ସମ୍ବଲପୁର: ମଧ୍ୟସ୍ଥିଙ୍କ ଠାରୁ ମିଳିଛି ବାହାଘର ପ୍ରସ୍ତାବ । ଅମୁକ ଜାଗାରେ ଅଛନ୍ତି ଜଣେ ସର୍ବଗୁଣାସମ୍ପନ୍ନ କନ୍ୟା । ଖବର ପାଇ କନ୍ୟାଘରେ ପହଞ୍ଚିଛନ୍ତି ବର ପକ୍ଷ । ଯଥାରୀତି ସ୍ବାଗତ କରୁଛନ୍ତି କନ୍ୟା ପକ୍ଷ । ପଚାରୁଛନ୍ତି ଆସିବାର କାରଣ ।
ବର ପକ୍ଷ କହୁଛନ୍ତି ଆମ ପୁଅ ପାଇଁ ଆପଣଙ୍କ ଝିଅର ବିବାହ ପ୍ରସ୍ତାବ ନେଇ ଆସିଛୁ । ବରର ଯୋଗ୍ୟତା ବିଷୟରେ ଜାଣିବାର ଜିଜ୍ଞାସା ପ୍ରକାଶ କରୁଛନ୍ତି କନ୍ୟାପକ୍ଷ । ଏହାପରେ ଶିବଙ୍କ ମହାତ୍ମ୍ୟ ବଖାଣୁଛନ୍ତି ବର ପକ୍ଷ । ଯାହା ଜିଣିନେଇଛି କନ୍ୟା ଘର ମନ । ଆଉ ମହାଦେବଙ୍କୁ ଜ୍ବାଇଁ କରିବାକୁ ସ୍ଥିର କରିଛନ୍ତି । ଆନନ୍ଦଚିତ୍ତରେ ପରସ୍ପରକୁ କୋଳାଗ୍ରତ କରୁଛନ୍ତି 2 ସମୁଦି । ଫୁଲ, ବେଲପତ୍ର ଓ 72ଟି ସର୍ଗି କାଠ ବିଡା ଦେଇ ସମ୍ପନ୍ନ କରିଛନ୍ତି ନିର୍ବନ୍ଧ ।
ସମ୍ବଲପୁରର ଅନ୍ୟତମ ପୁରାତନ ଶୀତଳଷଷ୍ଠୀ ଯାତ୍ରା କମିଟି ଝାଡୁଆପଡା, ମୋଦିପଡା ଓ ବଡବଜାର । ବୁଧବାର ବିଳମ୍ବିତ ରାତ୍ରିରେ ଏଠାରେ ସମ୍ପନ୍ନ ହୋଇଛି ଶିବ-ପାର୍ବତୀଙ୍କ ନିର୍ବନ୍ଧ । ଲୋକନାଥ ବାବା, ଜାଗେଶ୍ବର ବାବା ଓ ଶୀତଳେଶ୍ବର ବାବାଙ୍କ ପାଇଁ ଯୋଗ୍ୟ କନ୍ୟା ଖୋଜିବାକୁ ମନ୍ଦିରରୁ ସପ୍ତ ଋଷି ଓ ବରପିତା ବାହାରିଥିଲେ । ଘଣ୍ଟ, ଘଣ୍ଟା, ଶଙ୍ଖ, ମାର୍ଦଳ ସହ ପାରମ୍ପରିକ ବାଦ୍ୟରେ କମ୍ପି ଉଠିଥିଲା ସମଗ୍ର ପରିବେଶ ।
ନିର୍ବନ୍ଧ ସରିଛି । ଏବେ ବାହାଘରର ବେଳ। ଭଗବାନ ଶିବ-ପାର୍ବତୀଙ୍କ ବାହାଘର ନିମନ୍ତ୍ରଣ ଦେବାକୁ ଆଜି ବାହାରିବେ ହନୁମାନ ।
ସମ୍ବଲପୁରରୁ ବାଦଶାହା ଜୁସ୍ମନ ରଣା, ଇଟିଭି ଭାରତ
