗିନ ମାମଲା ରହିଥିବା ଅଭିଯୋଗ କରିଛନ୍ତି ଆଶିଷ । ଏନେଇ ଅଇଁଠାପାଲି ଥାନାରେ ଏକ ମାମଲା ରୁଜୁ କରାଯାଇଛି । ବକେୟା ଟଙ୍କା ଅସୁଲି ପାଇଁ ଅସାମାଜିକ ଯୁବକଙ୍କୁ ବ୍ୟବହାର କରୁଥିବା ନେଇ ୱେସ୍କୋ ନାଁରେ ପୂର୍ବରୁ ଅଭିଯୋଗ ହୋଇ ଆସୁଛି।
ସମ୍ବଲପୁରରୁ ବାଦଶାହ ଜୁସ୍ମନ ରଣା, ଇଟିଭି ଭାରତ