ସମ୍ବଲପୁର: ଧୁମଧାମରେ ଶେଷ ହୋଇଛି ଦେବ ଦମ୍ପତିଙ୍କ ବିବାହ ଉତ୍ସବ । ତେବେ ସମ୍ପୂର୍ଣ୍ଣ ଲୋକାଚାରରେ ଆରଣ୍ୟକ ପଦ୍ଧତି ଅନୁସାରେ ହୋଇଛି ଏହି ବାହାଘର । ଏହି ବିବାହରେ ଦେବତା, ନର, ନାରୀ, କିନ୍ନର, ଗନ୍ଧର୍ବ, ବାନର, ସହ ହଜାର ହଜାର ଲୋକ ସାମିଲ ହୋଇଥିଲେ ।
ତେବେ ଗତକାଲି ବିଲମ୍ବିତ ରାତି ପ୍ରାୟ ୧୨ଟା ସମୟରେ ସମସ୍ତ ଯାତ୍ରା କମିଟି ଭୋଲାନାଥଙ୍କର ଆଳତି କରିବା ପରେ ଆରମ୍ଭ ହୋଇଥିଲା ବରଯାତ୍ରୀ ଶୋଭାଯାତ୍ରା । ଏହି ଶୋଭାଯାତ୍ରାରେ ସମ୍ବଲପୁର ଝାଡୁଆପଡାର ଲୋକନାଥ ବାବା, ମୁଦିପଡାର ଜାଗେଶ୍ବର ବାବାଙ୍କ ସହ ସମସ୍ତ ଶିବାଳୟରୁ ଭଗବାନ ଶିବ ଶଙ୍କର ବରଯାତ୍ରୀ ଶୋଭାଯାତ୍ରାରେ ବାହାରି କନ୍ୟା ପିତାମାତାଙ୍କ ଘରେ ଆସି ପହଞ୍ଚିଥିଲେ । ସେଠାରେ କନ୍ୟାଘର ପକ୍ଷରୁ ବର ପକ୍ଷକୁ ଭବ୍ୟ ସ୍ଵାଗତ ସର୍ମଦ୍ଧନା କରାଯାଇଥିଲା ।
ବିବାହ ସମୟରେ ସମ୍ବଲପୁର ସହର ଉଠୁଥିଲା ପଡୁଥିଲା । ସମ୍ପୂର୍ଣ୍ଣ ଲୋକାଚାରରେ ବାସୁଦେବ ପଦ୍ଧତିରେ ହୋଇଥିଲା ଏହି ଦେବଦମ୍ପତିଙ୍କ ବାହାଘର । ପ୍ରଥମେ ବାଟବରଣ, କଳସ ଦର୍ଶନ, ଲବଣ ଚାମୁରି, ମହାଆରତି ପରେ ସାଦର ନିମନ୍ତ୍ରଣ କରି ବରକୁ ବେଦିକୁ ନିଆଯାଇଥିଲା ।
ଏହାପରେ ବେଦୀ ପରିକ୍ରମା କରି ଶଢାର୍ଘ୍ୟା କର୍ମ ପରେ ଦ୍ବିତୀୟ ବରଣ, ପରେ ଅଗ୍ନି ସ୍ଥାପନ କଲା ପରେ କନ୍ୟାକୁ ବେଦୀକୁ ଅଣାଯାଇଥିଲା । ପରେପରେ ଲଗ୍ନ ବିଶୁଦ୍ଧି ,ଅଗ୍ନି ସ୍ଥାପନ ଇତ୍ୟାଦି କରି ମହାବାକ୍ୟ ସଂକଳ୍ପରେ ବିବାହ ସମ୍ପନ୍ନ ହୋଇଥିଲା ।
ତେବେ ଆଜି ରାତି ୧୧ ସମୟରେ ବାହାରିବ ଦେବ ଦମ୍ପତ୍ତିଙ୍କ ଯୁଗଳ ଦର୍ଶନ ଶୋଭଯାତ୍ରା । ଯାହା ଆସନ୍ତାକାଲି ଅପରାହ୍ନ ପର୍ଯ୍ୟନ୍ତ ଚାଲିବ ଓ ସଦ୍ଧ୍ୟାରେ ହେବ ମନ୍ଦିର ପ୍ରବେଶ ।
ସମ୍ବଲପୁରରୁ ବାଦଶାହା ଜୁସ୍ମନ ରଣା, ଇଟିଭି ଭାରତ
