ସମ୍ବଲପୁର : ସମ୍ବଲପୁର ଧନୁପାଲି ଥାନା ଅନ୍ତର୍ଗତ ସୁନାପାଲି ଠାରେ ଗତ ରାତିରେ ହୋଇଥିବା ହତ୍ୟାକାଣ୍ଡ ଘଟଣା ନେଇ ଆଜି ଉତ୍ତେଜନା ପ୍ରକାଶ ପାଇଛି । ଏହି ହତ୍ୟାକାଣ୍ଡର ମୁଖ୍ୟ ଅଭିଯୁକ୍ତକୁ ଗିରଫ କରିବା ଦାବିରେ ସ୍ଥାନୀୟ ଅଞ୍ଚଳର ଶହ ଶହ ମହିଳା ଓ ପୁରୁଷ ଧନୁପାଲି ଥାନା ସମ୍ମୁଖରେ ଟାୟାର ଜାଳି ପ୍ରତିବାଦ କରିବା ସହ ଧନୁପାଲି ଥାନା ଘେରାଉ କରିଛନ୍ତି ।
ତେବେ ଏହି ଘଟଣାର ମୁଖ୍ୟ ଅଭିଯୁକ୍ତକୁ ଗିରଫ କରିବା ଦାବିରେ ଆଜି ସ୍ଥାନୀୟ ଅଞ୍ଚଳର ଶହ ଶହ ମହିଳା ଓ ପୁରୁଷ ଏସ.ପି ଅଫିସ ଘେରାଉ ପାଇଁ ଯାଉଥିବା ବେଳେ ପୋଲିସ ଭୁତାପଡା ଛକରେ ଲୋକଙ୍କୁ ଅଟକାଇଥିଲା । ଏହି ସମୟରେ ପୋଲିସ ସହିତ ସ୍ଥାନୀୟ ଲୋକଙ୍କ ସାମାନ୍ୟ ଧସ୍ତାଧସ୍ତି ହେବା ସହ ଉତ୍ତେଜନା ପ୍ରକାଶ ପାଇଥିଲା ।
ତେବେ ସମ୍ବଲପୁର ଏସ.ପି ବତୁଲା ଗଙ୍ଗାଧର ନିଜେ ଘଟଣା ସ୍ଥାନରେ ପହଞ୍ଚି ଲୋକଙ୍କ ସହିତ ସିଧା ସଳଖ କଥା ହେବା ସହ ମୂଖ୍ୟ ଅଭିଯୁକ୍ତ ଓ ତାର ଜଣେ ସହଯୋଗୀଙ୍କୁ ଅଟକ ରଖି ପଚରା ଉଚରା କରାଯାଉଥିବାର କହିବା ପରେ ଉତ୍ତେଜନା କମିଥିଲା । ତେବେ ହତ୍ୟାକାଣ୍ଡର ନିର୍ଦ୍ଧିଷ୍ଟ କାରଣ ସ୍ପଷ୍ଟ ହୋଇନି ବୋଲି ଏସ.ପି ସୂଚନା ଦେଇଛନ୍ତି ।
ସମ୍ବଲପୁରରୁ ବାଦଶାହ ଜୁସ୍ମନ ରଣା, ଇଟିଭି ଭାରତ
